Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36
  37. 37
  38. 38
  39. 39
  40. 40
  41. 41
  42. 42
  43. 43
  44. 44
  45. 45
  46. 46
  47. 47
  48. 48
  49. 49
  50. 50
  51. 51
  52. 52

Feagaiga Tuai

Feagaiga Fou

Ieremia 33 O LE TUSI PA'IA - Ekalesia Katoliko Roma (RSCB)

O le Fo‘i mai o le Tāfeaga

1. Na o‘o mai fo‘i le afioga a le ALI‘I ‘iā Ieremia, o le atu lua lea, a o puipuia pea o ia i le lotoā o le fale puipui, ‘ua fa‘apea mai,

2. O lo‘o fa‘apea ‘ona fetalai mai o le ALI‘I lē na te faia, o le ALI‘I lē na te saunia, ‘ina ‘ia fa‘atumauina; o le ALI‘I o lona suafa lea:

3. ‘Ia e vala‘au mai ‘iā te a‘u, ‘ona ‘ou tali atu ai lea ‘iā te oe, ma ‘ou fa‘aali atu ‘iā te oe o mea tetele ma le faigatā, o mea ‘ua e lē iloa.

4. Auā o lo‘o fa‘apea ‘ona fetalai mai o le ALI‘I, le Atua o Isaraelu, i fale o lenei ‘a‘ai ma fale o tupu o Iuta, ‘ua sōloia i mea mauti‘eti‘e ma le pelu;

5. ‘ua latou ō mai e tau ma Kaletaia ma fa‘atumu ‘iā te i latou i tino o tagata oti e ‘ua fasia e a‘u i lo‘u tigā ma lo‘u ita, auā ‘ua ‘alo o‘u mata i lenei ‘a‘ai, ‘ona o a latou amio leaga uma.

6. Fa‘auta, ‘ou te faia se fusi o lona ma‘i ma se togafiti e mālōlō a‘i; ‘ou te fa‘amālōlō lava ‘iā te i latou ma ‘ou fa‘aali atu ‘iā te i latou le silisili o le manuia ma le fa‘amaoni.

7. ‘Ou te fa‘afoisia fo‘i le tāfeaga o Iuta ma le tāfeaga o Isaraelu ma ‘ou atiina a‘e i latou e pei o anamua.

8. ‘Ou te fa‘amamā ‘iā te i latou ‘iā latou amioletonu uma, na latou agasala ai ‘iā te a‘u; ‘ou te fa‘amāgalo ‘iā latou amioletonu uma, na latou agasala ai ‘iā te a‘u ma latou fouvale ai ‘iā te a‘u.

9. E fai fo‘i i latou ma igoa fiafia ‘iā te a‘u, e fai fo‘i ma vi‘iga ma matagofie i nu‘u uma o le lalolagi, o ē fa‘alogo i mea lelei uma ‘ou te faia ‘iā te i latou; latou te fefefe fo‘i ma latou gatete, auā o mea lelei uma, i le ma le manuia uma ‘ou te faia mo i latou.

10. O lo‘o fa‘apea ‘ona fetalai mai o le ALI‘I: E toe lagona i lenei mea ‘ua ‘outou fa‘apea mai ai: “‘Ua fa‘atafunaina ia, e lē o i ai se tagata, e lē o i ai fo‘i se manu,” o ‘a‘ai o Iuta, o ala fo‘i o Ierusalema o lo‘o fa‘atafunaina nei, e lē o i ai se tagata, e leai fo‘i sē nofo ai, e lē o i ai fo‘i se manu,

11. e lagona ai le leo fiafia ma le leo ‘oli‘oli, o le leo o le fa‘ato‘āfaiavā ma le leo o le fa‘ato‘ānofotane, o le leo o ē fai mai:“‘Ia ‘outou vivi‘i atu i le ALI‘I o ‘au,auā e lelei le ALI‘I, auā e fa‘avavau lava lona alofa;o i latou ia o ē avatua le taulagafa‘ane‘ene‘e i le fale o le ALI‘I.”Auā ‘ou te fa‘afoisia le tāfeaga o le nu‘u, e pei o anamua, ‘ua fetalai mai ai le ALI‘I.

12. O lo‘o fa‘apea ‘ona fetalai mai o le ALI‘I o ‘au: O lenei mea, o lo‘o fa‘atafunaina nei, e lē o i ai se tagata po o se manu ma ona ‘a‘ai uma, e i ai mea e nonofo ai leoleo mamoe, o ē ‘ave i ai lafu mamoe e ta‘oto ai.

13. E toe ui ane lafu mamoe i lalo o lima o lē na te faitaulia, o lo‘o fetalai mai ai le ALI‘I, i ‘a‘ai i atu mauga ma ‘a‘ai i le itū maulalo ma ‘a‘ai i le itū i saute, i le nu‘u fo‘i o Peniamina ma mea e vagavagai i Ierusalema ma ‘a‘ai o Iuta.

14. Fa‘auta, e o‘o lava i ona aso, o lo‘o fetalai mai ai le ALI‘I, ‘ou te fa‘ataunu‘uina ai le ‘upu lelei na ‘ou folafolaina i le ‘āiga o Isaraelu ma le ‘āiga o Iuta.

15. O ia ona po ma lenā lava tausaga, ‘ou te fa‘atupuina ai ‘iā Tavita o le La la‘au amiotonu; e faia fo‘i e ia le fa‘amasinoga ma le amiotonu i le nu‘u.

16. O ona po ia e fa‘aolaina ai Iuta, e nofo ai fo‘i Ierusalema ma le filemū; o le igoa fo‘i lenei e ta‘ua ai o ia, “O LE ALI‘I LA TATOU AMIOTONU.”

17. Auā o lo‘o fa‘apea ‘ona fetalai mai le ALI‘I, E le motu le gafa o Tavita i le nofoāli‘i o le ‘āiga o Isaraelu;

18. e le motu fo‘i i o‘u luma le gafa o le ‘au ositaulaga, o sa Levī, e osi ai taulaga mū ma susunu taulaga i mea e ‘ai ma osi taulaga i aso uma.

19. Na o‘o mai fo‘i le afioga a le ALI‘I ‘iā Ieremia, ‘ua fa‘apea mai:

20. O lo‘o fa‘apea ‘ona fetalai mai o le ALI‘I: ‘Āfai tou te mafaia ‘ona lepeti i la‘u feagaiga ma le ao ma la‘u feagaiga ma le po, ‘ina ‘ia lē toe ai se ao po o se po i ona lava itū aso;

21. ‘ona mafai ai lea ‘ona lepeti o la‘u feagaiga ma Tavita la‘u ‘au‘auna, ‘ina ‘ia lē ‘iā te ia se atali‘i e fai ma tupu i lona nofoāli‘i; ‘atoa fo‘i ma sa Levī, le ‘au ositaulaga, o a‘u ‘au‘auna.

22. E pei ‘ona lē mafaitauina o ‘au o le lagi ma ‘ona lē māfuatia le oneone o le sami; e fa‘apea ‘ona ‘ou fa‘ato‘ateleina o le fānau a Tavita la‘u ‘au‘auna ma sa Levī o ē ‘au‘auna ‘iā te a‘u.

23. Na o‘o mai fo‘i le afioga a le ALI‘I ‘iā Ieremia, ‘ua fa‘apea mai,

24. ‘E te lē iloa ‘ea mea ‘ua tautala ai lenei nu‘u, ‘ua fa‘apea, “O ‘āiga e lua na filifilia e le ALI‘I, ‘ua lafoa‘iina i latou e ia?” ‘Ua latou ‘ino‘ino fo‘i i lo‘u nu‘u, ‘ina ‘ia lē toe fai ma nu‘u i o latou luma.

25. O lo‘o fa‘apea ‘ona fetalai mai o le ALI‘I: ‘Āfai ‘ua leai sa‘u feagaiga ma le ao ma le po, ‘āfai fo‘i ‘ua lē faia e a‘u tulafono i le lagi ma le lalolagi;

26. ‘ona lafoa‘iina lea e a‘u o le fānau a Iakopo, ma Tavita la‘u ‘au‘auna, ‘ou te lē ‘ave fo‘i nisi o ana fānau e fai ma ali‘i e pule i le fānau a Aperaamo, ma Isaako ma Iakopo; auā ‘ou te fa‘afoisia mai lo latou tāfeaga ma ‘ou alofa atu ‘iā te i latou.