1. Le ALI‘I e, e amiotonu oe,pe a ‘ou finau atu ‘iā te oe;tau ‘ina ‘ou tautala atu ‘iā te oe i au fa‘amasinoga.Se a ‘ea le mea ‘ua manuia ai le ala o tagata amio leaga,‘ua saogalemū i latou uma o ē matuā fa‘a‘ole‘ole?
2. ‘Ua e totōina i latou,‘ua mau a‘a fo‘i i latou;‘ua tutupu i latou ma ‘ua latou fua mai.‘Ua latalata oe i o latou gutu,‘ae mamao i o latou manatu.
3. A o oe, le ALI‘I e, o lo‘o e silafia a‘u,‘ua e sisila mai ‘iā te a‘u,‘ua e tofotofoina fo‘i lo‘u loto ‘ua ‘iā te oe.‘Ia e vavae‘eseina i latou e pei o mamoe a fasia,‘ia e fa‘asāina i latou mo le aso e fafasi ai.
4. Se‘ia afea e fa‘anoanoa ai le nu‘uma magumagu ai le vao itio fanua uma ‘ona o le amio leaga a ē o nonofo ai?‘Ua fa‘aumatia manu vaefā ma manu felelei; auā ‘ua latou fai ane,“E le va‘aia e ia lo tatou i‘uga.”
5. ‘Āfai ‘ua e taufetuli ma tagata e tamomo‘e i le ‘ele‘ele,ma ‘ua e lailoa ‘iā te i latou,pe fa‘apefea ‘ona e tausiniō ma solofanua?‘Āfai ‘ua e nofo ma le lē mata‘u i le nu‘u e filemū ai,se a se mea ‘e te faia i le matagofie o Ioritana?
6. Auā o ou uso lava ma le ‘āiga o lou tamā,o i latou lava ‘ua latou fa‘a‘ole‘ole ‘iā te oe;o i latou lava ‘ua latou ‘alalaga tele i ou tua.E ui ‘ina latou tautala lelei ‘iā te oe,‘aua ne‘i e fa‘atuatua ‘iā te i latou.
7. ‘Ua ‘ou tu‘ua, lo‘u fale,‘ua ‘ou lafoa‘iina lo‘u tofi;‘ua ‘ou tu‘uina atu le pele a lo‘u loto i lima o ē ita ‘iā te ia.
8. ‘Ua ‘avea lo‘u tofi ‘iā te a‘u pei se leona i le vao;‘ua leo tele mai o ia, ‘iā te a‘u,o le mea lea ‘ua ‘ou ‘ino‘ino ai ‘iā te ia.
9. O lo‘u tofi ‘ua ‘iā te a‘u pei o le manu fe‘ai, o le sapua;o manu fe‘ai o i ona itū uma ‘ua ita ‘iā te ia;ō mai ia, ‘inā fa‘apotopoto mai ia o mea ola uma o le vao ma ‘aumaia i latou e ‘a‘ai ai.
10. ‘Ua fa‘aumatia la‘u tōvine e leoleo mamoe e to‘atele,a solia e i latou lo‘u tofi,o lo‘u tofi matagofie ‘ua latou faia ma mea tu‘ufua ‘ua fa‘atafunaina.
11. ‘Ua faia ma mea fa‘atafunaina,na fa‘anoanoa o ia i o‘u luma ‘ina ‘ua fa‘atafunaina.‘Ua fa‘atafunaina le nu‘u uma,‘ae leai se tagata ‘ua mafaufau i ai.
12. ‘Ua ō a‘e tagata fa‘atafuna i mauga tula uma i le vao;‘ua ‘ai le pelu a le ALI‘I e āfua mai i le tasi pito nu‘u e o‘o i le tasi pito nu‘u;e leai se filemū i se tagata e to‘atasi.
13. ‘Ua latou lūlūina saito,‘ae latou te selesele mai ai la‘au tuitui.‘Ua fa‘atigāina i latou e i latou,‘ae lē aogā ‘iā te i latou.E mā fo‘i i latou i mea e maua ‘iā te ‘outou,‘ona o le to‘asā tele o le ALI‘I.
14. O lo‘o fa‘apea ‘ona fetalai mai o le ALI‘I i tagata amio leaga uma ‘ua tuā‘oi ma a‘u, o ē pa‘i atu i le tofi na a‘u tofia ai lo‘u nu‘u o Isaraelu: Fa‘auta, ‘ou te lia‘iina i latou a‘i lo latou lau‘ele‘ele, ‘ou te lia‘iina fo‘i le ‘āiga o Iuta a‘i totonu ‘iā te i latou.
15. A mavae ‘ona ‘ou lia‘iina o i latou, ‘ona ‘ou toe alofa mutimutivale lea ‘iā te i latou ma ‘ou fa‘afoisia mai i latou, e ta‘ito‘atasi i lona tofi, e ta‘ito‘atasi fo‘i i lona nu‘u.
16. ‘Āfai e matuā a‘oa‘o lava i latou i ala o lo‘u nu‘u, ‘ia tautō i latou i lo‘u igoa, e fa‘apea, “O lo‘o soifua le ALI‘I;” e pei ‘ona latou a‘oa‘o atu i lo‘u nu‘u ‘ia tautō ‘iā Paala; ‘ona atiina a‘e lea o i latou i totonu o lo‘u nu‘u.
17. ‘Ae ‘āfai latou te lē fa‘alogo mai, ‘ona ‘ou matuā lia‘iina lea o lea nu‘u ma ‘ou fa‘aumatia, o lo‘o fetalai mai ai le ALI‘I.#