1. O le afioga na o‘o mai ‘iā Ieremia mai le ALI‘I, i ona po o Ioakima le atali‘i o Iosia le tupu o Iuta, ‘ua fa‘apea mai:
2. ‘Inā alu ia oe i le ‘āiga o sa Rakapā ma tautala atu ‘iā te i latou ma ‘aumai ‘iā te i latou i le fale o le ALI‘I, i se tasi potu ma avatu ‘iā te i latou le uaina e inu ai.
3. ‘Ona ‘ou ‘ave ai lea o Iaasenaia le atali‘i o Ieremia, le atali‘i o Havasinia ma ona uso ma ona atali‘i uma ma le ‘āiga uma o sa Rakapā;
4. ma ‘ou ‘aumai ‘iā te i latou i le fale o le ALI‘I, i le potu o atali‘i o Hanana le atali‘i o Iketalia, o le tagata o le Atua, sa tuā‘oi ma le potu o ali‘i, na i ai i luga o le potu o Maaseia le atali‘i o Saluma, o le leoleo o le faitoto‘a;
5. ‘ona ‘ou tu‘uina atu lea i luma o le fānauga a le ‘āiga o sa Rakapā o ipu fa‘a‘ofu‘ofu ‘ua tūtūmu i uaina, ma ipu e inu ai; ma a‘u fai atu ‘iā te i latou, “‘Ia ‘outou feinu i le uaina.”
6. A ‘ua latou fai mai, “Matou te le inu uaina; auā na poloa‘i mai ‘iā te i matou o Ionatapa le atali‘i o Rakapa, o lo matou tamā, ‘ua fa‘apea mai, ‘‘Aua tou te inu uaina, o ‘outou ma o ‘outou fānau, e o‘o i le fa‘avavau;
7. ‘aua fo‘i tou te fai se fale, ‘aua tou te lūlū saito, ‘aua tou te totō se tōvine, ‘aua fo‘i ne‘i ‘iā te ‘outou ia mea; auā e nonofo ‘outou i fale ‘ie i o ‘outou aso uma; ‘ina ‘iā tele ni aso e ola ai ‘outou i le lau‘ele‘ele tou te āumau ai.’
8. ‘Ua matou usiusita‘i i le ‘upu a Ionatapa le atali‘i o Rakapa, lo matou tamā, i mea uma na ia poloa‘i mai ai ‘iā te i matou, ‘aua matou te inu uaina i o matou aso uma, o i matou ma a matou avā, o matou atali‘i fo‘i ma o matou afafine.
9. ‘Aua fo‘i matou te fai fale e nonofo ai; e le ‘iā te i matou fo‘i se tōvine, po o se fanua, po o saito;
10. a ‘ua matou nonofo i fale ‘ie; ‘ua matou usiusita‘i ma matou faia e tusa ma mea uma na poloa‘i mai ai Ionatapa lo matou tamā ‘iā te i matou.
11. Na o‘o fo‘i ‘ina sau o Nepukanesa le tupu o Papelonia i le nu‘u, ‘ona matou fa‘apea ai lea, ‘‘Inā ō mai ia, se‘i tatou ō i Ierusalema auā o ‘au a Kaletaia, ma ‘au a Suria.’ O le mea lea ‘ua matou nonofo ai i Ierusalema.”
12. ‘Ona o‘o mai ai lea o le afioga a le ALI‘I ‘iā Ieremia, ‘ua fa‘apea mai,
13. O lo‘o fa‘apea ‘ona fetalai mai o le ALI‘I o ‘au, le Atua o Isaraelu, “‘Ia e alu ma e fai atu i tagata o Iuta ma ē o nonofo i Ierusalema, E lē talia ‘ea e ‘outou mea ‘ua a‘oa‘oina atu, ‘ia fa‘alogo ai i a‘u ‘upu? ‘ua fetalai mai ai le ALI‘I.
14. O ‘upu a Ionatapa le atali‘i o Rakapa, na ia poloa‘i atu ai i ona atali‘i, e ‘aua le inu uaina, ‘ua tausia lava, ‘ua latou le inu ai ‘ua o‘o lava i le aso nei, auā ‘ua latou usiusita‘i i le poloa‘iga a lo latou tamā; a o a‘u nei, ‘ua ‘ou fai atu ‘iā te ‘outou, ‘ua ‘ou ala fai atu lava; a ‘ua ‘outou lē fa‘alogo mai ‘iā te a‘u.
15. ‘Ua ‘ou ‘a‘auina atu fo‘i ‘iā te ‘outou o a‘u ‘au‘auna uma o perofeta, ‘ua ‘ou ala ‘a‘auina lava i latou, ‘ua fa‘apea atu, ‘‘Ia ‘outou toe fo‘i mai ta‘itasi le tagata a‘i lona ala leaga, ‘ia ‘outou sauni lelei fo‘i a ‘outou amioga, ‘aua fo‘i tou te mulimuli atu i atua ‘ese e ‘au‘auna i ai, ‘ona nonofo ai lea o ‘outou i le lau‘ele‘ele na ‘ou foa‘iina atu ai ‘iā te ‘outou ma o ‘outou tamā.’ A ‘ua lē ua‘i mai o ‘outou taliga ma ‘outou lē fa‘alogo mai ‘iā te a‘u.
16. Auā ‘ua tausia e atali‘i o Ionatapa le atali‘i o Rakapa le poloa‘iga a lo latou tamā, na ia poloa‘i atu ai ‘iā te i latou; a o lenei nu‘u, ‘ua latou lē fa‘alogo lava ‘iā te a‘u.
17. O le mea lea o lo‘o fa‘apea ‘ona fetalai mai ai o le ALI‘I, le Atua o ‘au, le Atua o Isaraelu, Fa‘auta, ‘ou te fa‘ao‘o ‘iā Iuta ma i latou uma o ē nonofo i Ierusalema, le malaia uma na ‘ou fai atu ai e o‘o ‘iā te i latou; auā na ‘ou fai atu ‘iā te i latou, a ‘ua latou lē fa‘alogo mai; na ‘ou vala‘au fo‘i ‘iā te i latou, a ‘ua latou le tali mai;”
18. ‘Ua fai atu fo‘i Ieremia i le ‘āiga o sa Rakapā, O lo‘o fa‘apea ‘ona fetalai mai o le ALI‘I o ‘au, le Atua o Isaraelu: ‘Ua ‘outou usiusita‘i i le poloa‘iga a Ionatapa lo ‘outou tamā ma ‘ua ‘outou tausia ana poloa‘iga uma ma ‘ua ‘outou faia e tusa ma mea uma na ia poloa‘i mai ai ‘iā te ‘outou.
19. O le mea lea o lo‘o fa‘apea ‘ona fetalai mai ai o le ALI‘I o ‘au, le Atua o Isaraelu, E le motu le gafa o Ionatapa le atali‘i o Rakapa, ‘ae tu mai sona tagata i o‘u luma i aso uma lava.