1. ‘Oi talofa i le ‘au leoleo mamoe o ē ‘ua fano ai ma fa‘ata‘ape‘apeina mamoe na ‘ou fagaina! o lo‘o fetalai mai ai le ALI‘I.
2. O le mea lea ‘ua fa‘apea ‘ona fetalai mai ai o le ALI‘I le Atua o Isaraelu i le ‘au leoleo mamoe o ē leoleo i lo‘u nu‘u: ‘Ua ‘outou fa‘ata‘ape‘apeina la‘u lafu mamoe ma tulia i latou ma ‘ua lē asiasi ‘iā te i latou; fa‘auta, ‘ou te taui atu ‘iā te ‘outou ‘ona o le leaga o a ‘outou amioga, o lo‘o fetalai mai ai le ALI‘I,
3. ‘Ou te fa‘apotopoto fo‘i i ē totoe o la‘u lafu mamoe mai nu‘u uma na ‘ou tulia ai i latou ma ‘ou toe fa‘afo‘i mai ‘iā te i latou i o latou lotoā; latou te fanafānau ai ma uluola ai.
4. ‘Ou te tofia fo‘i mo i latou o leoleo mamoe e leoleo ‘iā te i latou; latou te lē toe fefefe, latou te lē matata‘u fo‘i, e leai so latou e lē iloa o lo‘o fetalai mai ai le ALI‘I.
5. Fa‘auta, e o‘o mai ona aso, o lo‘o fetalai mai ai le ALI‘I, ‘ou te fa‘atupuina ai mo Tavita le La la‘au amiotonu, e pule fo‘i le Tupu, e manuia o ia, e faia fo‘i e ia le fa‘amasinoga ma le amiotonu i le lalolagi.
6. O lana nofoa‘iga e fa‘aolaina ai Iuta, e nofo fo‘i Isaraelu ma le filemū; o le suafa fo‘i lenei e ta‘ua ai o ia, “O LE ALI‘I LA TATOU AMIOTONU.”
7. O le mea lea fa‘auta, o lo‘o fetalai mai ai le ALI‘I, e o‘o mai ona po e lē toe fai ane ai tagata, “O lo‘o soifua le ALI‘I, o lē na ‘aveina a‘e le fānauga a Isaraelu nai le nu‘u o Aikupito;”
8. ‘ae “fa‘apea, o lo‘o soifua le ALI‘I, o lē na ‘aveina a‘e ma lē na ‘aumaia le fānau a le ‘āiga o Isaraelu mai le nu‘u i le itū i matū ma nu‘u uma na a‘u tulia ai i latou;” e nonofo, fo‘i i latou i lo latou lau‘ele‘ele.
9. ‘Ua momomo lo‘u loto i totonu ‘iā te a‘u ‘ona o perofeta;‘ua gatete o‘u ivi uma;‘ua ‘avea a‘u e pei o le tagata ‘onā,e pei o le tagata ‘ua faia‘ina i le uaina,‘ona o le ALI‘I ma ana afioga pa‘ia.
10. Auā ‘ua tumu le nu‘u i ē mulilulua;auā ‘ua fa‘anoanoa le nu‘u ‘ona ‘ua fa‘afanoina.‘Ua magumagu mea i le vao e tata‘a ai manu,auā ‘ua leaga lo latou taufetuliga,‘ua lē tonu fo‘i lo latou malosi.
11. Auā o perofeta ‘atoa ma ositaulaga ‘ua fa‘alēmata‘u i latou;‘ua iloa e a‘u la latou amio leaga i lo‘u lava fale,o lo‘o fetalai mai ai le ALI‘I.
12. O le mea lea e ‘avea ai lo latou ala ‘iā te i latoue pei o mea mase‘ese‘e i le pouliuli;e tulia i latou ma latou pa‘u‘ū i ai.Auā ‘ou te fa‘ao‘oina le malaia i luga ‘iā te i latou,o le tausaga lea e asiasia mai ai i latou,o lo‘o fetalai mai ai le ALI‘I.
13. ‘Ua ‘ou iloa le fa‘avalea o perofeta o Samaria;‘ua latou vavalo i le igoa o Paalama fa‘asesēina lo‘u nu‘u o Isaraelu.
14. ‘Ua ‘ou iloa fo‘i le mea e ‘inosia i perofeta o Ierusalema;‘ua latou mulilulua, ma sāvavali ma le pepelo.‘Ua fa‘amalolosia fo‘i e i latou lima o ē amio leaga,‘ina ‘ia lē toe fo‘i mai se tasi a‘i lana amio leaga.‘Ua ‘avea i latou uma ‘iā te a‘u e pei o Sotoma,ma ē o nonofo ai e pei o Komoro.
15. O le mea lea ‘ua fa‘apea ‘ona fetalai mai ai o le ALI‘I o ‘au i perofeta,“Fa‘auta, ‘ou te fafaga ‘iā te i latou i le laena,ma fa‘ainu ‘iā te i latou i vai ‘o‘ona.Auā o perofeta o Ierusalema,‘ua o‘o atu ai le amio fa‘alēmata‘u i le nu‘u uma.”
16. O lo‘o fa‘apea ‘ona fetalai mai o le ALI‘I o ‘au: ‘Aua tou te fa‘alogologo i ‘upu a perofeta o ē vavalo ‘iā te ‘outou; ‘ua latou fa‘asesē ‘iā te ‘outou e fai mea fa‘atauva‘a; ‘ua latou tautala atu i le fa‘aaliga mai o latou lava loto, ‘ae lē mai le fofoga o le ALI‘I.
17. O lo‘o tautala atu pea i latou i ē ‘ino‘ino mai ‘iā te a‘u, O lo‘o fetalai mai ai le ALI‘I, “E manuia ‘outou;” ma ‘ua latou fa‘apea atu ‘iā te i latou uma o ē sāvavali e tusa ma le finau vale o latou loto, “E lē o‘o ‘iā te ‘outou se malaia.”
18. A o ai ‘ea ‘ua tu atu a o fai le pule a le ALI‘I,ma ‘ua iloa ma fa‘alogologo i lana afioga?Po o ai ‘ua ua‘i atu ona taligai ana afioga ma fa‘alogologo i ai?
19. Fa‘auta, ‘ua alu atu le afā mai le ALI‘I i le to‘asā,o le afā fulifaō; e pesi tetele mai i luga o ulu o ē amio leaga.
20. E lē toe liliu le to‘asā o le ALI‘I, se‘ia faia e ia,se‘ia fa‘ataunu‘uina fo‘i e ia manatu o lona finagalo;tou te matuā mafaufau i ai i aso amulī.
21. ‘Ua ‘ou lē ‘a‘auina atu o ia perofeta,a ‘ua latou taufetuli;‘ua ‘ou lē tautala atu ‘iā te i latou,a ‘ua latou vavalo.
22. ‘Ae ‘āfai ‘ana latou tutū mai a o fai la‘u pule,po ‘ua latou fa‘ailoa atu a‘u ‘upu i lo‘u nu‘uma latou fa‘afo‘i ‘iā te i latoua‘i o latou ala leaga ma le leaga o a latou amioga.
23. O a‘u ‘ea o le Atua e latalata, ‘ae lē o le Atua e mamao? o lo‘o fetalai mai ai le ALI‘I.
24. Pe mafai ‘ea e se tagata ‘ona lafi i mea lilo, ‘ou te lē iloa ai o ia? o lo‘o fetalai mai ai le ALI‘I. E lē o tūtūmu ‘ea le lagi ma le lalolagi ‘iā te a‘u? o lo‘o fetalai mai ai le ALI‘I.
25. ‘Ua ‘ou fa‘alogo i mea ‘ua fai atu ai perofeta, o ē ‘ua vavalo ma le pepelo i lo‘u igoa, ‘ua fa‘apea atu, “‘Ua fai la‘u miti, ‘ua fai la‘u miti.”
26. E i ai lenei mea se‘ia afea i loto o perofeta, o ē vavalo mai ma le pepelo, o perofeta lava i latou o le pepelo ‘ua i o latou loto?
27. O lo‘o manatu i latou ‘ia fa‘agaloina e lo‘u nu‘u o lo‘u igoa ‘iā latou miti ‘ua latou talatala atu ai o le tasi i le tasi, e pei ‘ona fa‘agalogalo ē o latou tamā o lo‘u igoa ‘ona o Paala.
28. O le perofeta ‘ua na fai le miti, ‘ia talatala atu lana miti; ma lē ‘ua ‘iā te ia la‘u ‘upu, ‘ia talatala atu e ia la‘u ‘upu ma le fa‘amaoni. E tusa ‘ea le ‘au o saito i le fua o le saito? o lo‘o fetalai mai ai le ALI‘I.
29. E lē pei o le afi ‘ea la‘u ‘upu? o lo‘o fetalai mai ai le ALI‘I; e lē pei o le samala fo‘i e tu‘imomoia ai le papa?
30. O le mea lea fa‘auta, e fai ai mo‘u fili o perofeta, o ē o fegaoia‘i a‘u ‘upu, o lo‘o fetalai mai ai le ALI‘I.
31. O lo‘o fetalai mai le ALI‘I, Fa‘auta, e fai mo‘u fili o perofeta, o ē tautala i o latou laulaufaiva, ‘ua fa‘apea atu, “‘Ua fetalai mai o ia.”
32. Fa‘auta, e fai mo‘u fili i latou o ē vavalo i miti pepelo, o lo‘o fetalai mai ai le ALI‘I ma latou talatala atu ai ma fa‘asesēina ai lo‘u nu‘u ‘iā latou ‘upu pepelo ma lo latou mitamita vale; a o a‘u na ‘ou lē ‘a‘auina atu i latou ma a‘u le‘i fai atu ‘iā te i latou; o le mea lea e lē aogā ai lava i latou i lenei nu‘u, o lo‘o fetalai mai ai le ALI‘I.
33. A fesili mai fo‘i ‘iā te oe lenei nu‘u, po o le perofeta, po o le ositaulaga, e fa‘apea mai, “Se a ‘ea le avega mai le ALI‘I?” ‘Ona e tali atu ai lea ‘iā te i latou, “Se a se avega? ‘Ou te lafoa‘iina ‘outou,” o lo‘o fetalai mai ai le ALI‘I.
34. A o le perofeta, po o le ositaulaga, po o le nu‘u, e fai mai, “O le avega mai le ALI‘I;” ‘ou te taui atu lava i lenā tagata ‘atoa ma lona ‘āiga.
35. ‘Ia fa‘apea ‘ona ‘outou tautala atu, o le tagata i lē la te tuā‘oi ma le tagata i lona uso, “Se a le tali mai a le ALI‘I?” po o le “Se a fo‘i le afioga mai le ALI‘I?”
36. Tou te lē toe ta‘uta‘ua fo‘i le “avega mai le ALI‘I;” auā e ta‘itasi le tagata ma fai lana lava ‘upu ma avega ‘iā te ia; auā ‘ua fa‘auiga‘eseina e ‘outou afioga a le Atua soifua, o le ALI‘I o ‘au, lo tatou Atua.
37. ‘Ia fa‘apea ‘ona e fai atu i le perofeta, “Se a le tali mai a le ALI‘I ‘iā te oe?” po o le “Se a fo‘i le afioga mai le ALI‘I?”
38. ‘Ae ‘āfai tou te fai ane, “O le avega mai le ALI‘I;” o le mea lea ‘ua fa‘apea ‘ona fetalai mai ai o le ALI‘I, Auā ‘ua ‘outou fai ane lenei ‘upu, “O le avega mai le ALI‘I,” a ‘ua ‘ou avatu le fe‘au ‘iā te ‘outou, ‘ua fa‘apea atu, ‘Aua tou te fai ane, “O le avega mai le ALI‘I.”
39. O le mea lea fa‘auta, ‘ou te matuā fa‘agaloina ai ‘outou ma ‘ou lafoa‘iina ai ‘outou a‘i o‘u luma, ‘atoa ma le ‘a‘ai na ‘ou foa‘iina atu ‘iā te ‘outou ma o ‘outou tamā.
40. ‘Ou te fa‘ae‘eina atu fo‘i ‘iā te ‘outou le luma e fa‘avavau ma le māsiasi e fa‘avavau, e lē galo lava.#