1. O le afioga na o‘o mai ‘iā Ieremia mai le ALI‘I, ‘ina ‘ua mavae ‘ona tu‘uina atu o ia mai Rama e Nepusatana lē pule i le ‘au e fa‘afeao, ‘ina o maua o ia e ia, a o fusifusia o ia i maea u‘amea fa‘atasi ma le tāfeaga uma a Ierusalema ma Iuta ē na tāfea i Papelonia.
2. ‘Ona ‘ave ai lea e lē pule i le ‘au e fa‘afeao ‘iā Ieremia ma ‘ua fa‘apea mai ‘iā te ia, “O le ALI‘I, lou Atua, na fetalai mai lenei malaia i lenei mea.
3. O le ALI‘I fo‘i ‘ua fa‘ao‘o ai ma na faia e pei ‘ona fetalai mai ai o ia; auā na ‘outou agasala i le ALI‘I, ma ‘outou lē fa‘alogo i lona si‘ufofoga, o le mea lea ‘ua o‘o ai ‘iā te ‘outou lenei mea.
4. O lenei, fa‘auta mai, ‘ua ‘ou tatalaina oe i lenei aso a‘i maea u‘amea sa i ou lima. ‘Āfai e lelei ‘iā te oe ‘ona tā ō ma a‘u i Papelonia, sau ia, ‘ou te tausi ‘iā te oe; ‘ae ‘āfai e leaga ‘iā te oe ‘ona tā ō ma a‘u i Papelonia, sōia; ‘inā va‘ai atu ia, o lo‘o i ou luma le nu‘u uma; o le mea e lelei ma tatau ‘iā te oe ‘ona alu i ai, o le mea lea ia e alu i ai.
5. A o le‘i tali atu o ia, na ia fa‘apea mai, ‘Inā fo‘i atu ia ‘iā Ketalia le atali‘i o Aikamo, o le atali‘i lea o Safana, o lē ‘ua tofia e le tupu o Papelonia e pule i ‘a‘ai o Iuta ma ‘ia e nofo ma ia fa‘atasi ma le nu‘u; a le o lea, o le mea e tatau ‘iā te oe ‘ona e alu i ai, ‘inā alu lava ia i ai.” ‘Ona foa‘i mai ai lea ‘iā te ia e lē pule i le ‘au e fa‘afeao o mea e ‘ai ma se mea alofa ma na tu‘uina o ia e alu.
6. ‘Ona alu ai lea o Ieremia ‘iā Ketalia le atali‘i o Aikamo i Mesepa; ‘ua nofo fo‘i ma ia, fa‘atasi ma le nu‘u o ē na totoe i le nu‘u.
7. O ali‘i uma na ‘ave ‘au o ē sa i le vao, o i latou ma o latou tagata, ‘ua fa‘alogo i latou ‘ua tofia e le tupu o Papelonia o Ketalia le atali‘i o Aikamo e pule i le nu‘u, ‘ua na tofia fo‘i o ia e pule i tane ma fafine, ma tamaiti, o isi fo‘i o ē matitiva o le nu‘u, o i latou na lē tāfea i Papelonia;
8. ‘ona latou ō mai ai lea ‘iā Ketalia i Mesepa, o Isamaeli le atali‘i o Netanaia ma Ioanana ma Ionatana o atali‘i o Karea ma Seraia le atali‘i o Tanumeta, o atali‘i fo‘i o Efai le Netopa, ma Iaasenaia le atali‘i o le Maaka, o i latou ma o latou tagata.
9. ‘Ona tautō ai lea o Ketalia le atali‘i o Aikamo, le atali‘i o Safana ‘iā te i latou ma o latou tagata, ‘ua fa‘apea atu, “‘Aua tou te fefefe i ‘au‘auna ‘iā Kaletaia; ‘ia ‘outou nonofo i le nu‘u ma ‘au‘auna i le tupu o Papelonia, ‘ona manuia ai lea o ‘outou.
10. O a‘u nei fo‘i, fa‘auta, ‘ou te nofo i Mesepa, e tu ai i luma o Kaletaia o ē ō mai ‘iā te i matou; a o ‘outou, ‘ia ‘outou fa‘apotopoto uaina ma fua otata, ma suāu‘u ma tu‘u ai ‘iā ‘outou fagu, ‘ia ‘outou nonofo fo‘i ‘iā ‘outou ‘a‘ai ‘ua ‘outou maua.”
11. O tagata Iuta uma fo‘i na i ai i Moapi ma le nu‘u o le fānauga a Amoni ma Etoma ma ē na i ai i nu‘u uma, ‘ua latou fa‘alogo ‘ua tu‘ua e le tupu o Papelonia ē na totoe o Iuta ma ‘ua tofia e ia e pule ‘iā te i latou o Ketalia le atali‘i o Aikamo, le atali‘i o Safana;
12. ‘ona fo‘i mai ai lea o Iuta uma i mea uma na tulia ai i latou ma latou ō mai i le nu‘u o Iuta ‘iā Ketalia i Mesepa ma latou fa‘apotopoto i uaina ma fua otata e matuā tele.
13. O Ioanana fo‘i le atali‘i o Karea ma ali‘i uma na ‘ave ‘au, sa i le vao, ‘ua latou ō mai ‘iā Ketalia i Mesepa;
14. ‘ona latou fai mai lea ‘iā te ia, “‘Ua e silafia lava ‘ea ‘ua ‘auina mai e Paaliso le tupu o le fānauga a Amoni, o Isamaeli le atali‘i o Netanaia e fasioti ‘iā te oe?” ‘Ae le‘i talia la latou tala e Ketalia le atali‘i o Aikamo.
15. ‘Ona fai fa‘alilolilo mai ai lea o Ioanana le atali‘i o Karea ‘iā Ketalia i Mesepa, ‘ua fa‘apea mai, “Se‘i ‘ou alu ma ‘ou fasi ‘iā Isamaeli le atali‘i o Netanaia, e lē iloa fo‘i e se tasi; se a ‘ea le mea na te fasioti ai ‘iā te oe, e fa‘ata‘ape‘apeina ai Iuta uma ‘ua fa‘apotopotoina ‘iā te oe, e fa‘aumatia fo‘i o Iuta ‘ua totoe?”
16. ‘Ona fai atu ai lea o Ketalia le atali‘i o Aikamo ‘iā Ioanana le atali‘i o Karea, “‘Aua ‘e te fai lenā mea; auā o le mea pepelo ‘ua e fai mai ai ‘iā Isamaeli.”