1. ‘Ona ia toe fa‘afo‘i mai lea ‘iā te a‘u i le ala o le faitoto‘a o le mea pa‘ia aupito i tua, e fa‘asaga i sasa‘e; a ‘ua punitia ia.
2. ‘Ona fetalai mai lea a le ALI‘I ‘iā te a‘u: E punitia lenei faitoto‘a, e le tatalaina lava, e le ulu atu i ai se tagata; auā ‘ua ulufale mai ai le ALI‘I le Atua o Isaraelu o le mea lea e punitia ai ia.
3. Mo le ali‘i sili lea; o le ali‘i sili e nofo ai o ia e ‘ai ai mea e ‘ai i luma o le ALI‘I; na te ulu ane i le ala o le fa‘apaologa o lea faitoto‘a, na te ulufafo fo‘i i lea lava ala.
4. ‘Ua ia ‘aumai fo‘i ‘iā te a‘u i le ala o le faitoto‘a i le itū i matū i lumāfale; ‘ona ‘ou va‘ai lea, fa‘auta fo‘i, ‘ua tumu le fale o le ALI‘I i le pupula o le ALI‘I, ‘ona ‘ou fa‘apa‘ū faō ai lea.
5. ‘Ona fetalai mai lea o le ALI‘I ‘iā te a‘u: Le atali‘i e o le tagata, ‘ia e tu‘u i lou loto ma ‘ia va‘ava‘ai ou mata, ‘ia fa‘alogologo fo‘i ou taliga i mea uma ‘ou te fai atu ai ‘iā te oe i sauniga uma o le fale o le ALI‘I ma ana tulafono uma; ‘ia e mānatunatu i mea e ulufale mai ai i le fale, ‘atoa ma mea e ulufafo ai i le malumalu.
6. ‘E te fai atu fo‘i i ē fouvale, o le ‘āiga lea o Isaraelu, ‘Ua fa‘apea ‘ona fetalai mai o le Ali‘i le ATUA: Le ‘āiga o Isaraelu e, sōia, ‘inā tu‘u ia a ‘outou mea e ‘inosia uma,
7. ‘ona ‘ua ‘outou ‘aumaia o tagata ‘ese, o ē le peritomeina loto, e le peritomeina fo‘i tino, ‘ia i ai i lo‘u malumalu, ‘ia fa‘aleagaina ai lo‘u lava fale, ‘ina ‘ua ‘outou ‘aumaia o a‘u mea e ‘ai, o le ga‘o ma le toto, ‘ua ‘outou solia fo‘i la‘u feagaiga ‘iā ‘outou mea uma e ‘inosia.
8. ‘Ua ‘outou lē ‘ana‘ana fo‘i i le tausiga o a‘u mea pa‘ia; a ‘ua ‘outou tofia mo ‘outou lava o ē tausia a‘u mea e tausia i lo‘u malumalu.
9. ‘Ua fa‘apea ‘ona fetalai mai o le Ali‘i le ATUA: E le ulufale mai i lo‘u malumalu se tagata ‘ese, e le peritomeina le loto, e le peritomeina fo‘i le tino, o tagata ‘ese uma, o ē o i ai i le fānauga a Isaraelu.
10. O sa Levī fo‘i o ē ‘ua ō mamao ‘iā te a‘u ‘ina ‘ua ō ‘ese o Isaraelu, o i latou na ō ‘ese ‘iā te a‘u e mulimuli atu ‘iā latou tupua; e o‘o lava ‘iā te i latou le taui o a latou agasala.
11. ‘Ae fai i latou ma ‘au‘auna i lo‘u malumalu, e leoleo i puipui o le fale ma ‘au‘auna i le fale; latou te fasia le taulaga mū ma le taulaga mo le nu‘u, latou te tutū fo‘i i o latou luma e ‘au‘auna ‘iā te i latou.
12. Auā na latou ‘au‘auna ‘iā te i latou i luma o a latou tupua, o i latou fo‘i na agasala a‘i le ‘āiga o Isaraelu; o le mea lea ‘ua ‘ou si‘i ai i luga lo‘u lima ‘iā te i latou, o lo‘o o fetalai mai ai le Ali‘i le ATUA, e o‘o ‘iā te i latou le taui o a latou agasala.
13. Latou te lē fa‘alatalata mai fo‘i ‘iā te a‘u e fai le faiva o le ositaulaga ‘iā te a‘u, e le fa‘alatalata fo‘i i latou i se tasi o a‘u mea pa‘ia i le mea e sili ‘ona pa‘ia; ‘ae i ai ‘iā te i latou lo latou mā ma a latou mea e ‘inosia ‘ua latou faia.
14. ‘Ae ‘ou te fai i latou ma ē tausi i a‘u mea e tausia i lo‘u fale i galuega uma o i ai, ‘atoa ma mea uma e fai.
15. A o le ‘au ositaulaga o sa Levī, o le fānauga a Satoka, o ē na ‘ana‘ana i le tausiga o lo‘u malumalu, ‘ina ‘ua ō ‘ese le fānauga a Isaraelu ‘iā te a‘u, latou te fa‘alatalata mai ‘iā te a‘u e ‘au‘auna ‘iā te a‘u, e tutū fo‘i i latou i o‘u luma e ‘aumai ai ‘iā te a‘u le ga‘o ma le toto, o lo‘o o fetalai mai ai le Ali‘i le ATUA.
16. O i latou ia e ulufale i lo‘u malumalu, o i latou fo‘i e fa‘alatalata mai i la‘u laulau e ‘au‘auna mai ai ‘iā te a‘u, latou te tausi fo‘i i a‘u mea e tausia.
17. A latou ulufale mai i faitoto‘a o le lotoā tuloto, e ‘o‘ofu i latou i ‘ofu lino; e le ‘o‘ofu lava i latou i se ‘ofu fulufulu mamoe pe a latou ‘au‘auna i totonu o faitoto‘a o le lotoā tuloto ma totonu o le fale.
18. E pulou i latou i pulou lino, e ‘o‘ofu fo‘i i ‘ofuvae lino; e le fusi i latou i se mea e tupu ai le afu.
19. A latou ō atu i le nu‘u i le lotoā aupito i tua, o le lotoā lava e aupito i tua, latou te tō ‘ese o latou ‘ofu na latou ‘au‘auna a‘i ma tu‘u ai i potu sa, ‘ae latou ‘o‘ofu i nisi ‘ofu; latou te lē fa‘apa‘iaina fo‘i le nu‘u i o latou ‘ofu.
20. Latou te lē tafi fo‘i o latou ulu, o le tu‘u fo‘i o latou fuafuati lauulu ‘ia numi, latou te sele o latou lauulu.
21. E lē inu uaina fo‘i se tasi ositaulaga lava pe a latou ulufale mai i le lotoā tuloto.
22. Latou te lē fai avā fo‘i i se fafine ‘ua oti lana tane, po o se fafine ‘ua fa‘ate‘a e lana tane; ‘ae latou te fai avā i taupou o le fānau a le ‘āiga o Isaraelu, po o se fafine ‘ua oti lana tane sa nofo i se ositaulaga.
23. Latou te a‘oa‘o fo‘i i lo‘u nu‘u ‘ia masino mea pa‘ia ma mea e le pa‘ia, ‘ina ‘ia latou iloa le mea e le mamā ma le mea e mamā.
24. O finauga fo‘i latou te tutū ai e fai le fa‘amasinoga; latou te fa‘amasino i ai e tusa ma a‘u fa‘amasinoga; latou te tausia a‘u tulafono ma a‘u sauniga i tausamiga uma e fai ‘iā te a‘u; latou te fa‘apa‘iaina fo‘i o‘u sapati.
25. Latou te lē papa‘i ane i se tagata oti, e leaga ai i latou; ‘ae lē sa ‘ona leaga i latou ‘ona o le tamā, po o le tinā, po o se atali‘i, po o se afafine, po o se uso, po o se tuafafine e le‘i nofo tane.
26. A uma ‘ona fa‘amamāina o ia, ‘ona latou faitauina lea ‘iā te ia o aso e fitu.
27. O le aso fo‘i na te ulufale ai i le malumalu, i le lotoā tuloto, e ‘au‘auna i le malumalu, na te ‘aumaia lana taulaga mo le agasala, o lo‘o o fetalai mai ai le Ali‘i le ATUA.
28. E fai fo‘i lea ma tofi mo i latou: O a‘u o lo latou tofi; tou te lē avatu se tofi ‘iā te i latou i Isaraelu; o a‘u lava o lo latou tofi.
29. Latou te ‘a‘ai le taulaga i mea e ‘ai ma le taulaga mo le agasala ma le taulaga mo le sesē; o mea uma fo‘i e fa‘atoina i Isaraelu e fai ia mā latou.
30. O le fa‘apolopolo o le ulua‘i fua uma i mea uma, ma taulaga uma i mea uma ‘iā ‘outou taulaga uma, e fai ia mā ositaulaga; tou te avatu fo‘i a ‘outou ulua‘i paluga falaoa i le ositaulaga, ‘ina ‘ia fa‘atumauina e ia le manuia i lou ‘āiga.
31. E le ‘a‘ai fo‘i le ‘au ositaulaga se mea e tasi ‘ua mate fua, po o se mea ‘ua saeia, o se manulele, po o se manu vaefā.#