1. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2. O oe na, le atali‘i o le tagata, ‘e te fa‘amasino ‘ea? ‘e te fa‘amasino ‘ea i le ‘a‘ai o ē totolima? ‘e te fa‘aali atu ‘iā te ia o ana mea ‘inosia uma,
3. ma e fa‘apea atu, O lo‘o fa‘apea ‘ona fetalai mai o le Ali‘i le ATUA: ‘Ua fa‘amaligi le toto e le ‘a‘ai i totonu ‘iā te ia, ‘ia o‘o mai ai ona aso ma ‘ua faia fo‘i tupua mo ia, ‘ia leaga ai o ia.
4. ‘Ua e nofo sala i le toto ‘ua e fa‘amaligiina; ‘ua leaga fo‘i oe ‘iā te oe i tupua ‘ua e faia; ‘ua fa‘alatalataina e oe ou aso, ‘ua e o‘o lava i ou tausaga; o le mea lea ‘ou te tu‘u atu ai oe e fai ma luma i nu‘u ‘ese ma tauemuga i nu‘u uma.
5. O ē latalata mai ‘iā te oe, ‘atoa ma ē mamao, latou te tauemu ‘iā te oe lē ‘ua ta‘uleagaina ma ‘ua tele lou atuatuvale.
6. Fa‘auta, o ali‘i o Isaraelu o ‘iā te oe e ta‘itasi ma fa‘amalosi e fa‘amaligi i ai le toto.
7. ‘Ua ‘iā te oe i latou o ē fa‘aletaualoa i le tamā ma le tinā; ‘ua ‘iā te oe i latou o ē fa‘asauā i le tagata ‘ese; ‘ua ‘iā te oe i latou o ē fa‘asaunoa i le ‘ua aumatuā ma le fafine ‘ua oti lana tane.
8. O a‘u mea pa‘ia ‘ua e ‘ino‘ino i ai ma o‘u sapati ‘ua e solia.
9. O ‘iā te oe tagata e fe‘ave‘avea‘i ia fa‘amaligi ai le toto; o ‘iā te oe fo‘i o ē ‘a‘ai i luga o mauga; o ‘iā te oe o ē fai mea leaga lava.
10. O ‘iā te oe fo‘i ē fa‘atelenoa i o latou tamā; o ‘iā te oe ē fa‘aleaga le fafine o fa‘anofo‘eseina ‘ona o lona leaga.
11. ‘Ua fai fo‘i e le tasi mea e ‘inosia i le avā a le tasi tagata; ma ‘ua fa‘aleaga e le tasi i le ulavale le avā a lona lava atali‘i; ‘ua ‘iā te oe fo‘i le ‘ua ia fa‘aleagaina lona lava tuafafine, o le afafine o lona tamā.
12. O ‘iā te oe e ‘ua talia mea alofa e fa‘amaligi ai le toto; ‘ua e talia fo‘i le totogi fa‘asili ma mea fa‘asili; ma ‘ua e fao fa‘asauā mea a le tasi tagata, a ‘ua e fa‘agalogalo mai ‘iā te a‘u, o lo‘o fetalai mai ai le Ali‘i le ATUA.
13. Fa‘auta fo‘i, ‘ua ou pati lima i au mea ‘ua maua i le fa‘amanumanu, ‘atoa ma le toto o lo‘o i totonu ‘iā te oe.
14. E lavā ‘ea e lou loto? E malolosi ‘ea ou lima i le aso ‘ou te fa‘asala ai ‘iā te oe? O a‘u o le ALI‘I, ‘ua ‘ou fai atu ai, ‘ou te faia lava.
15. ‘Ou te fa‘ata‘ape‘apeaina oe i nu‘u ‘ese ma ‘ou fa‘asalalauina oe i nu‘u ‘ese‘ese ma ‘ou fa‘aumatia lou leaga ‘ia te‘a ma oe.
16. E fa‘aleagaina lava oe e oe i luma o nu‘u ‘ese, ‘e te iloa ai o a‘u lava o le ALI‘I.
17. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
18. Le atali‘i e o le tagata, ‘ua ‘avea le ‘āiga o Isaraelu ma otaota o u‘amea ‘iā te a‘u; o ‘apamemea i latou uma ma ‘apa sinasina ma u‘amea ma pulu i totonu o le ‘ogāumu; o otaota o ario lava i latou.
19. O le mea lea ‘ua fa‘apea ‘ona fetalai mai ai o le Ali‘i le ATUA, ‘ua ‘avea ‘outou uma ma otaota o u‘amea, o le mea lea, fa‘auta, ‘ou te fa‘apotopotoina ai lava ‘outou i totonu o Ierusalema.
20. E pei ‘ona fa‘apotopotoina o ario ma ‘apamemea ma u‘amea ma pulu ma ‘apa sinasina i totonu o le umu, e tapili ai le afi ia liu suāvai; e fa‘apea ‘ona ‘ou fa‘apotopotoina o ‘outou i lo‘u ita ma lo‘u tigā, ma ‘ou tu‘u ai ‘outou ‘ia liu suāvai.
21. ‘Ou te fa‘apotopotoina lava ‘outou ma ‘ou tapili i le afi o lo‘u ita ‘iā te ‘outou, e liu suāvai ‘outou i totonu ‘iā te ia.
22. E pei ‘ona liu suāvai o ario i totonu o le ‘ogāumu, e fa‘apea fo‘i ona liu suāvai o ‘outou i totonu ‘iā te ia; e iloa ai e ‘outou, o a‘u o le ALI‘I, ‘ua ‘ou sasa‘a atu lo‘u ita tele i luga ‘iā te ‘outou.
23. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
24. Le atali‘i e o le tagata, ‘ia e fai atu ‘iā te ia: O oe na o le lau‘ele‘ele e le fa‘amamāina ma le lē timu‘ia i le aso o le to‘atama‘i.
25. E i ai le fouvalega o ana perofeta i totonu ‘iā te ia, e pei o le leona tagi ‘ona saeia o mea; ‘ua latou fa‘aumatia tagata; ‘ua latou ‘ave ‘oloa ma mea tāua; ‘ua latou fa‘ato‘ateleina ona fafine ‘ua oti a latou tane i totonu ‘iā te ia.
26. ‘Ua solia e ana ositaulaga o la‘u tulafono, ‘ua latou fa‘aleaga fo‘i a‘u mea pa‘ia, ‘ua latou le fa‘ailogaina mea pa‘ia ma mea e le pa‘ia, ‘ua latou le fa‘ailoa fo‘i ona ‘ese‘ese o mea leaga ma mea e mamā, ‘ua latou liliu ‘ese o latou mata i o‘u sapati, ma ‘ua solia a‘u e i latou.
27. O ona ali‘i i totonu ‘iā te ia, latou te fa‘apei o luko o lo‘o saei manu, e fa‘amaligi toto ma fa‘aumatia tagata ia maua ai mea i le sauā.
28. ‘Ua vali fo‘i ana perofeta ‘iā te i latou i le panisina ‘ua va‘aia mea fa‘atauva‘a ma vavalo i mea pepelo ‘iā te i latou, ‘ua fa‘apea atu, “O lo‘o fa‘apea ‘ona fetalai mai o le Ali‘i le ATUA,” ‘ae le‘i fetalai mai lava le ALI‘I.
29. ‘Ua fa‘asauā lava tagata o le nu‘u ma ‘ua latou fao mea; ‘ua latou fa‘atigā i ē ‘ua puapuagātia ma ē ‘ua matitiva; ‘ua latou fa‘asauā fo‘i i le tagata ‘ese ‘ae le‘i fa‘amasinoina.
30. Na ‘ou sā‘ili ‘iā te i latou se tagata na te atia‘eina le pā ma tu i le mea ‘ua lepetia i o‘u luma mo le nu‘u, ‘ina ‘ia ‘ou le fa‘aumatia ai; ‘ae ‘ou te le‘i maua lava.
31. O le mea lea ‘ou te liligi atu ai lo‘u ita i luga ‘iā te i latou ma ‘ou fa‘aumatia i latou i le afi o lo‘u ita; ‘ou te tauia a latou amio i luga i o latou ulu, o lo‘o fetalai mai ai le Ali‘i le ATUA.#