Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36
  37. 37
  38. 38
  39. 39
  40. 40
  41. 41
  42. 42
  43. 43
  44. 44
  45. 45
  46. 46
  47. 47
  48. 48

Feagaiga Tuai

Feagaiga Fou

Esekielu 34 O LE TUSI PA'IA - Ekalesia Katoliko Roma (RSCB)

O Leoleo Mamoe o Isaraelu

1. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:

2. Le atali‘i e o le tagata ‘ia e vavalo atu i leoleo mamoe o Isaraelu, ‘inā vavalo atu ia ma e fai atu ‘iā te i latou, o leoleo mamoe lava, ‘Ua fa‘apea ‘ona fetalai mai o le Ali‘i le ATUA: ‘Oi talofa i leoleo mamoe o Isaraelu o ē fafaga ‘iā te i latou lava! E lē tatau ‘ea i leoleo mamoe ‘ona fagaina o le lafu?

3. ‘Ua ‘outou ‘a‘ai le ga‘o ma ‘o‘ofu i le fulufulu, ‘ua ‘outou fasia ē ‘ua pepeti, a ‘ua ‘outou le fafaga i le lafu.

4. ‘Ua ‘outou le fa‘amalosia e ‘ua vaivai; ‘ua ‘outou le fa‘amālōlō i lē ‘ua ma‘i; ‘ua ‘outou le fusia fo‘i le ‘ua gau; o le ‘ua tulia ‘ua ‘outou le toe ‘aumaia, o lē ‘ua sē na ‘outou le sā‘ilia; a ‘ua ‘outou pule fa‘amalosi ma fa‘asauā ‘iā te i latou.

5. Na fa‘ata‘ape‘apeina fo‘i i latou ‘ina ‘ua leai se leoleo mamoe; na fai fo‘i i latou ma mea e ‘ai ma manu fe‘ai uma o le vao, ‘ina ‘ua fa‘ata‘ape‘apeina i latou.

6. Na sē la‘u lafu i mauga uma ma mea maualuluga uma; na fa‘ata‘ape‘apeina fo‘i la‘u lafu i le fogā‘ele‘ele uma, ‘ae leai sē na su‘esu‘e i ai, e leai fo‘i sē na sā‘ilia.

7. O le mea lea, leoleo mamoe e, ‘ia ‘outou fa‘alogo mai i le afioga a le ALI‘I;.

8. ‘ua fetalai mai le Ali‘i le ATUA: ‘Ou te ola a‘u, na ‘avea lava la‘u lafu ma mea e saeia, na ‘avea fo‘i la‘u lafu ma mea e ‘ai a manu fe‘ai uma o le vao, ‘ina ‘ua leai se leoleo mamoe, ‘ua lē su‘eina fo‘i e a‘u leoleo mamoe la‘u lafu, a o leoleo mamoe ‘ua fafaga i latou ‘iā te i latou lava, ‘ae le‘i fagaina e i latou la‘u lafu;

9. o le mea lea, leoleo mamoe e, ‘ia ‘outou fa‘alogo mai i le afioga a le ALI‘I;

10. ‘ua fa‘apea ‘ona fetalai mai o le Ali‘i le ATUA, Fa‘auta, ‘ou te faia ia leoleo mamoe mo‘u fili; ‘ou te su‘eina atu fo‘i la‘u lafu ‘iā te i latou, ‘ou te fa‘ate‘aina i latou ‘ia lē toe fafaga le lafu; o leoleo mamoe fo‘i latou te lē toe fafaga lava ‘iā te i latou; auā ‘ou te lavea‘iina la‘u lafu i o latou gutu, ‘ina ‘ia lē fai i latou ma mea e ‘ai mā latou.

O le Leoleo Mamoe Lelei

11. Auā ‘ua fa‘apea ‘ona fetalai mai o le Ali‘i le ATUA: Fa‘auta, o a‘u, o a‘u lava, ‘ou te su‘eina la‘u lafu, ‘ou te matuā su‘esu‘e lava i ai.

12. E pei o le leoleo mamoe ‘ona su‘eina o lana lafu i le aso o i ai o ia i lana lafu ‘ua ta‘ape‘ape; e fa‘apea ‘ona ‘ou su‘eina la‘u lafu ma ‘ou lavea‘iina i latou a‘i mea uma ‘ua salalau ai i latou i le aso fa‘amalumalu ma le pogisā.

13. ‘Ou te ‘aumaia fo‘i i latou nai nu‘u ma ‘ou fa‘apotopotoina i latou mai nu‘u ‘ese‘ese; ‘ou te ‘aumaia i latou i lo latou lava lau‘ele‘ele ma fagaina i latou i mauga o Isaraelu, i tafatafa o vaitafe ma mea uma e ‘ainā o le nu‘u.

14. ‘Ou te fafaga ‘iā te i latou i le taaga lelei, e i ai o latou lotoā i mauga maualuluga o Isaraelu; latou te ta‘o‘oto ai i le lotoā lelei, o le taaga lelei fo‘i e ‘a‘ai ai i latou i mauga o Isaraelu.

15. ‘Ou te fagaina la‘u lafu, o a‘u fo‘i e ta‘o‘oto ai i latou, o lo‘o fetalai mai ai le Ali‘i le ATUA.

16. ‘Ou te sā‘ilia fo‘i lē ‘ua sē, ‘ou te ‘aumaia lē ‘ua tulia, ‘ou te fusia lē ‘ua gau, ‘ou te fa‘amalosia le ‘ua vaivai; a o lē ‘ua peti ma lē ‘ua malosi ‘ou te fa‘aumatia ia, ‘ou te fagaina i latou i le fa‘amasinoga.

17. ‘Ua fa‘apea ‘ona fetalai mai o le Ali‘i le ATUA: O ‘outou o la‘u lafu e, fa‘auta, ‘ou te fa‘amasino i manu ma manu, o mamoe po‘a ma ‘oti po‘a.

18. O le mea māmā ‘ea ‘iā te ‘outou ‘ina ‘ua lē na ‘ona ‘outou ‘a‘ai i taaga lelei, a ‘ua ‘outou solia i o ‘outou vae o mea ‘ua totoe i taaga; ‘ua lē na ‘ona ‘outou inu fo‘i i vai manino, a ‘ua ‘outou fa‘agāepu i o ‘outou vae o vai ‘ua totoe.

19. O la‘u lafu fo‘i ‘ua latou ‘a‘ai mea ‘ua solia i o ‘outou vae ma latou inu le vai ‘ua fa‘agāepuina i o ‘outou vae.

20. O le mea lea ‘ua fa‘apea ‘ona fetalai mai ai o le Ali‘i le ATUA ‘iā te i latou: Fa‘auta, o a‘u, o a‘u lava, ‘ou te fa‘amasino i manu pepeti ma manu pā‘e‘e‘e.

21. ‘Ua ‘outou tulei i o ‘outou itū ma ‘outou ālagalima ma ‘ua ‘outou suatia ē ‘ua vaivai uma i o ‘outou nifo, ‘ua o‘o ‘ina ‘outou fa‘ata‘ape‘apeina i latou i tuāpā.

22. O le mea lea ‘ou te fa‘aolaina ai la‘u lafu, e lē toe fai lava i latou ma mea e saeia; ‘ou te fa‘amasino fo‘i i lea manu ma lea manu.

23. ‘Ou te fa‘atūina fo‘i le leoleo mamoe e tasi ‘iā te i latou, na te fagaina i latou, o la‘u ‘au‘auna o Tavita; o ia na te fagaina i latou, e fai fo‘i o ia ma leoleo mamoe ‘iā te i latou.

24. O a‘u nei fo‘i o le ALI‘I e fai a‘u mo latou Atua, o la‘u ‘au‘auna fo‘i o Tavita e fai o ia ma ali‘i sili ‘iā te i latou; o a‘u o le ALI‘I ‘ua ‘ou fai atu ai.

25. ‘Ou te osia fo‘i ma i latou le feagaiga e manuia ai, ‘ou te fa‘aumatia manu fe‘ai i le nu‘u; latou te nonofo fīfīlemū ai i le vao ma momoe i le vao matua.

26. O i latou ma mea o vagavagai lo‘u mauga ‘ou te ‘avea ia ma mea e manuia ai; ‘ou te fa‘atotō ifo le ‘ua i ona lava po; e i ai uaga e manuia ai.

27. E fua mai le la‘au o le fanua lona fua; e fua mai fo‘i le lau‘ele‘ele lona fua latou te nonofo filemū fo‘i i le latou nu‘u; ‘ona latou iloa ai lea o a‘u lava o le ALI‘I pe a ‘ou gagauina a latou amo ma ‘ou lavea‘iina i latou a‘i lima o ē na fa‘apologaina i latou.

28. E lē toe fai lava i latou ma mea e saeia i nu‘u ‘ese, e lē ‘aina fo‘i i latou e manu fe‘ai e tata‘a; ‘ae latou te nonofo fīfīlemū, e leai fo‘i sē na te fa‘amata‘u ‘iā te i latou.

29. ‘Ou te fa‘atupuina fo‘i mo i latou le fa‘ato‘aga e ta‘ua, e lē toe fa‘aumatia i latou i le fia ‘ai i le nu‘u, e lē toe o‘o lava ‘iā te i latou le fa‘amasiasiga o nu‘u ‘ese.

30. ‘Ona latou iloa ai lea o a‘u lava o le ALI‘I lo latou Atua, ‘ou te ‘iā te i latou; o i latou fo‘i le ‘āiga o Isaraelu o lo‘u nu‘u lava i latou, o lo‘o fetalai mai ai le Ali‘i le ATUA.

31. O ‘outou fo‘i la‘u lafu, o le lafu o la‘u taaga, o tagata lava ‘outou; o a‘u fo‘i o lo ‘outou Atua, o lo‘o fetalai mai ai le Ali‘i le ATUA.#