Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36
  37. 37
  38. 38
  39. 39
  40. 40
  41. 41
  42. 42
  43. 43
  44. 44
  45. 45
  46. 46
  47. 47
  48. 48
  49. 49
  50. 50
  51. 51
  52. 52

Feagaiga Tuai

Feagaiga Fou

Ieremia 39 O LE TUSI PA'IA - Ekalesia Katoliko Roma (RSCB)

‘Ua Pa‘ū Ierusalema

1. O le iva o tausaga o Setekaia le tupu o Iuta, o le sefulu o masina, na ō mai ai Nepukanesa le tupu o Papelonia ma lana itūtau‘a uma, i Ierusalema ma latou vagaia.

2. O le tausaga o Setekaia e sefulu ma le tasi, o le fa o masina ma le aso iva o le masina, na lepetia ai le ‘a‘ai.

3. ‘Ona ō mai ai lea o ali‘i uma ‘ua i le tupu o Papelonia ma latou nonofo i le faitoto‘a i totonu, o Nekala-saresa, o Samekanepo, o Sasekimo o le matai o eunuka, o Nekala-saresa o le matai o makoi ma nisi ali‘i uma ‘ua i le tupu o Papelonia.

4. ‘Ua iloa i latou e Setekaia le tupu o Iuta ma ‘au uma, ‘ona latou sōsōla ai lea ma latou tu‘ua le ‘a‘ai i le po, ‘ua ui i le ala o le fanua o le tupu i le faitoto‘a i le vā o pā e lua; ‘ua alu atu fo‘i o ia i le ala i le ‘ele‘ele laugatasi.

5. ‘Ona tuliloa ai lea e le itūtau‘a a Kaletaia ‘iā te i latou, ‘ua latou maua atu ‘iā Setekaia i le ‘ele‘ele laugatasi o Ieriko; ‘ua latou pu‘e ‘iā te ia, ‘ona latou avatu ai lea o ia ‘iā Nepukanesa le tupu o Papelonia i Ripelu, i le nu‘u o Amato, ‘ona fa‘asala ai lea o ia ‘iā te ia.

6. ‘Ua fasiotia fo‘i e le tupu o Papelonia o atali‘i o Setekaia i ona luma i Ripelu; ‘ua fasiotia fo‘i e le tupu o Papelonia o ali‘i uma o Iuta.

7. ‘Ua ia fa‘atauaso fo‘i ‘iā Setekaia ma fusifusi ‘iā te ia i fa‘amau ‘apamemea e lua e ‘ave ‘iā te ia i Papelonia.

8. ‘Ua susunuina fo‘i e Kaletaia le fale o le tupu ma fale o le nu‘u i le afi ma latou sōloia le pā o Ierusalema.

9. A o ē na totoe o le nu‘u sa i ai pea i le ‘a‘ai ma ē na sōsōla ‘iā te ia ma ē na totoe o le nu‘u sa i ai pea, na tāfea i latou i Papelonia e Nepusatana, le pule i le ‘au e fa‘afeao.

10. A ‘ua tu‘ua i le nu‘u o Iuta e Nepusatana lē pule i le ‘au e fa‘afeao, nisi o le nu‘u o ē matitiva, e leai sa latou mea, ‘ua ia foa‘i atu fo‘i ‘iā te i latou o tōvine ma fanua i lea aso.

‘Ua Fa‘asa‘olotoina o Ieremia

11. Na poloa‘i fo‘i Nepukanesa le tupu o Papelonia ‘iā Nepusatana lē pule i le ‘au e fa‘afeao ‘iā Ieremia, ‘ua fa‘apea atu,

12. “‘Ia e ‘ave ‘iā te ia, ‘ia e tausi fo‘i ‘iā te ia, ‘aua ne‘i fai se mea leaga ‘iā te ia; ‘ae pei ‘ona fai mai o ia ‘iā te oe, ‘ia fa‘apea ‘ona e fai ‘iā te ia.”

13. ‘Ua ‘a‘auina atu fo‘i nisi e Nepusatana lē pule i le ‘au e fa‘afeao ma Nepusapana o le matai o eunuka, ma Nekala-saresa o le matai o makoi ma ali‘i uma ‘ua i le tupu o Papelonia;

14. ‘ua latou ‘a‘auina atu ma latou ‘a‘ami atu ‘iā Ieremia a‘i le lotoā o le fale puipui, ‘ona latou tu‘uina atu lea o ia ‘iā Ketalia le atali‘i o Aikamo, le atali‘i o Safana, ‘ia na ‘aumai ‘iā te ia i le fale; ‘ona nofo ai lea o ia fa‘atasi ma le nu‘u.

O le Talafiafia ‘iā Epetemeleka

15. Na o‘o mai le afioga a le ALI‘I ‘iā Ieremia, ‘ina o puipuia o ia i le lotoā o le fale puipui, ‘ua fa‘apea mai:

16. ‘Inā alu ia ma e fai atu ‘iā Epetemeleka le Aitiope: ‘ia fa‘apea atu, O lo‘o fa‘apea ‘ona fetalai mai o le ALI‘I o ‘au, le Atua o Isaraelu, Fa‘auta, ‘ou te fa‘ao‘o a‘u ‘upu i lenei ‘a‘ai ‘ia malaia, ‘ae lē ‘ina ‘ia manuia; e o‘o fo‘i ia i ou luma i lea aso.

17. ‘Ae ‘ou te lavea‘i ‘iā te oe i lea aso, o lo‘o fetalai mai ai le ALI‘I, e lē tu‘uina fo‘i oe i lima o tagata ‘ua e fefe i ai.

18. Auā ‘ou te fa‘asaoina lava oe, ‘e te lē oti fo‘i i le pelu, ‘ae ‘avea lou ola māu vete; auā ‘ua e fa‘atuatua ‘iā te a‘u, o lo‘o fetalai mai ai le ALI‘I.#