1. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2. Le atali‘i e o le tagata, fai atu ia i tagata o lou nu‘u, ia fa‘apea atu ‘iā te i latou, A ‘ou fa‘ao‘oina atu le pelu i se nu‘u, ‘āfai e ‘avea e tagata o lea nu‘u se tagata o lo latou nu‘u ma latou tofia o ia e fai mo latou tagata va‘ai;
3. a iloa atu e ia le pelu o lo‘o sau i le nu‘u, ‘āfai na te ilia le pū ma fa‘ailoa atu i le nu‘u;
4. o sē na te lagona le leo o le pū, ‘ae lē ‘ana‘ana i ai; a o‘o ane le pelu ma oti ai o ia, e i luga o lona lava ulu lona toto.
5. Na ia lagona le leo o le pū, a ‘ua lē ‘ana‘ana i ai; e ‘iā te ia lava lona toto; a o lē na te ‘ana‘ana e fa‘asaoina e ia lona ola.
6. ‘Ae ‘āfai e iloa e le tagata va‘ai le pelu o lo‘o sau, ‘ae lē ilia e ia le pū ma ‘ua lē fa‘ailoa atu i le nu‘u; a o‘o mai le pelu ma oti ai se tasi o i latou, ‘ua oti o ia i lana amio leaga; a o lona toto ‘ou te tauiatua lea i le tagata va‘ai.
7. O oe fo‘i le atali‘i o le tagata, ‘ua ‘ou tofia oe e fai ma tagata va‘ai i le ‘āiga o Isaraelu; o le mea lea ‘ia e fa‘alogo mai ai i le ‘upu a lo‘u gutu ma e apoapoa‘i atu ‘iā te i latou i ‘upu atu ‘iā te a‘u.
8. A ‘ou fai atu i lē ‘ua amio leaga, “Le tagata amio leaga e, ‘e te oti lava oe;” ‘āfai ‘e te lē tautala atu e apoapoa‘i atu ai i lē ‘ua amio leaga, ‘ia liliu ‘ese i lona ala; e oti lenā tagata amio leaga i lana amio leaga; a o lona toto ‘ou te tauiatua lea ‘iā te oe.
9. A o oe, ‘āfai ‘e te apoapoa‘i atu i lē ‘ua amio leaga, ‘ia liliu ‘ese o ia i lona ala; ‘āfai na te lē liliu ‘ese i lona ala, e oti o ia i lana amio leaga; a ‘ua fa‘asaoina e oe lou lava agaga.
10. O oe na fo‘i, le atali‘i o le tagata, fai atu ia i le ‘āiga o Isaraelu: “‘Ua fai mai la ‘outou ‘upu, ‘ua fa‘apea mai, ‘Āfai ‘ua ‘iā te i matou o matou solitulafono ma a matou agasala ma tauāu ‘ina fa‘aumatia ai i matou, pe matou te ola ‘ea fa‘apefea?”
11. Fai atu ia ‘iā te i latou, O lo‘o fetalai mai le Ali‘i le ATUA, ‘Ou te ola a‘u, ‘ou te lē fiafia lava i le oti o lē amio leaga, a ‘ia liliu mai lē amio leaga a‘i lona ala ma ola ai; liliu ia ‘outou, ‘inā ‘outou liliu ‘ese ia i o ‘outou ala leaga; auā pe se a ‘ea le mea tou te fia oti ai, le ‘āiga o Isaraelu e?
12. O oe fo‘i le atali‘i o le tagata, fai atu ia i tagata o lou nu‘u, E lē lavea‘iina lē ‘ua amiotonu i lana amiotonu i le aso e solitulafono ai o ia; e lē pa‘ū fo‘i lē ‘ua amio leaga i lana amio leaga i le aso e liliu ‘ese ai o ia i lana amio leaga; e lē ola fo‘i lē ‘ua amiotonu i lana amiotonu i le aso e agasala ai o ia.
13. A ‘ou fai atu i lē ‘ua amiotonu, e ola lava ia; ‘āfai e fa‘alagolago ia i lana amiotonu ma ‘ua fai le amio leaga, ‘ona lē manatua lea o ana amiotonu uma, ‘ae oti o ia ‘ona o amio leaga ‘ua ia faia.
14. A ‘ou fai atu fo‘i i lē ‘ua amio leaga, “E oti lava oe;” ‘āfai e liliu ‘ese ia i lana agasala ma ‘ua fai o ia le amio tatau ma le amiotonu;
15. ‘āfai e fa‘afo‘i lē ‘ua amio leaga le mea e tu‘u fa‘afa‘atau ma toe avane le mea na ia fao ma ia savali i sauniga e ola ai ma ‘ua lē fai le amio leaga; e ola lava ia, e lē oti.
16. O ana agasala ‘ua ia faia e le ta‘uta‘ua ‘iā te ia; ‘ua ia fai le amio tatau ma le tonu; e ola lava ia.
17. A ‘ua fai mai tagata o lou nu‘u, “E lē tusa le ala o le Ali‘i;” a o i latou, e lē tusa lo latou ala.
18. A liliu ‘ese lē ‘ua amiotonu i lana amiotonu ma ‘ua faia e ia le amio leaga, ‘ona oti ai lava lea o ia.
19. ‘Ae ‘āfai e liliu ‘ese lē ‘ua amio leaga ai lana amio leaga ma ‘ua faia e ia le amio tatau ma le amiotonu, ‘ona ola ai lava lea o ia.
20. A ‘ua ‘outou fai mai, “E lē tusa le ala o le Ali‘i.” Le ‘āiga o Isaraelu e, ‘ou te fa‘amasinoina ‘outou ta‘ito‘atasi e tusa ma ona ala.
21. O lona sefulu ma le lua o tausaga o lo matou tāfeaga, o lona sefulu o masina, o le aso e lima o le masina, na sau ai ‘iā te a‘u le tasi na sao mai Ierusalema, ‘ua fa‘apea mai, “‘Ua fasia le ‘a‘ai.”
22. Na i ai fo‘i le ‘a‘ao o le ALI‘I ‘iā te a‘u i le afiafi, a o le‘i o‘o mai lē na sao; na ia fa‘agaganaina fo‘i a‘u, ‘ua o‘o ‘ina sau o ia ‘iā te a‘u i le taeao; ‘ua fa‘agaganaina a‘u, ‘ua ‘ou le toe fa‘alologo.
23. ‘Ona o‘o mai lea o le afioga a le ALI‘I ‘iā te a‘u, ‘ua fa‘apea mai:
24. Le atali‘i e o le tagata, o lo‘o fai mai i latou o ē o nonofo i mea gaogao i le lau‘ele‘ele o Isaraelu, ‘ua fa‘apea mai, “Sa to‘atasi Aperaamo, na fai fo‘i mōna le nu‘u, ‘ae to‘atele i tatou; ‘ua tu‘uina mai lou nu‘u mo i tatou e fai mo tatou.”
25. O le mea lea ‘ia e fai atu ai ‘iā te i latou. O lo‘o fa‘apea ‘ona fetalai mai o le Ali‘i le ATUA: ‘Ua ‘outou ‘a‘ai mea o i ai le toto ma ‘ua ‘outou va‘ava‘ai i o ‘outou tupua ma ‘outou fa‘amaligi toto; ‘ae fai ‘ea mo ‘outou le nu‘u?
26. ‘Ua ‘outou tutū ma a ‘outou pelu, ‘ua ‘outou fai mea e ‘inosia, ‘ua ‘outou ta‘itasi ma fa‘aleagaina le avā a le tasi tagata; ‘ae fai ‘ea mo ‘outou le nu‘u?
27. ‘Ia fa‘apea ‘ona e fai atu ‘iā te i latou, ‘Ua fa‘apea ‘ona fetalai mai o le Ali‘i le ATUA: ‘Ou te ola a‘u, o i latou o ē ‘ua i ai i mea gaogao e oti lava i latou i le pelu, o lē ‘ua i le vao ‘ou te tu‘uina atu lava o ia i manu fe‘ai ia ‘aina; o i latou fo‘i o ē ‘ua i ‘olo ma ana e oti lava i latou i le fa‘ama‘i.
28. ‘Ou te matuā fa‘atafunaina lava le nu‘u ma ‘ou fa‘ai‘uina lona malosi e mitamita ai; e fa‘atafunaina fo‘i mauga o Isaraelu, e lē uia lava e se tasi.
29. ‘Ona latou iloa ai lea o a‘u lava o le ALI‘I, pe a ‘ou matuā fa‘atafunaina le nu‘u ‘ona o a latou mea uma e ‘inosia ‘ua latou faia.
30. O oe fo‘i le atali‘i o le tagata, o lo‘o tautalatala pea tagata o lou nu‘u ‘iā te oe e lata ane i pā ma faitoto‘a o fale, o lo‘o fetautalatala‘i i latou o le tasi i le tasi, ‘ua fa‘apea, “Ō mai ia, se‘i fa‘alogologo pe se a se afioga ‘ua tulei mai mai i le ALI‘I.”
31. Latou te ō mai fo‘i ‘iā te oe pei ‘ona ō mai o lo‘u nu‘u, latou te nonofo fo‘i i ou luma e pei o lo‘u nu‘u, latou te fa‘alogologo fo‘i i au ‘upu, ‘ae latou te lē mafafai ‘ona ‘ana‘ana i ai; auā ‘ua latou alolofa fua i o latou gutu, a ‘ua mafuli o latou loto i lo latou manumanu.
32. Fa‘auta fo‘i, ‘ua tusa oe ‘iā te i latou ma se pese mālie a lē ‘ua leo mālie ma lē ta mālie i le la‘aupese; auā latou te fa‘alogologo i au ‘upu, ‘ae latou te lē ‘ana‘ana i ai.
33. A taunu‘u lea mea, fa‘auta e taunu‘u lava, ‘ona latou iloa ai lea sa i ai le perofeta ‘iā te i latou.#