1. Molaimis anois fir chailiúla,na sinsir a bhí againn ó aois go haois.
2. [Thug] an Tiarna glóir mhór dóibh;tríothu a d'fhoilsigh sé a mhórgacht riamh anall.
3. Bhí ardfhlaitheas ag cuid acu ar a ríochtaíagus thuill siad clú de bharr a gcumais;bhí comhairleoirí críonna ina measc freisin,a thug oracail fháidhiúla uathu,
4. Agus fir a thug treoir don phobal lena moltaí,de thoradh a dtuisceana ar léann a muintire,agus le briathra ciallmhara a dteagaisc.
5. Bhí cuid acu ina gcumadóirí ceolta binne,agus bhreacaidís laoithe ar phár.
6. Fir shaibhre chumhachtacha ab ea cuid eile fós acu,a chaith a saol go síochánta ina n‑áitribh féin.
7. Thugadh lucht a gcomhaimsire ómós do na fir seo uile,agus ba mhór é a gclú lena ré.
8. D'fhág cuid acu dea-cháil ina ndiaidh,sa chaoi go moltar go haer iad go fóill.
9. Tá daoine eile ann, áfach, nach bhfuil aon chuimhne orthu anois,a chuaigh ar ceal faoi mar nach mbeidís riamh ann;tá siad faoi mar nár rugadh riamh iadagus is é an dála céanna é ag a gclann ina ndiaidh.
10. Ach fir dhiaganta ab ea na fir seo leanas,nach ndearnadh dearmad ar a ndea-oibreacha riamh.
11. Mairfidh a gconách ag a sliocht,agus a n‑oidhreacht [ag sliocht a sleachta].
12. Seasann a sliocht leis na conarthaí,agus, a bhuíochas orthu, cloíonn sliocht a sleachta leo chomh maith.
13. Mairfidh a sliocht go brách,agus ní thiocfaidh meath ar a nglóir.
14. Cuireadh a gcoirp faoi shuan san úir,ach maireann a gcáil ó ghlúin go glúin.
15. Fógróidh na ciníocha a gcuid eagnaíochta,agus déanfaidh an comhthionól iad a mholadh go hard.
16. Bhí gnaoi an Tiarna ar Eineoc agus tógadh in airde é,sampla aithrí do na glúine go léir.
17. Fuarthas Naoi foirfe gan cháim;in uain na feirge rinneadh de an [ceap];trídsean a caomhnaíodh iarmhar ar talamhnuair a tháinig an díle.
18. Rinneadh conarthaí síoraí leis,nach scriosfaí an uile fheoil le díle go brách arís.
19. Ba athair mhórán ciníocha é Abrahám,agus ní bhfuarthas aon duine mar é i nglóir.
20. Chomhlíon sé dlí an té is Airde,agus chuaigh i gceangal conartha leis;dhaingnigh sé an conradh ina fheoil féin,agus nuair a promhadh é, chruthaigh sé dílis.
21. Uime sin gheall an Tiarna de bhrí na mionngo mbeannófaí na ciníocha ina shíol;go gcuirfeadh sé an rath air mar luaithreach na talún,go mórfadh sé a shliocht dála na réaltaí,go dtabharfadh sé an talamh mar oidhreacht dóibhó mhuir go muir,agus ón abhainn go críocha na cruinne.
22. Thug sé an gheallúint chéanna d'Íosác,ar son a athar Abrahám.
23. Chuir sé beannacht an uile dhuine agus an conradhag lonnú ar cheann Iacóib;thug sé aitheantas dó lena bheannachtaí,agus thug dó [an talamh] mar oidhreacht;roinn sé é ina chodanna,agus dháil sé é ar an dá threibh déag.