1. Toe het die Here vir my gesê:
2. “Mens, sê vir die skaapwagters van Israel wat Ek vir jou sê. Hulle is die leiers van my volk. Wel, die Here, Esegiël se God, sê vir hulle: Ek gaan julle vernietig, want julle eet die kos wat vir die skape bedoel was. Is dit nie skaapwagters se werk om vir die skape te sorg en vir hulle kos te gee nie?
3. “Julle drink die melk wat die diere vir julle gee. Julle dra klere wat geweef word van die wol wat hulle gee. En julle slag die beste skape om hulle vleis te eet. Maar julle gee nie eens vir hierdie diere kos nie! Hulle vrek van die honger.
4. Julle gee nie om vir die swak skape nie. Julle sorg ook nie vir die siek diere nie. As ’n skaap ’n been breek, doen julle net mooi niks daaraan nie. Julle verbind nie die wonde en spalk die breuke nie. Julle gaan soek nie die skape wat wegdwaal van die trop en wegraak as dit donker word nie. Nee, julle behandel die trop skape sleg. Julle is wreed en maak hulle seer. Julle is mos sterker as die skape.
5. Daarom loop hierdie trop skape, my volk, alleen rond. Hulle het nie ’n skaapwagter wat hulle oppas nie. Wilde diere vang onder hulle, want hulle word nie beskerm nie.
6. My skape loop alleen op die heuwels en in die valleie. Hulle is al oor die hele aarde verstrooi. Niemand gaan soek hulle nie.
7. “Daarom moet die skaapwagters baie mooi luister na wat Ek vir hulle sê.
8. So seker as wat Ek leef,” sê die Here, die God van Esegiël, “julle het my trop skape gelos en nie vir hulle gesorg nie. Julle het nie omgegee as wilde diere my skape aanval en doodmaak nie. Julle het niks daaraan gedoen nie. Ek het julle aangestel as skaapwagters om my skape op te pas. Maar julle het nie eens die moeite gedoen om op te staan en te gaan soek as van my skape weggeraak het nie. Julle het net vir julleself gesorg. Julle het julleself trommeldik geëet, maar my skape het van die honger gevrek.”
9. Daarom, luister mooi, skaapwagters.
10. So sê die Here, die God van Esegiël: “Julle is van nou af my vyande, skaapwagters! Ek hou julle verantwoordelik vir elke skaap. Julle sal vir My moet kom sê hoe dit met elke skaap gaan en wat van elke skaap geword het. En julle sal ook nie meer vir my skape kos gee nie, want Ek kan julle nie vertrou nie. Julle vat die kos vir julleself. Julle sal nie langer slag en eet soos julle wil nie. Ek red my skape uit julle hand.”
11. Nou sê die Here, Esegiël se God: “Ek soek self my skape wat weg is. En as Ek hulle kry, bring Ek hulle terug en gee vir hulle kos.
12. Ek is van nou af die Skaapwagter wat vir hierdie trop skape sorg wat oor die hele wêreld rondloop. Ek sal hulle gaan soek en hulle red. Die dag toe dit bewolk was en die lug donker was, het baie van my skape verdwaal.
13. Maar Ek sal hulle gaan soek en hulle veilig terugbring huis toe. Ek bring hulle terug na hulle eie land toe, na Israel. Ek gaan haal hulle tussen die ander volke uit waar hulle as gevangenes woon. Dan sal Ek vir hulle genoeg kos gee. Hulle sal op die heuwels wei en by die riviere water drink. Hulle sal veilig wees omdat daar oral mense sal wees wat hulle beskerm.
14. Ja, Ek loop voor die skape uit en bring hulle by die beste weiveld. Op die hoogste berge van Israel sal hulle die beste gras kry. En as hulle klaar gewei het, sal hulle veilig lê en rus. Want Ek is daar tussen hulle. Ek beskerm hulle. Ek gee vir my skape net die beste.
15. Van nou af sal Ek self vir my skape sorg. Ek vertrou hulle nie meer aan enigiemand toe nie. My skape sal rustig wees. As hulle rus, sal niks hulle versteur nie.” Dit is die Here, die God van Esegiël, wat so sê.
16. “Ek sal self daardie skape gaan soek wat wegdwaal en verlore raak. Ek sal hulle veilig huis toe bring. En as ’n skaap seerkry, sal Ek self vir hom sorg. Ek sal sy wond verbind. Die swak skape sal Ek op my skouers dra. Maar die vet skape wat ander seermaak, sal Ek laat slag. My skape sal goed behandel word, want Ek gee vir hulle om.”
17. Dit is Ek, die Here, die God van Esegiël, wat vir die kleinvee wat aan My behoort, sê: “Julle is my volk. Ek sal sorg dat daar aan die skape en die bokke reg gedoen word. Ek sal hulle leer om mekaar reg te behandel. Ek sal ook nie meer die skape en die bokke tussen mekaar laat wei nie. Nee, hulle sal in twee troppe wei.
18. Party van die skape en bokke was selfsugtig. Hulle het die beste gras afgevreet en die res van die gras vertrap. Daar was nie gras oor vir die ander skape nie. Of hulle het die beste water gedrink en dan in die water gespring sodat dit vol modder geword het. Die ander skape het dan nie lekker water gehad om te drink nie.
19. Al wat vir die res van die trop oorbly, is die gras wat julle vertrap het en die water wat julle vuil gemaak het.
20. “Daarom gaan Ek die vet skaap en die maer skaap voor My roep. Ek gaan oor hulle toekoms besluit nadat Ek gesien het hoe hulle optree. Ek gaan kyk wie het reg gedoen, en wie het slegte dinge doen.” So sê die Here, Esegiël se God:
21. “Julle vet skape het die ander skape weggestoot sodat hulle nie by goeie gras kon uitkom nie. Julle het die swak en die honger skape met julle horings weggedruk totdat hulle vandag gevangenes in ver en vreemde lande is.
22. Daarom gaan Ek my trop skape red. My skape sal nie langer sleg behandel word nie. Niemand sal hulle meer doodmaak nie. Want Ek sal sorg dat reg gedoen word tussen een skaap en ’n ander.
23. Ek stel self ’n skaapwagter oor my skape aan. Hy sal so ’n goeie leier wees soos koning Dawid. Hy sal sorg dat my skape op presies die regte tyd kos kry. Hy sal ’n goeie skaapwagter vir my skape wees.
24. Ek, die Here, sal my skape se God wees. En Dawid sal soos die seun van ’n koning tussen my mense wees. Almal sal hom volg. Ek, die Here, het so gesê!”
25. “Daardie dag maak Ek ’n ooreenkoms met my trop skape. Ek belowe dat Ek al die gevaarlike wilde diere uit die land sal wegjaag. My skape sal op enige plek kan loop. Hulle sal selfs oornag buite kan slaap sonder om bang te wees vir roofdiere.
26. Ek laat dit goed gaan met my volk. In al hulle huise wat rondom my huis in Jerusalem gebou is, sal daar meer as genoeg wees. Ek stuur die heerlikste reënbuie elke keer as dit begin droog word. Dit sal goed gaan met my mense. Hulle sal genoeg van alles hê.
27. Hulle sal elke jaar rekordoeste hê. Die vrugtebome se takke sal swaar hang van al die vrugte. En die landerye sal elke jaar ’n goeie oes gee. My volk sal veilig in hulle land woon. Hulle sal geen vyand hê wat hulle bedreig nie. Hulle sal nie meer gevangenes van ander nasies wees en in vreemde lande bly nie. Ek sal hulle daar gaan uithaal en terugbring na hulle eie land. Dan sal my volk weet dat Ek die Here is.
28. Ander nasies sal hulle nie meer aanval nie. En wilde diere sal hulle nie meer in hulle eie land aanval nie. Hulle sal veilig wees. Hulle sal nie meer vir enigiets bang wees nie.
29. “Hulle land sal bekend word oor die hele wêreld as die land wat meer as genoeg kos het. My volk sal nooit weer honger ly nie. Hulle sal nooit weer buig voor ander nasies nie, en niemand sal hulle gevange neem en weglei om in vreemde lande te gaan bly nie. Ander nasies sal nooit weer met my volk spot omdat dit so sleg gaan met hulle nie.
30. Wanneer dit gebeur, sal my volk erken dat hulle my volk is.” So sê die Here, die God van Esegiël.
31. “Julle is my trop skape. Julle is die volk wat Ek vir Myself gekies het. Ek sorg vir julle. Julle is my volk, en Ek is julle God,” sê die Here, Esegiël se God.