1. ‘Ua fa‘apea ‘ona fetalai mai o le ALI‘I i le fānauga a Amoni:E leai ‘ea ni atali‘i o Isaraelu?E leai ‘ea sona suli?Se a fo‘i le mea ‘ua fai ai Kato e Malekama mōna,‘ua nonofo fo‘i ona tagata i ona ‘a‘ai?
2. O le mea lea fa‘auta, e o‘o ai i ona po,‘ua fetalai mai ai le ALI‘I,‘ou te fa‘afa‘alogoina le ‘alaga o le tau‘a i Rapa,o le ‘a‘ai o le fānauga a Amoni;e fai ia ma mea mautietie,o le fa‘atafunaga lava,e susunuina ona faoa ‘a‘ai i le afi;‘ona fai ai lea e Isaraelu o i latou mōna,o ē sa fai o ia mo i latou,‘ua fetalai mai ai le ALI‘I.
3. Hesepona e, ‘inā uiō ia,auā ‘ua fa‘atafunaina o Ai;‘inā ‘alalaga ia ‘outou tama fafine o Rapa,‘inā lavalava ia o ‘outou i ‘ie talatala;‘inā taufaitagitu‘i ia, ma fetaufetulia‘i i ‘aupā;auā e alu Malekama i le tāfeaga,o ona ositaulaga ‘atoa ma ona ali‘i fa‘atasi ma ia.
4. Se a le mea ‘ua e mitamita ai i vanu,o lou vanu ‘ua tafe, o oe na le tama fafine ‘ua liliu ‘ese?O lē fa‘atuatua i ana ‘oloa, ‘ua fa‘apea mai,“O ai ‘ea e sau ‘iā te a‘u?”
5. ‘Ua fetalai mai le Ali‘i, o le ATUA o ‘au,Fa‘auta, ‘ou te fa‘ao‘o ‘iā te oe le mata‘u,mai ‘iā te i latou o i ou itū uma lava;e tulia fo‘i ‘outou e ta‘ito‘atasi i le mea ‘ua i ona luma;e leai fo‘i se tasi e fa‘apotopoto i ē ‘ua sōsōla.
6. E mulimuli ane ‘ona ‘ou fa‘afoisia mai lea o le tāfeaga o le fānauga a Amoni, ‘ua fetalai mai ai le ALI‘I.
7. O lo‘o fa‘apea ‘ona fetalai mai o le ALI‘I o ‘au ‘iā Etoma:E lē toe ai ‘ea se poto i Timanu?‘Ua fano ‘ea le fa‘autauta a‘i tagata mafaufau?‘Ua mavae ‘ea lo latou poto?
8. O ‘outou o ē nonofo i Titana,‘inā sōsōla ia ‘outou, ‘inā liliu ia,‘ia ‘outou nonofo i mea maulalo;auā ‘ou te fa‘ao‘o le malaia o Esau i ona luga,o ona po lava ‘ou te taui atu ai ‘iā te ia.
9. ‘Ana ō atu ‘iā te oe o ē tau vine,po ‘ua latou le fa‘atotoe ‘ea ni toe fuifui vine?‘Ana ō atu ‘iā te oe o ē gaoi i le po,po ‘ua latou le fa‘aumatia ‘ea mea e tusa ‘iā i latou?
10. Auā ‘ua ‘ou su‘ena Esau,‘ua ‘ou fa‘aalia fo‘i ana mea lilo,na te lē mafaia ‘ona lafi;‘ua fa‘aumatia lana fānau ma ona usoma i latou sa tuā‘oi ma ia;o ia fo‘i ‘ua leai.
11. ‘Inā tu‘ua ia au tama ‘ua aumatuā,‘ou te fa‘aola ‘iā te i latou;‘ia fa‘atuatua mai fo‘i ‘iā te a‘uou fafine ‘ua oti a latou tane.
12. Auā o lo‘o fa‘apea ‘ona fetalai mai o le ALI‘I: Fa‘auta, o i latou e lē tatau ‘ona latou inu i le ipu, ‘ua latou inu ai lava; a o oe, e fa‘asaoina ‘ea oe? E lē fa‘asaoina lava oe, auā ‘e te matuā inu lava.
13. Auā ‘ou te tautō lava a‘u ‘iā te a‘u, ‘ua fetalai mai ai le ALI‘I, e fai lava Posara ma mea e ofo ai, ma fai a‘i luma ma mea gaogao ma fa‘afanoga; e fai fo‘i ona ‘a‘ai uma ma fa‘atafunaga e fa‘avavau.
14. ‘Ua ‘ou fa‘alogo i le tala mai le ALI‘I,‘ua ‘auina atu fo‘i le sāvali i nu‘u ‘ese,‘ua fa‘apea atu: “‘Inā fa‘apotopoto ia ‘outouma ‘ia ‘outou ō mai ‘iā te ia,ma ‘ia tula‘i atu ‘outou e tau ai le tau‘a.”
15. Auā fa‘auta, ‘ua ‘ou faia oe ‘ia fa‘atauva‘a i nu‘u,‘ia ‘inosia oe e tagata.
16. O lou mata‘utia ma le fa‘amaualuga o lou loto‘ua fa‘asesēina ai oe,o oe o lo‘o nofo i ana o le papa,o lē ‘ua nofoia ai le mea maualuga o le mauga;e ui ‘ina maualuga le mea ‘e te tu‘u ai lou ōfaga e pei o le aeto,‘ou te lafo ‘iā te oe i lalo i lea mea,o lo‘o fetalai mai ai le ALI‘I.
17. E fai fo‘i Etoma ma fa‘atafunaga; o i latou uma e ui ane ai e ta‘itasi ma ofo ma uisa i ona mala uma.
18. E pei o le fa‘aumatia o Sotoma mo Komoro ma ē sa latou tuā‘oi, o lo‘o fa‘apea mai ai le ALI‘I, e lē nofo ai se tasi i lea mea, e lē mau ai fo‘i se atali‘i o se tagata.
19. Fa‘auta, e alu a‘e o ia e pei o le leona a‘i le matagofie o Ioritana, i le mea malosi e mau ai; auā ‘ou te fa‘aoso ‘iā te ia ‘ia fa‘avave ‘ona alu ‘ese o ia ‘iā te ia, e pei o le ‘emo o le mata; o ai fo‘i le tagata filifilia ‘ou te tofia e tau ma ia? auā po o ai ‘ea e tusa ma a‘u? O ai fo‘i e ‘atofa ni aso ‘iā te a‘u? O ai fo‘i lenā leoleo mamoe e mafai ‘ona tu i o‘u luma?
20. O le mea lea ‘ia ‘outou fa‘alogologo mai ai i le pule a le ALI‘I ‘ua ia pule ai ‘iā Etoma ma ona mafaufauga ‘ua ia mafaufau ai ‘ia leaga ai ē o nonofo i Timanu, E moni, e tōsina i latou e lē aupito itiiti o le lafu mamoe; e moni, na te fa‘atafunaina i o latou luga le mea latou te mau ai.
21. O le ta‘alili o lo latou pāū ‘ua lūlūina ai le lalolagi; o le leo fo‘i o lona ‘alaga ‘ua lagona lea i le sami Ulaula.
22. Fa‘auta, e alu a‘e o ia ma lele e pei o le aeto, e fālō fo‘i e ia ona ‘apa‘au i luga o Posara; e ‘avea fo‘i loto o toa o Etoma i lea lava aso, e pei o le loto o le fafine ‘ua fa‘atigā.
23. O le ‘upu ‘iā Tamaseko.‘Ua fa‘amāina Amato ma Arepa;auā ‘ua latou fa‘alogo i le tala leaga;‘ua liu suāvai i latou;o lo‘o i le sami le atuatuvale;e lē mafai ‘ona to‘a filemū.
24. ‘Ua fa‘avaivai Tamaseko,‘ua liliu o ia a sola,‘ua maua o ia i le mata‘u;‘ua maua fo‘i o ia i le puapuagā ma le fa‘atigā,e pei o le fafine o le a fānau.
25. Pe fa‘apefea ‘ona lē tu‘uale ‘a‘ai sa vi‘ia, le ‘a‘ai na ‘ou fiafia i ai?
26. O le mea lea e pa‘u‘ū ai ona taulele‘a i ona malae,e fano fo‘i i lea lava aso ona tagata tau uma,‘ua fetalai mai ai le ALI‘I o ‘au.
27. ‘Ou te fa‘amū fo‘i le afi i le pā o Tamaseko,e fa‘aumatia ai fo‘i maota o Peniata.
28. O lo‘o fa‘apea ‘ona fetalai mai o le ALI‘I‘iā Kitara ma mālō o Hasora,ē na fasia e Nepukanesa le tupu o Papelonia:‘Inā tula‘i ia ‘outou,‘ia ō a‘e i Kitara ma ‘ia ‘outou fa‘aumatia tagata i sasa‘e.
29. Latou te faoa o latou fale ‘ie ma o latou lafu mamoe;latou te ‘avea fo‘i mo i latou o latou ‘ie puipuima a latou mea uma ma a latou kamela;e ‘alalaga fo‘i i latou ‘ona o i latou,“O i ai le mata‘u i itū uma.”
30. O ‘outou o ē nonofo i Hasora,‘inā sōsōla ia, ‘ia ‘outou matuā sōsōla lava,‘ia ‘outou nonofo i mea maulalo,o lo‘o fetalai mai ai le ALI‘I.Auā ‘ua pulea ‘outou e Nepukanesa le tupu o Papelonia,‘ua na mafaufau fo‘i i se togafiti e leaga ai ‘outou.
31. ‘Inā tula‘i ia ma ‘ia ‘outou ō a‘e i le nu‘u ‘ua filemū,o ē nonofo fa‘atalanoa,‘ua fetalai mai ai le ALI‘I,E leai ni o latou puipui, e leai fo‘i ni fa‘amau fa‘alava,‘ua nonofo i latou na o i latou lava.
32. O a latou kamela fo‘i e fai ia ma vetema a latou lafu e tele e fai ma mea faoa.‘Ou te fa‘ata‘ape‘apeina fo‘ii mata matagi uma o i latou o ē sala a latou pito ‘ava;‘ou te ‘aumaia fo‘i lo latou malaia ai ona itū uma,o lo‘o fetalai mai ai le ALI‘I.
33. E fai fo‘i Hasora ma mea e fale ‘ai ai luko,o le fa‘atafunaga e o‘o i le fa‘avavau.E lē nofo ai se tagata i lea mea,e lē mau ai fo‘i se atali‘i o se tagata.
34. O le afioga a le ALI‘I na o‘o mai ‘iā Ieremia le perofeta ‘iā Elama, i le amataga o le nofoa‘iga a Setekaia le tupu o Iuta, ‘ua fa‘apea mai,
35. O lo‘o fa‘apea ‘ona fetalai mai o le ALI‘I o ‘au: Fa‘auta, ‘ou te gausia le ‘aufana a Elama, o le mea sili lea e malolosi a‘i i latou.
36. ‘Ou te ‘aumaia fo‘i matagi e fa mai itū e fa o le lagi i luga o Elama ma ‘ou fa‘ata‘ape‘apeina i latou i ia matāmatagi uma; e leai fo‘i se nu‘u e lē o‘o atu i ai tagata Elama ‘ua tulia.
37. ‘Ou te fa‘amatata‘u fo‘i Elama i luma o ē ita mai ‘iā te i latou ma luma o ē sā‘ili e fasioti ‘iā te i latou; ‘ou te fa‘ao‘o le malaia i o latou luga, o lo‘u ita tele, ‘ua fetalai mai ai le ALI‘I; ‘ou te ‘aveina atu fo‘i le pelu e mulimuli atu ‘iā te i latou, se‘ia ‘ou fa‘aumatia i latou.
38. ‘Ou te tu‘uina lo‘u nofoāli‘i i Elama, ‘ou te fa‘aumatia fo‘i i lea mea le tupu ma ali‘i, ‘ua fetalai mai ai le ALI‘I.
39. ‘Ae o‘o i ona po amulī, ‘ona ‘ou fa‘afoisia mai ai lea o le tāfeaga a Elama, ‘ua fetalai mai ai le ALI‘I.#