1. ‘Ua ia vala‘au mai fo‘i ma le leo tele, o lo‘o ‘ou fa‘alogo atu, na fa‘apea mai, “‘Ia fa‘alatalata mai o ē taui atu i le ‘a‘ai, ‘ia ta‘itasi ma lana mea e fasi a‘i i lona lima.”
2. Fa‘auta fo‘i, ‘ua ō mai tagata e to‘aono i le ala o le faitoto‘a aupitoaluga e fesagai ma le itū i matū, ta‘itasi ma lana mea e ta a‘i i lona lima; a o le tasi tagata o i latou ‘ua ‘ofu i le ‘ie lino, ‘ua tau i lona itū le fagu vaitusi a le tusi‘upu, ‘ua latou ulufale atu, ‘ona latou tutū lea e lata ane i le fata ‘apamemea.
3. ‘Ona alu a‘e lea o le pupula o le Atua o Isaraelu nai luga o le kerupi sa i ai i ona luga, ‘ua o‘o i le faitoto‘a o le fale. Na ia vala‘au i le tagata ‘ua ‘ofu i le ‘ie lino, o lē ‘ua tau i lona itū le fagu vaitusi a le tusi‘upu.
4. ‘Ona fetalai mai lea o le ALI‘I ‘iā te ia, “‘Inā ui ane ia i totonu o le ‘a‘ai, i totonu lava o Ierusalema, ma e fa‘ailogaina muaulu o tagata o ē mapuitigā, ma feoi ‘ona o mea ‘inosia uma ‘ua latou fai i ai.”
5. ‘Ua ia fai atu fo‘i ‘iā i latou na, o lo‘o ‘ou fa‘alogo atu, “Ui ane ia ‘outou i le ‘a‘ai, ‘ia mulimuli atu ‘iā te ia, ma ‘ia ‘outou fafasi; ‘aua tou te fa‘asaoina, ‘aua le fa‘apelepeleina.
6. ‘Ia ‘outou matuā fasiotia lava toeaina ma taulele‘a ma taupou ma tamaiti, ‘atoa ma fafine; ‘ae ‘aua le fa‘alatalata i se tagata ‘ua i ai le fa‘ailoga; ‘ia amata fo‘i i lo‘u malumalu.” ‘Ona latou amata lea i tagata o toeaina lava o ē na i luma o le fale.
7. ‘Ua ia fai atu fo‘i ‘iā te i latou, “‘Inā ‘outou fa‘aleaga ia le fale ma fa‘atūtūmuina lotoā i ē ‘ua fasia; ‘inā ō atu ia ‘outou.” ‘Ona latou ō atu ai lea, ‘ua latou fafasi i le ‘a‘ai.
8. O lo‘o latou o fafasi, ‘ua tu‘ua a‘u, ‘ona ‘ou fa‘apa‘ū faō ai lea ma ‘ou ‘alaga atu, ‘ua fa‘apea atu, “Auē, le Ali‘i e, le ATUA ‘e te fa‘aumatia ‘ea ē ‘ua totoe uma ‘iā Isaraelu ‘ina o e sasa‘aina o lou to‘asā i luga o Ierusalema?”
9. ‘Ona fetalai mai ai lea o ia ‘iā te a‘u, “‘Ua matuā silisili lava le amio leaga a le ‘āiga o Isaraelu ‘atoa ma Iuta, ‘ua tumu le nu‘u i le toto, ‘ua tumu le ‘a‘ai i le amio fa‘api‘opi‘o; auā ‘ua fa‘apea i latou, ‘‘Ua lafoa‘i e le ALI‘I le lalolagi; ‘ua lē silafia lava e le ALI‘I.’
10. O a‘u nei fo‘i, ‘ou te lē fa‘asaoina, ‘ou te lē fa‘apelepeleina; ‘ou te taui atu a latou amio i luga i o latou ulu.”
11. Fa‘auta fo‘i, o le tagata ‘ua ‘ofu i le ‘ie lino, o lē ‘ua tau le fagu vaitusi i lona itū, ‘ua fai mai o ia, ‘ua fa‘apea, “‘Ua ‘ou faia e pei ‘ona e fetalai mai ai ‘iā te a‘u.”