1. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2. Le atali‘i e o le tagata, ‘ia e fa‘ailoa atu ‘iā Ierusalema o ana mea e ‘inosia,
3. ma e fai atu ai, O lo‘o fa‘apea ‘ona fetalai mai o le Ali‘i le ATUA ‘iā Ierusalema:O lou tupuga ma lou fānau mai, nai le nu‘u o Kanana ia; o lou tamā o lo sa Amorī, o lou tinā o lo sa Hetī.
4. O lou fānau mai fo‘i, o le aso na fānau ai oe na lē taia lou pute, e le‘i mulumuluina fo‘i oe i le vai ia fa‘amamāina ai oe; e le‘i fa‘amasimaina oe i le masina ma ‘ua lē auia lava oe.
5. E leai sē na ia alofa ‘iā te oe e fai ai se tasi o ia mea ‘iā te oe, e agalelei ‘iā te oe; ‘ae peita‘i na lafoa‘iina oe i le fogā‘ele‘ele, na ‘inosia ai oe i le aso na fānau ai oe.
6. Na ‘ou ui ane i le mea sa e i ai, na ‘ou iloa fai oe o ta‘atia i lou toto, ‘ona ‘ou fai atu ai lea ‘iā te oe ‘ina ‘ua e i lou toto, Ola ia. Na ‘ou fai atu lava ‘iā te oe ‘ina ‘ua e i lou toto, “Ola ia.
7. ma ‘ou fa‘ato‘ateleina oe e pei o moemoe o le vao.” Na e tupu lava ‘ua matua, ma ‘ua e matuā lālelei lava; ‘ua popona ou susu, ‘ua tupu ou fulufulu, a o oe sa lē ufitia ma lē lavalavā.
8. Na ‘ou ui ane i le mea sa e i ai ma ‘ou va‘ai ‘iā te oe, fa‘auta, o lou tausaga, o le tausaga o le alofa lea, ‘ona ‘ou fa‘aafu lea ‘iā te oe i lo‘u pito ‘ofu e ufitia ai lou lē lavalavā. Na ‘ou tautō fo‘i ‘iā te oe ma ta osia le feagaiga ma a‘u, ‘ona fai ai lea oe mo‘u, ‘ua fetalai mai ai le Ali‘i le ATUA.
9. Na ‘ou mulumulu ‘iā te oe i le vai ma ‘ou fa‘amamāina lou toto sa ‘iā te oe ma ‘ou u‘u ‘iā te oe i le suāu‘u.
10. Na ‘ou fa‘a‘ofuina oe i le ‘ofu lanu ‘ese‘ese ma ‘ou fa‘ase‘eina oe i le pa‘u takesa ma ‘ou fusi ‘iā te oe i le ‘ie vavae ma ‘ou ufiufi ‘iā te oe i le silika.
11. Na ‘ou teu fo‘i ‘iā te oe i mea e matagofie a‘i, ma ‘ou avane taulima i ou lima ma le asoa i lou ua.
12. Na ‘ou avane fo‘i le mama i lou isu ma mama taliga i ou taliga ma le pale lālelei i lou ulu.
13. Na teua lava oe i auro ma ario o ou ‘ofu fo‘i, o le ‘ie vavae ma le silika ma le ‘ie lanu ‘ese‘ese; o le falaoa lelei fo‘i ma le meli ma le u‘u na e ‘ai ai; na matuā lālelei lava oe, na manuia fo‘i oe na fai ma mālō.
14. Na o‘o atu fo‘i i nu‘u ‘ese le logo o lou lālelei; auā sa ‘atoa lea i lou matagofie na ‘ou tu‘uina atu ai ‘iā te oe, o lo‘o fetalai mai ai le Ali‘i le ATUA.
15. ‘Ae peita‘i na e fa‘atuatua i lou lālelei ma e mulilua ‘ona o lou logo ma sasa‘a atu au muliluaga ‘iā te i latou uma na ui ane; na fai ia mo i latou.
16. Na e ‘avea fo‘i ni ou ‘ofu ma teteuina ai au mea maualuluga i lanu ‘ese‘ese ma e talitane ai; e le‘i o‘o mea fa‘apea, i le e lē faia lava.
17. ‘Ua e ‘avea fo‘i au mea matagofie na fai i au auro ma au ario na ‘ou avatu ‘iā te oe ma ‘ua e faia fa‘atusa o tane ma oe ma talitane ‘iā i latou.
18. ‘Ua e ‘avea fo‘i ou ‘ofu lanu ‘ese‘ese ma fa‘a‘ofu a‘i i latou ma ‘ua e tu‘uina atu ou u‘u ma au mea manogi i luma ‘iā te i latou.
19. O au mea e ‘ai fo‘i na ‘ou foa‘i atu ‘iā te oe, o falaoa lelei ma u‘u ma meli na ‘ou fagaina ai oe, ‘ua e laulauina fo‘i i o latou luma e fai a‘i se mea manogi lelei. Sa fa‘apea lava, o lo‘o fetalai mai ai le Ali‘i le ATUA.
20. ‘Ua e ‘avea fo‘i au tama tane ma au tama teine na e fānau mai ‘iā te a‘u ma ‘ua e fai i latou ma taulaga ‘iā te i latou ‘ina ‘ia fa‘aumatia ai. O le mea māmā ‘ea lea i lou talitane,
21. ‘ina ‘ua e fasioti i lau fānau ma ‘ua e tu‘uina atu i latou ‘ia fa‘aui ane i latou i le afi mo i latou?
22. O au mea e ‘inosia uma ma lou talitane uma, na e lē manatua ona aso a o e teineitiiti, ‘ina ‘ua lē ufitia ai oe ma ‘ua lē lavalavā ma ‘ua ta‘atia i lou toto.
23. ‘Ua uma fo‘i ‘ona e fai o au amio leaga uma, (‘Oi talofa, ‘oi talofa ‘iā te oe! o lo‘o fetalai mai ai le Ali‘i le ATUA;)
24. ‘ona e fai ai lea mo oe o le fale ta‘a ma ‘ua e fai mea maualuluga i malae uma.
25. ‘Ua e fai au mea maualuluga i tulu‘iga o ala uma, ‘ua e fa‘a‘inosia lou lālelei, ‘ua talia fo‘i i latou uma na ui ane ai ma ‘ua e fa‘ateleina lava lou talitane.
26. ‘Ua e mulilua i tagata Aikupito ‘ua ‘outou tuā‘oi, o e tino latetele ma ‘ua fa‘ateleina lou talitane e fa‘a‘ono‘ono mai ai ‘iā te a‘u.
27. Fa‘auta fo‘i, ‘ua ‘ou fa‘aloaloa atu lo‘u lima i luga ‘iā te oe ma ‘ua ‘ou fa‘aitiitia au mea e ‘ai e tatau mā oe, ‘ua ‘ou tu‘uina atu fo‘i oe i le pule ‘ae ‘ua ‘ino‘ino ‘iā te oe, o afafine ia o Filisitia o ē ‘ua mamā au amio ulavale.
28. ‘Ua e talitane fo‘i i tagata Asuria ‘ina ‘ua e le malie lava, ‘ua e talitane lava ‘iā te i latou, a ‘e te lē āu malie lava.
29. ‘Ua e fa‘ateleina fo‘i lou talitane i le nu‘u o Kanana ‘ua o‘o i Kaletaia, a ‘ua e le malie ai lava.
30. ‘Ua fa‘apea ‘ona vaivai o lou loto, o lo‘o fetalai mai ai le Ali‘i le ATUA, ‘ina ‘ua e faia o ia mea uma, o mea lava ‘ua fai e le fafine talitane ma le fa‘amatāitu;
31. ‘ina ‘ua e fai lou fale ta‘a i tulu‘iga o ala uma, ma ‘ua e fai au mea maualuluga i malae uma, mōna ‘ua e le fa‘apei o se talitane le ‘ua tete‘e i le totogi;
32. ‘ae pei o le avā ‘ua mulilua, o lē talia tane ‘ese ‘ae tu‘u lana lava tane.
33. E avatua totogi i fafine talitane uma, a o oe ‘ua e foa‘i atu au totogi ‘iā te i latou uma o ē manana‘o ‘iā te oe ma ‘ua e taui ‘iā te i latou ‘ia latou ō ane ‘iā te oe mai itū uma ‘ona o au muliluaga.
34. ‘Ua ‘ese lava oe i nisi fafine i lou talitane, ‘ina ‘ua leai sē mulimuli atu ‘iā te oe e faita‘aga ai; ma ‘ua e avatu se totogi, ‘ae leai se totogi e avane ‘iā te oe; o le mea lea ‘ua ‘ese ai oe.
35. O le mea lea, le fafine talitane e, ‘ia e fa‘alogo mai ia i le afioga a le ALI‘I.
36. O lo‘o fa‘apea ‘ona fetalai mai o le Ali‘i le ATUA; ‘ua e sasa‘a atu au tupe ma ‘ua fa‘aalia lou tino i lou talitane ‘ua fai ma ē ‘ua e mana‘o i ai, ‘atoa ma au tupua uma e ‘inosia ma le toto o au fānau, na e avatu ‘iā te i latou;
37. fa‘auta, o le mea lea ‘ou te fa‘apotopotoina ai i latou uma ‘ua e mana‘o i ai, o i latou ‘ua e fiafia i ai, ma i latou uma ‘ua e naunau i ai, ‘atoa ma i latou uma ‘ua e ‘ino‘ino i ai; ‘ou te fa‘apotopotoina lava i latou ‘iā te oe, mai itū uma ‘ia leaga ai oe ma ‘ou fa‘aalia ‘iā te i latou lou tino, ‘ina ‘ia latou iloa lou tino uma.
38. ‘Ou te fa‘asala fo‘i ‘iā te oe, e pei ‘ona fa‘asalaina o fafine mulilulua ma ē ‘ua fa‘amaligi toto, ma ‘ou avatu ‘iā te oe le toto i le ita tele ma le fuā.
39. ‘Ou te tu‘uina atu fo‘i oe i o latou lima, latou te lepetia lou fale ta‘a ma lafo i lalo au mea maualuluga; latou te tō‘eseina fo‘i ou ‘ofu ma ‘ave au mea matagofie, latou te tu‘ua oe e le ufiufitia ma le lē lavalavā.
40. Latou te ta‘ita‘iina a‘e le motu o tagata ‘iā te oe, latou te fetogi ‘iā te oe i ma‘a ma latou fasiotia oe ‘iā latou pelu.
41. Latou te susunu fo‘i ou fale i le afi, latou te fa‘asalaina fo‘i oe i luma o fafine e to‘atele; ‘ou te fa‘agataina lou talitane, ‘e te lē toe avatu lava se totogi.
42. ‘Ou te fa‘ai‘uina ai lo‘u ita tele ‘iā te oe, ‘ona mavae ai lea o lo‘u fuā ‘iā te oe; ‘ona ‘ou filemū ai lea ma ‘ou le toe ita lava.
43. ‘Ua e lē manatua aso ‘ina o e teineitiiti, a ‘ua e fa‘a‘ono‘ono mai ‘iā te a‘u i ia mea uma; fa‘auta, o le mea lea ‘ou te taui atu ai lau amio i luga o lou ulu o lo‘o fetalai mai ai le Ali‘i le ATUA, e lē toe fai lea mea leaga e fa‘aopoopo i au mea uma e ‘inosia.
44. Fa‘auta, o i latou uma o ē fai ‘upu fa‘atusa latou te fai le fa‘atusa ‘iā te oe, e fa‘apea ane, “E pei o le tinā lana tama.”
45. O le tama oe a lou tinā, o le na ‘ino‘ino i lana tane ma lana fānau; o le uso fo‘i oe o ou uso o ē na ‘ino‘ino ‘iā latou tane ma a latou fānau; o lo ‘outou tinā o lo sa Hetī, o lo ‘outou tamā o lo sa Amorī.
46. O lou uso e matua, o Samaria lea, o ia ma ana tama fafine ‘ua nofo i lou itū tauagavale ma lou uso itiiti o lē nofo i lou itū taumatau, o Sotoma lea ma ana tama.
47. A ‘ua e lē savali i o latou ala, ‘ua e lē fai fo‘i e tusa ma a latou mea e ‘inosia, a ‘ua e ‘ino‘ino i lea e peiseaī se mea itiiti, e sili lava ‘ona leaga o au amio uma ‘iā latou.
48. ‘Ua fetalai mai le Ali‘i le ATUA, o lo‘o ola a‘u, e le‘i faia e Sotoma lou uso o ia ma ana tama, e pei ‘ona faia e oe ma au tama.
49. Fa‘auta, o le agasala nei a lou uso o Sotoma, na ‘iā te ia ma ana tama, o le fa‘amaualuga, o le tele o mea e ‘ai ma le matuā nofonofo fa‘atalanoa, na ia le fesoasoani fo‘i i lē puapuagā ma lē mativa.
50. Sa latou fa‘amaualuluga ma fai mea e ‘inosia i o‘u luma; o le mea lea na ‘ou ‘ave‘eseina ai i latou e tusa ma mea na ‘ou iloa.
51. E le‘i faia e Samaria le vaeluagalemū o au agasala; a ‘ua e fa‘ateleina au mea e ‘inosia, ‘ua sili lava ‘iā te i latou; o au mea e ‘inosia uma ‘ua e faia ‘ua ta‘uamiotonuina ai ou uso.
52. O oe fo‘i o lē ‘ua fa‘asalaina atu ou uso, ia ‘iā te oe lou lava mā ‘ona o au agasala uma ‘ua e fai, e sili ‘ona leaga i ‘iā latou; e sili ona amiotonu i latou ‘iā te oe; o oe fo‘i ia e māsiasi ma ia ‘iā te oe lou mā ‘ina ‘ua e ta‘uamiotonuina ou uso.
53. ‘Ou te fa‘afoisia la latou tāfeaga, o le tāfeaga fo‘i a Sotoma ma ana tama ma le tāfeaga a Samaria ma ana tama; ‘atoa ma le tāfeaga a lou nu‘u ‘ua tāfea e fa‘atasi ma i latou:
54. ‘ina ‘ia e mā lava ma ‘ia e māsiasi, ‘ona o mea uma ‘ua e faia i lou fa‘amafanafana atu ‘iā te i latou.
55. E toe fo‘i ou uso o Sotoma ma ana tama i ona tuga tuai, o Samaria fo‘i ma ana tama e toe fo‘i i ona tuga tuai i latou; o oe fo‘i ma au tama e toe fo‘i ‘outou i ona tuga tuai.
56. ‘Ae le‘i ta‘ua lou uso o Sotoma i lou gutu i ona po o lou fa‘amaualuga,
57. a o le‘i fa‘aalia lau amio leaga, e pei o ona po na fāifaia ai oe e tama fafine a Suria, ‘atoa ma i latou i ona itū uma, o afafine o Filisitia, o ē na ‘ino‘ino ‘iā te oe i itū uma.
58. O lau amio leaga ma au mea e ‘inosia ‘ua tauia ‘iā te oe, o lo‘o fetalai mai ai le ALI‘I.
59. Auā ‘ua fa‘apea ‘ona fetalai mai o le Ali‘i le ATUA: ‘Ou te fai lava ‘iā te oe e pei ‘ona e faia, ‘ua e fa‘alēaogāina le tautō i lou soli o le feagaiga.
60. ‘Ae ‘ou te manatua la tā feagaiga ma a‘u i ona po ‘ina o e teineitiiti, ‘ou te fa‘atumauina fo‘i ‘iā te oe i le feagaiga e fa‘avavau.
61. ‘Ona e manatua ai lea au amio, ‘ona e māsiasi ai lea pe a e talia ou uso o ē matutua ‘iā te oe ‘atoa ma ē iti ‘iā te oe; ‘ou te avatua fo‘i i latou ‘iā te oe e fai ma au tama, ‘ae lē o lau feagaiga e ala ai.
62. ‘Ou te fa‘atumauina fo‘i la tā feagaiga ma oe; ‘e te iloa ai o a‘u lava o le ALI‘I;
63. ‘ina ‘ia e mānatunatu ma ‘ia e mā ma ia le toe tautala lava ‘ona o lou māsiasi, pe a ou fa‘amāgalo atu ‘iā te oe i mea uma ‘ua e faia, o lo‘o fetalai mai ai le Ali‘i le ATUA.#