1. Leis an daoi a bhaineann dóchas folamh bréagach;cuireann brionglóidí sceitimíní ar ghliogairí.
2. Is cuma muinín a chur i mbrionglóidínó greim a bhreith ar scáileanna nó rith i ndiaidh na gaoithe.
3. Is mar a chéile brionglóid [agus scathán],cosúlacht na gceannaithe os comhair na gceannaithe;
4. Cad a ghlanfar trí mhíghlaine?Cad a fhíorófar trí bhréag?
5. Níl in asarlaíocht, i dtuartha, agus i mbrionglóidí, ach baois,mar speabhraídí mná in íona.
6. Mura seoltar iad mar fhiosrú ón Té is Airde,ná tabhair aird ar bith orthu.
7. Is iomaí duine a mheall brionglóidí,agus theip orthu siúd a chuir a muinín iontu.
8. Comhlíonfar an dlí gan bhréagaireacht,agus is é béal na fírinne a chuireann barr maise ar an eagna.
9. Bíonn a lán ar eolas ag fear mórthaistil,agus labhróidh fear na mórthaithí go ciallmhar.
10. Is beag a bhíonn ar eolas ag an duine gan taithí,ach an té a rinne taisteal bíonn sé ildánach.
11. Is iomaí rud a chonaic mé ar mo chamchuarda,agus fuair mé tuiscint thar mar a fhéadaim a chur i bhfocail.
12. Is minic a bhí mé i mbaol m'anama,ach tháinig mé slán dá mbarr siúd.
13. Mairfidh spiorad lucht eagla an Tiarna,mar tá a ndóchas sa té a fhuasclóidh iad.
14. An té ar a bhfuil eagla an Tiarna, ní bheidh sé cúthail;ní bheidh drochmhisneach air, mar gurb eisean a dhóchas.
15. Is méanar do mheanma an té ar a bhfuil eagla an Tiarna;cé air a bhfuil sé ag brath? cé is taca dó?
16. Tá súile an Tiarna orthu siúd a thugann grá dó;Is dídean thréan é agus teannta láidir;is fothain é ón ngaoth the agus scáth ó ghrian an mheanlae,is cosaint é ar an mbarrthuisle agus lámh chunta in aghaidh titim.
17. Ardaíonn sé an t‑anam agus tugann solas do na súile;bronnann sé leigheas agus beatha agus beannacht.
18. Muga maga is ea íobairt d'ofráil a fuarthas go héagórach;ní dual glacadh le bronntanas na gcoirpeach.
19. Ní gean leis an Té is Airde ofrálacha na n‑éagráifeach,agus ní dhéanann raidhse ofrálacha leorghníomh leis i bpeacaí.
20. Is cuma nó mac a bhású os comhair súile a athar,íobairt a ofráil as cuid na mbocht.
21. Beagán bia is beatha don bhocht,agus an té a thógann chun siúil é, is lámh dhearg é.
22. An té a bhaineann a shlí bheatha dá chomharsa, maraíonn sé é;an té a bhaineann a thuarastal den fhear oibre, doirteann sé fuil.
23. Má thógann duine ach go leagann duine eile,cad a bhíonn dá bharr acu ach a dhua?
24. Má ghuíonn duine ach go mallaíonn duine eile,cén glór lena n‑éistfidh an máistir?
25. Má níonn duine é féin tar éis baint le corpán,ach go mbaineann sé leis arís,cad a bhíonn aige de bharr a ionlaithe?
26. Sé an dála céanna é ag an té a dhéanann troscadh ar son a pheacaí,má imíonn sé agus na peacaí céanna a dhéanamh arís,cé thabharfaidh cluas dá ghuí,agus cad a bheidh aige de bharr a umhlaithe?