1. ‘Ua ia ta‘ita‘i fo‘i ‘iā te a‘u i le puipui, o le puipui lea ‘ua fa‘asaga i sasa‘e;
2. fa‘auta fo‘i, o le pupula o le Atua o Isaraelu ‘ua afio mai mai sasa‘e; o lona si‘ufofoga fo‘i e pei o le ta‘alili o le vai e tele; ‘ua malamalama fo‘i le lalolagi i lona pupula.
3. E pei ‘ona tino mai o le fa‘aaliga na ‘ou iloa, e pei o le fa‘aaliga lava na ‘ou iloa ‘ina ‘ua ‘ou sau e fa‘aumatia le ‘a‘ai; o fa‘aaliga fo‘i e pei o le fa‘aaliga na ‘ou iloa i le vaitafe o Kepara; ‘ona ‘ou fa‘apa‘ū faō ai lea.
4. ‘Ua afio mai fo‘i le pupula o le ALI‘I i le fale na ala mai i le faitoto‘a e fa‘asaga i sasa‘e.
5. ‘Ona si‘itia lea o a‘u e le Agaga, ‘ua ia ‘aumai fo‘i ‘iā te a‘u i le lotoā tuloto; fa‘auta fo‘i, ‘ua tumu le fale i le pupula o le ALI‘I.
6. ‘Ona ‘ou fa‘alogo atu lea, ‘ua tulei mai lona si‘ufofoga ‘iā te a‘u ai totonu o le fale; ‘ua tu mai fo‘i le tagata i o‘u tafatafa,
7. ‘ua ia fa‘apea mai fo‘i ‘iā te a‘u: Le atali‘i e o le tagata, o le mea i ai lo‘u nofoāli‘i ma le mea tutū ai o‘u alofivae, ‘ou te nofo ai e fa‘atasi ma le fānauga a Isaraelu e fa‘avavau, o le toe fa‘aleagaina fo‘i lo‘u igoa pa‘ia e le ‘āiga o Isaraelu, o i latou ma o latou tupu ‘iā latou faita‘aga, e lē toe leaga fo‘i i tino oti o latou tupu ‘iā latou mea maualuluga,
8. i lo latou tu‘uina o lo latou faitoto‘a i tafatafa o ‘ou faitoto‘a ma la latou pou o le faitoto‘a i tafatafa o a‘u pou, o le pā fo‘i na vā a‘i i latou ma a‘u, ‘ua fa‘aleagaina fo‘i lo‘u igoa pa‘ia ‘iā latou mea e ‘inosia ‘ua latou faia; o le mea lea ‘ua ‘ou fa‘aumatia ai i latou i lo‘u ita.
9. O lenei, ‘ia latou lafoa‘i a latou faita‘aga ma tino oti o latou tupu, ‘ia mamao ‘iā te a‘u, ‘ona ‘ou nofo ai lea fa‘atasi ma i latou e fa‘avavau.
10. O oe na le atali‘i o le tagata, ‘ia e fa‘aali atu le fale i le ‘āiga o Isaraelu, ‘ina ‘ia latou māsiasi ‘iā latou amio leaga; ‘ia latou fuatia fo‘i lenā fa‘atusa.
11. ‘Āfai fo‘i e māsiasi i latou ‘ona o mea uma ‘ua latou faia, ‘inā fa‘ailoa atu ia ‘iā te i latou le tino o le fale ma lona fa‘atusa ma ona ala e ulufafo ai ma ona ala e ulufale mai ai ma ona tino mai uma ma ona sauniga uma ma ona tino mai uma ma ana tulafono uma; ia e tusi ai i o latou luma, ‘ina ‘ia latou tausia lona tino mai uma ma ona sauniga uma ma latou faia.
12. O le tulafono lenei o le fale: O le tumutumu o le mauga, o ona tuā‘oi uma e fa‘ata‘amilomilo ai, e matuā pa‘ia lava ia. Fa‘auta, o le tulafono lea o le fale.
13. O fua nei o le fatafaitaulaga i kupita; o le kupita e i ai le kupita ma le alofilima; e tasi le kupita o le tā‘ele, o lona lautele fo‘i e tasi le kupita, o le pale fo‘i e si‘osi‘oina ai ona tafatafa, e tasi le aga; o le mea aupitoaluga lea o le fatafaitaulaga.
14. E āfua mai i le tā‘ele i le ‘ele‘ele, e o‘o i le tafatafa fa‘asili aupitoalalo, e lua kupita, o lona lautele fo‘i e tasi le kupita; e āfua mai fo‘i i le tafatafa fa‘asili aupito itiiti, e o‘o i le tafatafa fa‘asili aupito tele e fa kupita, o lona lautele fo‘i e tasi le kupita.
15. O le fatafaitaulaga fo‘i e fa ona kupita; e fa fo‘i nifo e tutū a‘e i le fatafaitaulaga.
16. O le umi fo‘i o le fatafaitaulaga e sefulu ma le lua ona kupita o lona lautele e sefulu ma le lua, e gatasitasi ona itū e fa.
17. O le tafatafa fa‘asili fo‘i e sefulu ma le fa o kupita lona umi, e sefulu ma le fa lona lautele i ona itū e fa; o lona tafatafa fo‘i e si‘osi‘oina ai, o le vaeluagalemū lea o le kupita ma lona tā‘ele e tasi le kupita e so‘o ai; o lona ala fa‘a‘apefa‘i fo‘i e fa‘asaga i sasa‘e.
18. ‘Ua fai mai fo‘i o ia ‘iā te a‘u: Le atali‘i e o le tagata, o lo‘o fa‘apea ‘ona fetalai mai o le Ali‘i le ATUA: O tulafono ia i le fatafaitaulaga i le aso latou te faia ai e sauni a‘i taulaga i ona luga, e sausau fo‘i toto i ona luga.
19. ‘E te avatu se povi po‘a ta‘anoa i ositaulaga o sa Levi, o le fānauga a Satoka o ē fa‘alatalata mai ‘iā te a‘u o ‘au‘auna ‘iā te a‘u, e fai ma taulaga mo le agasala, ‘ua fetalai mai ai le Ali‘i le ATUA.
20. ‘E te ‘ave fo‘i nisi o lona toto ma tu‘u ai i ona nifo e fa ma tulimanu e fa, o le tafatafa fa‘asili ma le pale e si‘osi‘o ai; ‘e te fa‘amamāina ai ma fai ai se togiola.
21. ‘E te ‘ave fo‘i le povi po‘a o le taulaga mo le agasala, e susunu ai i le mea sa tofia i le fale i tua o le mea pa‘ia.
22. O le aso lua ‘e te avatu ai se tama‘i ‘oti e sao ‘ona lelei, e fai ma taulaga mo le agasala; latou te fa‘amamāina fo‘i le fatafaitaulaga, e pei ‘ona latou fa‘amamāina i le povi po‘a.
23. A uma ‘ona fa‘amamāina, ‘e te avatu se povi po‘a ta‘anoa e sao ‘ona lelei ma se mamoe po‘a o le lafu e sao ‘ona lelei.
24. ‘E te avatu ai, i luma o le ALI‘I, e lūlūina i ai fo‘i e ositaulaga se masima ma latou avatu ai e fai, ma taulaga mū i le ALI‘I.
25. E fitu aso ‘e te sauni ai se ‘oti ta‘itasi i aso e fai ma taulaga mo le agasala; latou te saunia fo‘i se povi po‘a ta‘anoa ma se mamoe po‘a o le lafu e sao ‘ona lelei.
26. E fitu aso latou te fai ai le togiola mo le fatafaitaulaga ma fa‘amamā i ai; e fai fo‘i le tofia o i latou.
27. A mavae ia ona aso, ‘ona faia lea e ositaulaga a ‘outou taulaga mū ma ‘outou taulaga fa‘afetai i luga o le fatafaitaulaga, e āfua i le aso valu e o‘o i aso e lumana‘i; ‘ona ‘ou talia lea o ‘outou, ‘ua fetalai mai ai le Ali‘i le ATUA.#