1. “So moet jy die land onder die stamme van Israel verdeel. Die gebied wat jy vir die stam van Dan moet gee, is in die noorde van die land. Die grenslyn loop van Getlon, oor Lebo-Hamat en Gasar-Enan tot waar die noordgrens van Damaskus teen Hamat raak. Dan se gebied strek oor die hele gebied van Israel, van die oostekant af tot aan die westekant.
2. Aser se gebied is suid van dié van Dan en loop ook van oos na wes.
3. Naftali se gebied is suid van Aser, ook van oos na wes.
4. Manasse se gebied is suid van Naftali.
5. Suid van Manasse se gebied is Efraim,
6. en dan Ruben, en dan
7. Juda. Hulle almal se grense strek van die oostekant tot die westekant van die land.
8. “Suid van Juda se gebied is die stuk grond wat julle eenkant moet sit wat aan My behoort. Hierdie stuk grond moet twaalf en ’n half kilometer breed wees en net so lank as die ander stroke, van die oostelike tot by die westelike grens. Die huis van die Here moet in die middel van hierdie gebied wees.
9. Hierdie stuk grond moet twaalf en ’n half kilometer lank en vyf kilometer breed wees.
10. Die res van die grond moet aan die mense wat vir My werk, gegee word. Dit moet ’n strook wees van twaalf en ’n half kilometer lank van oos na wes en vyf kilometer breed van noord na suid. Die huis van die Here staan in die middel hiervan.
11. Die grond behoort aan die mense wat in my diens staan, die kleinkinders van Sadok. Hulle het baie lank hard in my huis gewerk. Hulle het nie die slegte dade gedoen wat die Israeliete en die ander mense gedoen het wat in my huis gewerk het nie.
12. Hierdie stuk grond moet vir die mense gegee word wat in my huis werk. Langs die grond van die kleinkinders van Sadok moet jy ook grond gee vir die ander mense wat in my huis werk.
13. Hulle is die kleinkinders van Levi, en jy moet vir hulle ook grond gee langs dié van die kleinkinders van Sadok. Die grond wat jy vir hulle gee, moet twaalf en ’n half kilometer lank en vyf kilometer breed wees.
14. Die mense wat in my huis werk, mag nie die grond wat hulle kry, verkoop nie. Hulle mag nie hierdie deel van die land, wat die beste deel is, verkoop of verruil nie. Hierdie grond mag nie aan iemand anders behoort nie, want dit behoort aan My.
15. “Die res van die grondgebied, ’n strook van twaalf en ’n half by twee en ’n half kilometer, moet julle gebruik om die stad op te bou. Hier kan julle huise bou en julle skape laat wei. Julle moet die stad hier bou.
16. Die stad moet twee en ’n kwart kilometer by twee en ’n kwart kilometer wees.
17. Jy moet aan al vier kante ’n strook van 125 meter los waarop julle niks mag bou nie.
18. Buite die stad moet jy ’n gebied los waarop boere hulle vee kan laat wei. Hierdie gebied moet vyf kilometer na die oostekant en vyf kilometer na die westekant van die stad lê, al langs die grond wat jy vir My eenkant gesit het. Hier moet die grond bewerk word sodat die mense wat in die stad bly, genoeg kan hê om te eet.
19. Die mense uit al die verskillende stamme van Israel wat gekom het om in die stad te werk, mag hierdie grond bewerk.
20. Hierdie hele gebied, wat die area insluit wat vir My eenkant gesit is, en die gebied waarop die stad gebou is, sal twaalf en ’n half kilometer by twaalf en ’n half kilometer wees.
21. “Die grond wat oorbly aan die oostekant en aan die westekant van hierdie area moet julle vir die regeerder gee om daarop te maak wat hy wil.
22. Hierdie stuk grond loop tot by die oosgrens van die land en weswaarts tot by die see en lê tussen die gebied van Juda en dié van Benjamin.
23. “Die res van die grond moet aan die stamme gegee word wat oorbly. Elkeen van hulle moet ook ’n strook van die oosgrens af tot by die wesgrens kry. Benjamin se grondgebied lê suid van die regeerder van die land se grond.
24. Suid van Benjamin se grondgebied lê dié van Simeon.
25. Langsaan is die grondgebied van Issaskar, wat ook nes al die ander gebiede van die oostelike grens af tot by die westelike grens strek.
26. Dan kom die gebied van Sebulon.
27. Die gebied van Gad is suid van dié van Sebulon met dieselfde grense na die ooste- en westekant toe.
28. Die suidelike grens van Gad se gebied loop van Tamar af oor die waters van Meriba-Kades met die spruit langs tot aan die Middellandse See.
29. So moet jy die land onder die Israelitiese stamme verdeel,” sê die Here, die God van Esegiël.
30. “Die uitgange uit die stad Jerusalem uit moet soos volg wees: die muur aan die noordelike kant van die stad moet twee en ’n kwart kilometer lank wees.
31. Daar moet drie ingange wees wat elkeen vernoem is na stamme van Israel: Ruben, Juda en Levi.
32. Die ander drie mure om die stad moet elkeen ook twee en ’n kwart kilometer lank wees. Elkeen van hulle moet ook drie ingange na die stad toe hê. Aan die oostekant moet die ingange vernoem word na Josef, Benjamin en Dan.
33. Die ingange aan die suidekant moet vernoem word na Simeon, Issaskar en Sebulon.
34. Die ingange aan die westekant moet vernoem word na Gad, Aser en Naftali.
35. “Die omtrek van die stad moet nege kilometer wees. En die naam van Jerusalem moet van vandag af wees: Die Here is daar!”