1. ‘Ua o‘o mai le afioga a le ALI‘I ‘iā te a‘u, ‘ua fa‘apea mai:
2. Le atali‘i e o le tagata, ‘ia e vavalo i perofeta o Isaraelu o ē vavalo ma ‘ia e fai atu ‘iā te i latou o vavalo mai o latou lava loto, “Fa‘alogologo mai ia ‘outou i le afioga a le ALI‘I.”
3. O lo‘o fa‘apea ‘ona fetalai mai o le Ali‘i le ATUA: ‘Oi talofa i perofeta vālelea o ē usiusita‘i i o latou lava loto, ‘ae le‘i va‘aia e i latou se mea.
4. Isaraelu e, ‘ua fa‘apei o alope i le vao ou perofeta.
5. ‘Ua ‘outou le ō a‘e i mea ‘ua lepetia, ‘ua ‘outou le ati a‘e fo‘i le pā mo le ‘āiga o Isaraelu, ‘ina ‘ia tutū ai i le tau‘a i le aso o le ALI‘I.
6. ‘Ua latou va‘aia le mea fa‘atauva‘a ma ‘ua fai togafiti fa‘ataulāitu pepelo, ‘ua fa‘apea, “O lo‘o fetalai mai le ALI‘I;” ‘ae le‘i ‘a‘auina i latou e le ALI‘I; ‘ua latou fa‘atupuina fo‘i le fa‘amoemoe e fa‘ataunu‘uina le ‘upu.
7. E le‘i va‘aia ‘ea e ‘outou le fa‘aaliga fa‘atauva‘a, ma ‘outou faia le togafiti fa‘ataulāitu ‘ina ‘ua ‘outou fai atu, “O lo‘o fetalai mai le ALI‘I;” ‘ae ‘ou te le‘i fai atu lava?
8. O le mea lea ‘ua fa‘apea ‘ona fetalai mai ai o le Ali‘i le ATUA: ‘Ona ‘ua ‘outou fai atu le mea fa‘atauva‘a ma ‘ua va‘aia mea pepelo; o le mea lea, fa‘auta, ‘ou te fai ai ‘outou mo‘u fili, o lo‘o fetalai mai ai le Ali‘i le ATUA.
9. E o‘o fo‘i lo‘u lima i perofeta o ē va‘aia le mea fa‘atauva‘a, na fai togafiti fa‘ataulāitu pepelo; e lē i ai latou i le saofa‘iga a lo‘u nu‘u, e le tusia fo‘i i latou i le tusi o le ‘āiga o Isaraelu, latou te lē o‘o fo‘i i le lau‘ele‘ele o Isaraelu; e iloa ai fo‘i e ‘outou o a‘u lava o le Ali‘i le ATUA.
10. ‘Ua latou fa‘asesēina lo‘u nu‘u, o lo‘o fa‘apea atu, “E manuia;” ‘ae leai se manuia; ‘ua ati a‘e e le tasi le pā, fa‘auta fo‘i, ‘ua vali e nisi i le panisina; o le mea lea, o le mea lava lea.
11. ‘Ia e fai atu ai ‘iā te i latou o ē vali i le panisina, o sōloia; e tō timuga tetele; o oe fo‘i le uato‘a tetele, e tō ifo oe; e lepetia fo‘i le pā i le afā.
12. Fa‘auta fo‘i, a solo le pā, e lē fai atu ‘ea ‘iā te ‘outou, “O ifea ‘ea le panisina na ‘outou vali a‘i?”
13. O le mea lea ‘ua fa‘apea ‘ona fetalai mai ai o le Ali‘i le ATUA: ‘Ou te lepetia lava i le afā i lo‘u ita tele, e tō timuga tetele i lo‘u ita ma uato‘a tetele i lo‘u ita tele, e fa‘aumatia ai.
14. ‘Ou te lepetia ai lava le pā na ‘outou valia i le panisina, ‘ou te fa‘agatasia lava ma le ‘ele‘ele, e aliali ai ona fa‘avae; e solo lava ia, e fa‘aumatia ai fo‘i ‘outou i totonu; e iloa ai e ‘outou o a‘u lava o le ALI‘I.
15. ‘Ou te fa‘auma atu ai lo‘u ita tele i le pā, ‘atoa ma i latou o ē na latou valia i le panisina ‘ou te fai atu fo‘i ‘iā te ‘outou, ‘Ua leai se pā, ‘ua leai fo‘i ē na valia.
16. O perofeta ia o Isaraelu o ē vavalo ia Ierusalema ma ē iloa fa‘aaliga o le manuia mo ia, ‘ae leai se manuia, ‘ua fetalai mai ai le Ali‘i le ATUA.
17. O oe fo‘i le atali‘i o le tagata, ‘ia e fa‘asaga atu i fafine o lou nu‘u, o ē vavalo mai o latou lava loto ma ‘ia e vavalo atu ‘iā te i latou,
18. ma e fai atu, O lo‘o fa‘apea ‘ona fetalai mai o le Ali‘i le ATUA:‘Oi talofa i fafine o ē su‘i aluga mo tulilima uma, ma fai pulou mo ulu o tupulaga uma e mailei a‘i tagata. Tou te tau mailei ‘ea i tagata o lo‘u nu‘u, tou te fa‘aolaina ‘ea fo‘i o i latou o ē ō ane ‘iā te ‘outou?
19. Tou te fa‘aleagaina ‘ea a‘u i lo‘u lava nu‘u ‘ona o lu‘utaga o karite ma fasi areto, ‘ina ‘ia fasiotia ai tagata e lē tatau ‘ona oti ma fa‘aolaina tagata e lē tatau ‘ona ola, i lo ‘outou tala pepelo atu i lo‘u nu‘u o ē fa‘alogo atu i la ‘outou tala pepelo.
20. O le mea lea, ‘ua fa‘apea ‘ona fetalai mai ai o le Ali‘i le ATUA: Fa‘auta, ‘ou te fai mo‘u fili o ‘outou aluga tou te mailei a‘i agaga ‘ina ‘ia felelei ai i latou, ‘ou te saeia lava ai o ‘outou lima ma tu‘uina atu i latou e ō, o agaga ia tou te taumailei ai ‘ina ‘ia felelei.
21. ‘Ou te saeia fo‘i o ‘outou pulou ma lavea‘iina lo‘u nu‘u a‘i o ‘outou lima, e lē toe i ai lava i latou i o ‘outou lima ‘ina ‘ia mailei ai; tou te iloa ai fo‘i o a‘u lava o le ALI‘I.
22. ‘Ua ‘outou fa‘atigāina loto o ē amiotonu i ‘upu pepelo, o ē ‘ua lē fa‘atigāina e a‘u ma ‘ua ‘outou fa‘amalosi i lē amio leaga, ‘ia lē liliu ai o ia ai lana amio leaga ‘ina ‘ia fa‘aolaina o ia.
23. O le mea lea tou te lē toe va‘aia le mea fa‘atauva‘a, pe fai togafiti fa‘ataulāitu, auā ‘ou te lavea‘iina lo‘u nu‘u a‘i o ‘outou lima; tou te iloa ai o a‘u lava o le ALI‘I.#