1. ‘Ua uma ‘ona tautala atu o Ieremia i le nu‘u uma i ‘upu uma a le ALI‘I lo latou Atua, na ‘auina mai ai o ia e le ALI‘I lo latou Atua ‘iā te i latou, o ia ‘upu uma lava,
2. ‘ona fai mai ai lea o Asaraia le atali‘i o Hosaia ma Ioanana le atali‘i o Karea ma tagata fa‘amaualuluga uma, ‘ua fa‘apea mai ‘iā Ieremia, “O le pepelo ‘ua e fai mai ai; e le‘i ‘auina mai oe e le ALI‘I lo tatou Atua, ‘ia fa‘apea mai, ‘‘Aua tou te ō atu i Aikupito e āumau ai.’
3. A o Paruka le atali‘i o Neria, ‘ua ia fa‘aosoina oe ‘iā te i matou, ‘ina ‘ia tu‘uina atu i matou i lima o Kaletaia, e fasioti i matou ma tāfea i matou i Papelonia.”
4. O lenei, ‘ua lē fa‘alogo Ioanana le atali‘i o Karea, ma ali‘i uma na ‘ave ‘au ma le nu‘u uma, i le si‘ufofoga o le ALI‘I, ‘ia latou nonofo i le nu‘u o Iuta;
5. a o Ioanana le atali‘i o Karea ma ali‘i uma na ‘ave ‘au, ‘ua latou ‘ave i ē na totoe uma o Iuta, o ē na fo‘i mai ai nu‘u uma na tulia ai i latou, e nonofo i le nu‘u o Iuta;
6. o tane ma fafine ma tamaiti ma afafine o le tupu ma tagata uma na tu‘ua e Nepusatana le pule i le ‘au e fa‘afeao ‘iā Ketalia le atali‘i o Aikamo, le atali‘i o Safana, ‘atoa ma Ieremia le perofeta ma Paruka le atali‘i o Neria.
7. ‘Ona latou ō atu ai lea i le nu‘u o Aikupito; auā na latou lē fa‘alogo i le si‘ufofoga o le ALI‘I; ‘ua o‘o atu lava i latou i Tapenesa.
8. ‘Ona o‘o mai ai lea o le afioga a le ALI‘I ‘iā Ieremia i Tapenesa, ‘ua fa‘apea mai:
9. ‘Inā ‘ave ia i ou lima ni ma‘a tetele ma tanu ai i le paluga panisina i le mea e tunu ai ma‘a‘omea, o lo‘o i ai i le mea e ui ai i le fale o Farao i Tapenesa, i luma o tagata o Iuta;
10. ‘ia e fai atu fo‘i ‘iā te i latou, O lo‘o fa‘apea ‘ona fetalai mai o le ALI‘I o ‘au, le Atua o Isaraelu, Fa‘auta, ‘ou te ‘auina atu e ‘a‘ami la‘u ‘au‘auna o Nepukanesa le tupu o Papelonia ma ‘ou tu‘uina lona nofoāli‘i i luga o ia ma‘a ‘ua ‘ou tanua; na te fofola fo‘i lona ‘ie matagofie i o latou luga.
11. E sau fo‘i o ia, na te fasia le nu‘u o Aikupito;na te tu‘uina atu fo‘i o ē ‘ua tofia ‘ia oti,i le oti ma ē ‘ua tofia i le tāfeaga,‘ia tāfea ma ē ‘ua tofia i le pelu, ‘ia oti i le pelu.
12. ‘Ou te tutu fo‘i le afi i fale o atua o Aikupito; na te susunuina fo‘i i latou ma ‘avea i latou o tagata o tau‘a; na te taaia fo‘i le nu‘u o Aikupito, e pei ‘ona taaia e le leoleo mamoe lona ‘ofu; e alu ‘ese fo‘i o ia i lea mea ma le filemū.
13. Na te tu‘inini‘ia fo‘i tupua o le fale o le la, o lo‘o i ai i le nu‘u o Aikupito; o fale fo‘i o atua o Aikupito, na te susunuina i le afi.#