1. ‘Ona ‘aumaia lea o a‘u e ia i le malumalu ma ia fuatia pou, e ono kupita o lona lautele i le tasi itū, e ono fo‘i kupita o lona lautele i le isi itū, o le lautele lea o le fale fetāfa‘i.
2. O le lautele fo‘i o le faitoto‘a e sefulu ona kupita; o ona itū fo‘i o le faitoto‘a e lima kupita i le tasi itū, e lima fo‘i kupita i le isi itū; ‘ua ia fuatia fo‘i le umi o le malumalu, e fagafulu o kupita ma lona lautele e lua sefulu o kupita.
3. ‘Ona alu ane lea o ia i totonu, ‘ua ia fuatia le pou o le faitoto‘a, e lua ona kupita ma le faitoto‘a fo‘i e ono ona kupita ma le lautele o le faitoto‘a e fitu ona kupita.
4. ‘Ua ia fuatia fo‘i lona umi e lua sefulu ona kupita, ma le lautele e lua sefulu ona kupita, i luma o le malumalu; ‘ua ia fai mai fo‘i ‘iā te a‘u, O le mea e sili ‘ona pa‘ia lenei.
5. ‘Ona ia fuatia lea o le pā o le fale, e ono ona kupita ma le lautele o potu i itū, e fa ona kupita, ‘ua so‘o ai le fale i itū uma.
6. O potu i itū, e atu tolu ia, ta‘itasi i luga o le tasi, e ta‘itolugafulu i itū; na latou soso‘o ane i le pā o le fale mo potu i itū, na so‘o ai, ‘ina ‘ia fa‘amauina ai, a ‘ua lē fa‘amauina i le pā o le fale.
7. Na i ai fo‘i le ala fa‘ata‘amilomilo i potu i itū, ‘ua āu ‘ina lautele i lona alu a‘e; auā ‘ua alu a‘e pea le ala fa‘ata‘amilomilo i le fale e fa‘ata‘amilomilo ai i le fale; o le mea lea na āu ai ‘ina lautele o le fale i lona alu a‘e i luga, e āfua i le fogāfale aupitoalalo, e o‘o i le aupitoaluga e ui ai i le ‘ogāloto.
8. Na ‘ou iloa fo‘i le maualuga o le fale i ona itū uma; o fa‘avae o potu i itū, o le u ‘atoa lea, e i ai kupita tetele e ono.
9. O le mafiafia o le pā sa i le potu o itū i tuāfafo, e lima ona kupita; sa i ai i totonu le mea na toe i potu o itū sa i le fale.
10. O le vā fo‘i o potu, e lua sefulu o kupita ia, ‘ua so‘o ai lava le fale i itū uma.
11. O faitoto‘a fo‘i o potu o itū na fa‘asaga ia i le mea na toe, o le tasi faitoto‘a na fa‘asaga i le itū i matū, a o le tasi faitoto‘a na fa‘asaga i le itū i saute, o le lautele fo‘i o le mea na toe, e lima ona kupita i itū uma.
12. A o le fale na i luma o le mea na vavae‘eseina i le itū i sisifo, e fitu sefulu o kupita lona lautele; o le pā fo‘i o le fale e lima kupita lona mafiafia i itū uma, o lona umi fo‘i e ivagafulu o ona kupita.
13. ‘Ua ia fuatia lava le fale, e selau kupita, o lona umi lea; o le mea na vavae‘eseina fo‘i ma le fale ‘atoa ma ona pā, e selau kupita, o lona umi lea.
14. O le lautele fo‘i o lona lumāfale ma le mea na vavaeina i le itū i sasa‘e, e selau ona kupita.
15. ‘Ua ia fuatia fo‘i le umi o le fale i luma o le mea na vavaeina, o lē i ona tua ma fogāfale i le tasi itū ma le tasi itū, e selau ona kupita, o le malumalu tuloto fo‘i ma fa‘apaologa o le lotoā.
16. O faitoto‘a fo‘i ma fa‘amalama puipuia ma fogāfale e so‘o ai o latou pae fale e tolu, e feagai ma le faitoto‘a, na tapapa i laupapa, na so‘o ai, na āfua mai i lalo e o‘o a‘e i fa‘amalama, na tapapa fo‘i fa‘amalama.
17. O ona luga a‘e fo‘i o le faitoto‘a, e o‘o i totonu o le fale tuloto, ‘atoa ma fafo, o le pā uma fo‘i e so‘o ai i totonu ma fafo na fuatia lava.
18. Na fai fo‘i kerupi ma pama, na i ai fo‘i pama ta‘itasi i vā o kerupi; ta‘itasi fo‘i kerupi ma ona mata e lua;
19. na feagai fo‘i mata o le tagata ma le pama i le tasi itū, ‘ua feagai fo‘i mata o le leona ta‘anoa ma le pama i le isi itū; ‘ua faia i le fale uma i ona itū uma.
20. E āfua mai i lalo e o‘o i ona luga a‘e o le faitoto‘a, ‘atoa ma le pā o le malumalu, sa fai ai kerupi ma pama.
21. Sa fa‘atafafā fo‘i o pou o le faitoto‘a o le malumalu; o lona lumāfale fo‘i o le mea pa‘ia, ‘ua tino mai e pei ‘ona tino mai anamua.
22. O le fata la‘au e fai ai taulaga e tolu kupita lona maualuga, o lona umi fo‘i e lua kupita lea; o ona tulimanu fo‘i ma lona umi ma ona itū, o la‘au ia; ‘ua ia fa‘apea mai fo‘i ‘iā te a‘u, “O le laulau lenei o lo‘o i luma o le ALI‘I.”
23. Sa i ai puipui e lua i le malumalu ma le mea pa‘ia.
24. Sa ta‘ilua fo‘i puipui i faitoto‘a, o puipui feagai; e lua puipui mo le tasi faitoto‘a, e lua fo‘i mo le isi.
25. Na fai fo‘i i puipui o le malumalu o kerupi ma pama, e pei ‘ona faia i pā; na i ai fo‘i laupapa mafiafia i luma o le fa‘apaologa i fafo.
26. Na i ai fo‘i fa‘amalama puipuia ma pama i le tasi itū ma le isi itū, i itū o le fa‘apaologa ma potu i itū o le fale ma laupapa mafiafia.#