1. O lea lava tausaga, o le amataga o le nofoa‘iga a Setekaia le tupu o Iuta, o lona fa o tausaga ma le lima o masina, na fai mai ai ‘iā te a‘u o Hanania le atali‘i o Asura le perofeta, o le Kipeona, i le fale o le ALI‘I, i luma o ositaulaga ma le nu‘u uma, ‘ua fa‘apea mai,
2. O lo‘o fa‘apea ‘ona fetalai mai o le ALI‘I o ‘au, le Atua o Isaraelu, ‘ua fa‘apea mai, “‘Ua ‘ou gauia le amo a le tupu o Papelonia.
3. A o le‘i mavae tausaga e lua ‘ou te toe ‘aumaia i lenei mea o ipu uma o le fale o le ALI‘I, na ‘ave‘esea e Nepukanesa le tupu o Papelonia a‘i lenei mea ma na avatu ai i Papelonia;
4. ‘ou te fa‘afoisia mai fo‘i i lenei mea o Iekonia, le atali‘i o Ioakima, le tupu o Iuta ma le tāfeaga uma a Iuta, na ō atu i Papelonia, o lo‘o fetalai mai ai le ALI‘I; auā ‘ou te gauia le amo a le tupu o Papelonia.”
5. ‘Ona fai atu ai lea o Ieremia le perofeta ‘iā Hanania le perofeta i luma o ositaulaga ma luma o le nu‘u uma o ē na tutū mai i le fale o le ALI‘I;
6. ‘ua fai atu lava Ieremia le perofeta, “Amene! ‘Ia fa‘apea ‘ona fai e le ALI‘I; ‘ia fa‘amauina e le ALI‘I au ‘upu ‘ua e vavalo ai, i le toe ‘aumaia ipu o le fale o le ALI‘I ma le tāfeaga uma mai Papelonia i lenei mea.
7. A se‘i e fa‘alogo, mai i lenei ‘upu ‘ou te fai atu ai nei i ou luma ma luma o le nu‘u uma,
8. O perofeta na muamua ‘iā te a‘u, na muamua fo‘i ‘iā te oe, talu mai anamua lava, ‘ua latou vavalo i nu‘u e tele ma mālō tetele, i tau‘a, ma malaia, ma fa‘ama‘i;
9. o le perofeta ‘ua vavalo i le manuia, a taunu‘u le ‘upu a lea perofeta, ‘ona iloa ai lea, e moni, o le perofeta lea ‘ua ‘auina mai e le ALI‘I.”
10. ‘Ona tago ai lea o Hanania le perofeta i le amo nai le ua o Ieremia le perofeta ma na gauia.
11. ‘Ona fai mai ai lea o Hanania i luma o le nu‘u uma, ‘ua fa‘apea mai, “O lo‘o fa‘apea ‘ona fetalai mai o le ALI‘I: E fa‘apea lava ‘ona ‘ou gauia le amo a Nepukanesa le tupu a Papelonia i ua o nu‘u uma, a o le‘i mavae tausaga e lua.” ‘Ona alu ‘ese ai lea o Ieremia le perofeta.
12. A ‘ua o‘o mai le afioga a le ALI‘I ‘iā Ieremia, ‘ina ‘ua mavae ‘ona gauia e Hanania le perofeta o le amo nai le ua o Ieremia le perofeta, ‘ua fa‘apea mai:
13. ‘Inā alu ia ma fai atu ‘iā Hanania, ‘ia fa‘apea atu, O lo‘o fa‘apea ‘ona fetalai mai o le ALI‘I: ‘Ua e gauia amo la‘au; a ‘e te faia amo u‘amea e sui a‘i.
14. Auā o lo‘o fa‘apea ‘ona fetalai mai o le ALI‘I o ‘au, le Atua o Isaraelu: ‘Ua ‘ou fa‘ae‘etia le amo u‘amea i ua o ia nu‘u uma, ‘ina ‘ia latou ‘au‘auna ‘iā Nepukanesa le tupu o Papelonia; latou te ‘au‘auna fo‘i ‘iā te ia, ‘ua ‘ou tu‘uina atu fo‘i ‘iā te ia o manu fe‘ai.
15. ‘Ona fai atu ai lea o Ieremia le perofeta ‘iā Hanania le perofeta, “Hanania e, ‘inā fa‘alogologo mai ia; e le‘i ‘auina mai oe e le ALI‘I; a ‘ua e fa‘atupuina i lenei nu‘u le fa‘atuatua i le pepelo.
16. O le mea lea, o lo‘o fa‘apea ‘ona fetalai mai ai o le ALI‘I, Fa‘auta, ‘ou te lafoa‘i ‘iā te oe a‘i le fogā‘ele‘ele, ‘e te oti i le tausaga nei; auā ‘ua e tautala i le fouvale i le ALI‘I.”
17. ‘Ona oti ai lea o Hanania le perofeta i lea lava tausaga, i le fitu o masina.