1. ‘Ua fa‘apea ‘ona fetalai mai o le ALI‘I: Alu ia, ‘ia e sā‘ili se fagu ‘omea a le fai ipu ‘omea, tou te ō fo‘i ma nisi toeaina o le nu‘u ma nisi toeaina o le ‘au ositaulaga;
2. ma ia alu atu i le vanu o le atali‘i o Hinoma, i le mea e ui ai i le faitoto‘a o le fai ipu ‘omea ma ‘ia e tala‘i atu i lea mea o ‘upu ‘ou te fai atu ai ‘iā te oe.
3. ‘Ia e fa‘apea atu: O ‘outou tupu o Iuta ma ē o nonofo i Ierusalema, ‘ia ‘outou fa‘alogologo mai i le afioga a le ALI‘I; o lo‘o fa‘apea ‘ona fetalai mai o le ALI‘I o ‘au, le Atua o Isaraelu, Fa‘auta, ‘ou te fa‘ao‘o mai le malaia i lenei mea, e ta‘itasi uma o ē fa‘alogologo ai ma ta‘alili ai ona taliga.
4. Auā ‘ua latou tu‘ua a‘u, ‘ua latou liua fo‘i lenei mea ma ‘ua latou fa‘amū a‘i mea manogi i atua ‘ese na latou lē iloa, o i latou, po o latou tamā, po o tupu o Iuta; ma ‘ua latou fa‘atumuina lenei mea i le toto o ē le sala.
5. ‘Ua faia e i latou o mea maualuluga a Paala e susunu ai a latou fānau i le afi e fai ma taulaga mū ‘iā Paala; o le mea na ‘ou le poloa‘i atu ai, pe fai atu ai, ‘ou te le‘i manatu fo‘i i ai.
6. O le mea lea fa‘auta, o le a o‘o mai ai ona po, o lo‘o fetalai mai ai le ALI‘I, e lē toe igoa ai lea mea o Tofeta, po o le vanu o le atali‘i o Hinoma, a o le vanu o le fasi.
7. ‘Ou te fa‘alēaogāina le pule a Iuta ma Ierusalema i lenei mea; ‘ou te tu‘uina fo‘i i latou ‘ia fasia i le pelu i luma o ē ita ‘iā i latou ma lima o ē sā‘ili‘ili ‘iā i latou ‘ia oti; ‘ou te tu‘uina atu fo‘i o latou tino ‘ua oti e fai ma mea e ‘ai a manu felelei ma manu e tata‘a.
8. ‘Ou te fai fo‘i lenei ‘a‘ai ma fa‘atafunaga ma mea e uisa ai; o i latou uma e ui ane ai e ta‘itasi ma ofo ma uisa i ona mala uma.
9. ‘Ou te fagaina i latou i tino o latou atali‘i ma tino o latou afafine, e ta‘itasi fo‘i o i latou ma ‘ai i le tino o le tasi ‘ina ‘ua si‘osi‘oina ma tigāina e fa‘atigāteleina ai i latou e i latou ‘ua ita mai ma ē ‘ua sā‘ili ‘iā i latou ‘ia oti.
10. ‘Ona e nutilili‘i ai lea o le fagu i luma o tagata latou te ō ma oe,
11. ma e fai atu ‘iā te i latou: O lo‘o fa‘apea ‘ona fetalai mai o le ALI‘I o ‘au, E fa‘apea lava ‘ona ‘ou nutilili‘i i lenei nu‘u ma lenei ‘a‘ai, e pei ‘ona nutilili‘i e se tasi le ipu a le fai ipu ‘omea, e lē mafai ‘ona toe faia; e tanumia fo‘i i latou i Tofeta se‘ia le toe i ai se mea e tanu ai.
12. E fa‘apea ‘ona ‘ou faia i lenei nu‘u ma ē o nonofo ai, o lo‘o fetalai mai ai le ALI‘I ma ‘ou faia lenei ‘a‘ai ‘ia pei o Tofeta;
13. e ‘avea fo‘i fale o Ierusalema ma maota o tupu o Iuta, e pei o le mea e ta‘ua o Tofeta, ‘ua leaga ia auā ‘ua latou fa‘amū mea manogi i luga o latou fale uma i ‘au uma o le lagi ma ‘ua latou liligi atu taulaga i mea e inu i atua ‘ese.
14. ‘Ona sau ai lea o Ieremia mai Tofeta na ‘auina atu ai o ia e le ALI‘I e vavalo ai; na tu o ia i le lotoā o le fale o le ALI‘I, ma ‘ua fai atu i le nu‘u uma.
15. ‘Ua fa‘apea ‘ona fetalai mai o le ALI‘I o ‘au, le Atua o Isaraelu: Fa‘auta, ‘ou te fa‘ao‘o mai i lenei ‘a‘ai ma ona faoa ‘a‘ai uma le malaia uma na ‘ou fai atu ai; auā ‘ua latou fa‘ama‘a‘a o latou ua, ‘ina ‘ia latou le fa‘alogologo ai i a‘u ‘upu.