1. O le ‘upu na o‘o mai ‘iā Ieremia ‘iā Iuta uma sa nonofo i le nu‘u o Aikupito, sa nonofo i Mekatala ma Tapenesa ma Nafi ma le nu‘u o Patoro, ‘ua fa‘apea mai,
2. O lo‘o fa‘apea ‘ona fetalai mai o le ALI‘I o ‘au, le Atua o Isaraelu: ‘Ua ‘outou va‘aia le malaia uma na ‘ou fa‘ao‘o i luga o Ierusalema ma luga o ‘a‘ai uma o Iuta; fa‘auta fo‘i, ‘ua fa‘atafunaina i le aso nei, e leai fo‘i se tagata ‘ua nofo ai;
3. ‘ona o a latou amio leaga na latou faia, e fa‘a‘ono‘ono mai ai ‘iā te a‘u, ‘ina ‘ua latou ō e fa‘amū mea manogi e ‘au‘auna ai i atua ‘ese, o ē na latou lē iloa, o i latou, po o ‘outou, po o ‘outou tamā.
4. Na a‘u ‘a‘auina atu fo‘i ‘iā te ‘outou a‘u ‘au‘auna uma o perofeta, na ‘ou ala ‘a‘auina atu i latou, ‘ua fa‘apea atu, “‘Aua lava ne‘i ‘outou faia lenā mea ‘inosia, o le mea lava ‘ou te ‘ino‘ino i ai.”
5. ‘Ae le‘i fa‘alogo mai i latou ma ‘ua lē ua‘i mai o latou taliga, ‘ina ‘ia liliu mai ‘iā latou amio leaga, ‘aua le fa‘amū mea manogi i atua ‘ese.
6. O lea ‘ua liligiina ifo ai lo‘u ita ma lo‘u tigā ma ‘ua mū ai i ‘a‘ai o Iuta ma ala o Ierusalema; ‘ua fa‘atafunaina fo‘i ia, ‘ua tu‘ufua, e pei ‘ona fai i le aso nei.
7. O lenei, o lo‘o fa‘apea ‘ona fetalai mai o le ALI‘I, le Atua o ‘au, le Atua o Isaraelu: Se a le mea ‘ua ‘outou fai ai le leaga tele e malaia ai ‘outou, ‘ia fa‘aumatia ‘iā te ‘outou le tane ma le fafine, o le tamaitiiti ma le tama meamea, a‘i totonu o Iuta, ‘ina ‘ia lē fa‘atotoeina ni o ‘outou;
8. ‘ina ‘ua ‘outou fa‘a‘ono‘ono mai ‘iā te a‘u i mea ‘ua faia e o ‘outou lima, ‘ua fa‘amū mea manogi i atua ‘ese i le nu‘u o Aikupito, ‘ua ‘outou ō i ai e āumau ai, ‘ina ‘ia fa‘aumatia ‘outou ma ‘ia fai ‘outou ma fa‘afanoga e fai a‘i luma fo‘i i nu‘u uma o le lalolagi?
9. Po ‘ua galo ‘ea ‘iā te ‘outou amio leaga a o ‘outou tamā ma amio leaga a tupu o Iuta ma amio leaga a latou avā ma o ‘outou amio leaga ma amio leaga a ‘outou avā, na latou faia i le nu‘u o Iuta ma ala o Ierusalema?
10. E le tigāina o latou loto e o‘o i le aso nei ma latou le fefefe ma latou le sāvavali i la‘u tulafono ma a‘u sauniga, na ‘ou tu‘uina atu i o ‘outou luma ma luma o ‘outou tamā.
11. O le mea lea o lo‘o fa‘apea ‘ona fetalai mai ai o le ALI‘I o ‘au, le Atua o Isaraelu: Fa‘auta, ‘ou te fa‘asaga o‘u mata ‘iā te ‘outou e malaia ai ‘outou, ‘ina ‘ia fa‘aumatia Iuta uma.
12. ‘Ou te ‘ave fo‘i i ē o totoe o Iuta, o ē ‘ua fa‘asaga o latou mata e ō atu i le nu‘u o Aikupito e āumau ai, e fa‘aumatia fo‘i i latou uma i le nu‘u o Aikupito; e oti i latou i le pelu ma le oge, e fa‘aumatia i latou, o tagatanu‘u ‘atoa ma ali‘i; e oti i latou i le pelu ma le oge; e fai fo‘i i latou ma fa‘afanoga ma mea e ofo ai ma mea e fetu‘u ai ma fai a‘i luma.
13. Auā ‘ou te taui atu i ē o nonofo i le nu‘u o Aikupito, e pei ‘ona ‘ou taui atu i Ierusalema i le pelu, ma le oge ma le fa‘ama‘i;
14. o ē na totoe o Iuta, na ō mai e āumau i lenei mea i le nu‘u o Aikupito, e leai se tasi e sao pe totoe, e toe fo‘i atu i le nu‘u o Iuta, o le mea ‘ua latou manana‘o tele ai e toe fo‘i atu e nonofo ai; auā e leai ni ē fo‘i atu, na o ē sōsōla lava.
15. ‘Ona tali mai ai lea ia Ieremia o tagata uma o ē na iloa ‘ua fa‘amūina mea manogi e a latou avā i atua ‘ese ma fafine uma na tutū mai, o le fa‘apotopotoga tele, o le nu‘u uma fo‘i sa nonofo i le nu‘u o Aikupito, i Patoro, ‘ua fa‘apea mai,
16. “O le ‘upu ‘ua e fai mai ai ‘iā te i matou i le suafa o le ALI‘I, matou te lē fa‘alogo ai lava ‘iā te oe;
17. ‘ae peita‘i matou te faia lava mea uma ‘ua matou fai atu ai, e fa‘amū mea manogi i le tupu fafine o le lagi ma sasa‘a i ai taulaga i mea e inu, e pei ‘ona matou faia, o i matou ma o matou tamā, o matou tupu ma o matou ali‘i, i ‘a‘ai o Iuta ma ala o Ierusalema; auā o ona po ia sa mā‘o‘ona ai i matou i mea e ‘ai, sa manuia fo‘i ma matou lē iloa se malaia.
18. ‘Ae talu ‘ina matou tu‘ua ‘ona fa‘amū o mea manogi i le tupu fafine o le lagi ma sasa‘a atu ‘iā te ia taulaga i mea e inu, ‘ua matou matitiva i mea uma, ‘ua fa‘aumatia fo‘i i matou i le pelu ma le oge.”
19. “Na matou fa‘amū mea manogi i le tupu fafine o le lagi ma matou sasa‘a ‘iā te ia taulaga i mea e inu, sa le i ai ‘ea a matou tane ‘ina ‘ua matou faia mo ia ni fa‘apāpā areto e ‘au‘auna ‘iā te ia ma matou sasa‘a ‘iā te ia taulaga i mea e inu?”
20. ‘Ona fai atu ai lea o Ieremia i le nu‘u uma, o tane ma fafine ma le nu‘u uma e na tali mai ‘iā te ia i lea ‘upu, ‘ua fa‘apea atu,
21. “O mea manogi na ‘outou fa‘amūina i ‘a‘ai o Iuta ma ala o Ierusalema, o ‘outou ma o ‘outou tamā, ma o ‘outou tupu ma o ‘outou ali‘i ma tagata o le nu‘u na lē manatua ‘ea e le ALI‘I lea mea? na lē mafaufau ‘ea o ia i ai?
22. Na le toe lavā ‘onosa‘i le ALI‘I, ‘ona o le leaga o a ‘outou amioga, ‘ona o mea ‘inosia na ‘outou faia; o le mea lea ‘ua fai ai lo ‘outou nu‘u ma mea gaogao ma mea e ofo ai ma fa‘afanoga e leai sē nofo ai, e pei ‘ona fai i le aso nei.
23. Auā ‘ua ‘outou fa‘amū mea manogi, auā fo‘i ‘ua ‘outou agasala i le ALI‘I ma ‘ua ‘outou lē fa‘alogo i le si‘ufofoga o le ALI‘I ma ‘outou le sāvavali i lana tulafono ma ana sauniga ma ana poloa‘iga; o mea ia ‘ua o‘o ai lenei malaia ‘iā te ‘outou, e pei ‘ona fai i le aso nei.”
24. ‘Ua fai atu fo‘i Ieremia i le nu‘u uma ma fafine uma, “‘Inā fa‘alogologo mai ia i le afioga a le ALI‘I, o ‘outou Iuta uma, o i le nu‘u o Aikupito;
25. o lo‘o fa‘apea ‘ona fetalai mai o le ALI‘I o ‘au, le Atua o Isaraelu, ‘ua fa‘apea mai: O ‘outou ma a ‘outou avā, ‘ua ‘outou tautala mai i o ‘outou gutu, ‘ua fa‘ataunu‘uina fo‘i i o ‘outou lima, ‘ua fa‘apea mai, ‘Matou te faia lava a matou tautoga ‘ua matou tautō ai, e fa‘amū mea manogi i le tupu fafine o le lagi ma sasa‘a ‘iā te ia taulaga i mea e inu.’ E fa‘atumauina lava e ‘outou a ‘outou tautoga, e matuā faia fo‘i e ‘outou a ‘outou tautoga.
26. O le mea lea ‘ia fa‘alogologo mai i le afioga a le ALI‘I, o ‘outou Iuta uma o ē o nonofo i le nu‘u o Aikupito: Fa‘auta, ‘ua ‘ou tautō a‘u i lo‘u igoa tele, o lo‘o fetalai mai ai le ALI‘I, e lē toe ta‘ua lo‘u igoa i le gutu o se tasi tagata o Iuta o lo‘o i ai i le nu‘u o Aikupito uma, e fa‘apea, ‘O lo‘o soifua le Ali‘i le ATUA.’
27. Fa‘auta, ‘ou te mataala ‘ia malaia i latou, ‘ae lē ‘ina ‘ia manuia; e fa‘aumatia tagata uma o Iuta o ē o i le nu‘u o Aikupito i le pelu ma le fa‘ama‘i, se‘ia fa‘aumatia lava i latou.
28. A o ē sao i le pelu latou te fo‘i atu nai le nu‘u o Aikupito i le nu‘u o Iuta, e to‘aitiiti i latou; e iloa fo‘i e Iuta uma o ē totoe, ē ‘ua ō atu i le nu‘u o Aikupito e āumau ai, po o ‘upu a ai e taunu‘u, po o a‘u, po o a latou.
29. O lenei fo‘i le fa‘ailoga ‘iā te ‘outou, ‘ua fetalai mai ai le ALI‘I, e tauia ‘outou e a‘u i lenei mea, ‘ina ‘ia ‘outou iloa le matuā taunu‘u a‘u ‘upu ‘iā te ‘outou ‘ia malaia ai ‘outou.
30. O lo‘o fa‘apea ‘ona fetalai mai o le ALI‘I, Fa‘auta, ‘ou te tu‘uina atu Farao Hofero le tupu o Aikupito i lima o ē ‘ua ita mai ‘iā te ia ma lima o ē sā‘ili e fasioti ‘iā te ia; e pei ‘ona ‘ou tu‘uina atu o Setekaia le tupu o Iuta i le lima o Nepukanesa le tupu o Papelonia, o lē na ita mai ‘iā te ia ma na sā‘ili e fasioti ‘iā te ia.”#