Esekielu 40 O LE TUSI PA'IA - Ekalesia Katoliko Roma (RSCB)

O le Fa‘aaliga o le Malumalu Fou

‘Ua ‘Aveina Esekielu i Ierusalema

1. O lona lua o sefulu ma le lima o tausaga o la matou tāfeaga, o le amataga o le tausaga, o le aso e sefulu o le masina, o le tausaga e sefulu ma le fa talu ona malaia o le ‘a‘ai, o lenā lava aso, na i ai le ‘a‘ao o le ALI‘I i luga ‘iā te a‘u, ma na ‘aveina atu i ai o a‘u.

2. O fa‘aaliga mai le Atua na ia ‘aveina ai a‘u i le nu‘u o Isaraelu ma tu‘uina ai a‘u i luga o le mauga maualuga lava, o i ai i le itū i saute se fale e peiseaī se ‘a‘ai.

3. Na ia ‘aveina atu ai a‘u, fa‘auta fo‘i, o le tagata, o lona tino mai ‘ua pei o le tino o le ‘apamemea, sa i lona lima le manoa lino ma le u e fua a‘i, o tu o ia i le faitoto‘a.

4. ‘Ua fai mai fo‘i le tagata ‘iā te a‘u, “Le atali‘i e o le tagata, ‘ia va‘ava‘ai ou mata ma ia fa‘alogologo ou taliga, ‘ia e tu‘u fo‘i i lou loto o mea uma ‘ou te fa‘aali atu ai ‘iā te oe auā ‘ua ‘aumaia oe ‘i‘inei ‘ina ‘ia ‘ou fa‘aali atu ai ‘iā te oe; ‘ia e ta‘u atu i le ‘āiga o Isaraelu o mea uma ‘e te iloa.”

O le Faitoto‘a i Sasa‘e

5. Fa‘auta fo‘i, o le pā ‘ua so‘o ai le fale i fafo, o i ai fo‘i i le lima o le tagata le u e fua a‘i, e ono kupita lona umi, o kupita e i ai le kupita ma le alofilima; ‘ua ia fua le lautele o le pā e tasi le u, ma lona maualuga e tasi le u.

6. ‘Ona alu ane lea o ia i le faitoto‘a o lo‘o fa‘asaga i sasa‘e ma alu a‘e i lona ala fa‘a‘apefa‘i ‘ua ia fuatia fo‘i le faitoto‘a, o le u e tasi lona lautele ma le tasi faitoto‘a, e tasi fo‘i le u lona lautele.

7. O potu fo‘i ta‘itasi e tasi le u lona umi, e tasi le u fo‘i lona lautele; o le vā fo‘i o potu e lima kupita ia; o le faitoto‘a fo‘i i tala ane o le fa‘apaologa o le fale i totonu e tasi lona u.

8. ‘Ua ia fuatia fo‘i le fa‘apaologa o le fale i totonu, o le u e tasi.

9. ‘Ona fuatia lea e ia le fa‘apaologa o le puipui, e valu ona kupita ma ona pou e lua ona kupita; na u i totonu fo‘i le fa‘apaologa o le puipui.

10. O potu fo‘i o le faitoto‘a i sasa‘e sa ta‘itolu i itū; ‘ua gatasitasi le fua o ia potu e tolu; ‘ua gatasitasi fo‘i le fua o pou i le tasi itū ma le tasi itū.

11. ‘Ua ia fuatia le lautele o le puipui e sefulu ona kupita; o lona umi fo‘i o le puipui e sefulu ma le tolu ona kupita.

12. Sa i ai fo‘i le mea avanoa i luma o potu i itū ta‘itasi e tasi lona kupita; o potu fo‘i ta‘iono kupita i lea itū ma lea itū.

13. ‘Ona fuatia lea e ia le puipui mai le falealuga o le tasi potu e o‘o i le falealuga o le tasi; o lona lautele e lua sefulu ma le lima o kupita ia; ‘ua fa‘afesaga‘i faitoto‘a.

14. ‘Ua ia fai fo‘i pou e onogafulu o kupita; ‘ua o‘o fo‘i i le pou o le lotoā o le puipui e so‘o ai.

15. E āfua mai fo‘i i luma o le puipui e ulu atu ai e o‘o i luma o le fa‘apaologa o le puipui i totonu, e lima sefulu o ona kupita.

16. Na i ai fo‘i o fa‘amalama puipuia i potu, sa i ai fo‘i i pou i totonu o le puipui ‘ua so‘o ai, ‘ua fa‘apea fo‘i ma fa‘apaologa; na i ai fa‘amalama ‘ua so‘o ai i totonu; na i ai fo‘i pama i pou.

O le Lotoā

17. ‘Ua ia ‘aumai fo‘i ‘iā te a‘u i le lotoā aupito i tua, fa‘auta fo‘i, o potu ma le paepae ‘ua faia mo le lotoā ‘ia so‘o ai; e tolu sefulu o potu na i le paepae.

18. O le paepae fo‘i i tafatafa o puipui na feagai ma le umi o puipui, o le paepae aupitoalalo lea.

19. ‘Ona fuatia lea e ia o le lautele, o āfua mai i luma o le puipui aupitoalalo e o‘o i ona luma o le lotoā tuloto i ona tua mai, e selau ona kupita i sasa‘e ‘atoa fo‘i ma le itū i matū.

O le Faitoto‘a i le Itū i Matū

20. ‘Ua ia fuatia fo‘i le umi ma le lautele o le puipui o le lotoā aupito i tua, o lē fa‘asaga i le itū i matū.

21. O ona potu fo‘i sa ta‘itolu i lea itū ma lea itū; o ona pou fo‘i ma ona fa‘apaologa sa tusa ma le fua o le ulua‘i puipui, e lima sefulu o kupita, o lona umi lea, e lua sefulu ma le lima o kupita o lona lautele lea.

22. O ona fa‘amalama fo‘i ma ona fa‘apaologa ma ona pama, sa tutusa ma le fua o le puipui o lē fa‘asaga i sasa‘e; na latou ō a‘e fo‘i i ai i tulaga e fitu o le ala fa‘a‘apefa‘i; sa i ai fo‘i ona fa‘apaologa i o latou luma.

23. O le puipui fo‘i o le lotoā tuloto, na fa‘afesaga‘i ma le puipui i le itū i matū ma le itū i sasa‘e; ‘ua ia fuatia fo‘i e āfua mai i le tasi puipui e o‘o i le tasi puipui e selau ona kupita.

O le Faitoto‘a i le Itū i Saute

24. ‘Ua ia ta‘ita‘iina fo‘i a‘u i le itū i saute, fa‘auta fo‘i, o le puipui e fa‘asaga i le itū i saute; ‘ua ia fuatia fo‘i ona pou ma ona fa‘apaologa e tusa ma ia fua.

25. O fa‘amalama fo‘i sa i ai ‘atoa mōna fa‘apaologa e so‘o ai e pei o ia fa‘amalama; o lona umi e lima sefulu o kupita, o lona lautele e lua, sefulu ma le lima o kupita.

26. E fitu fo‘i tulaga fa‘a‘apefa‘i e ui a‘e ai, o ona fa‘apaologa fo‘i o i o latou luma; na i ai fo‘i pama e ta‘itasi i itū i ona pou.

27. Na i ai fo‘i le puipui i le lotoā tuloto o fa‘asaga i le itū i saute; na ia fuatia fo‘i, e āfua mai i le tasi puipui e o‘o i le tasi puipui ‘ua fa‘asaga i le itū i saute, e selau ona kupita.

O Totonu o le Lotoā i le Itū i Saute

28. ‘Ua ia ‘aumai fo‘i ‘iā te a‘u i le lotoā tuloto o le puipui i le itū i saute; ‘ua ia fuatia fo‘i le puipui i le itū i saute e tusa ma ia fua;

29. o ona potu fo‘i ma ona pou ma ona fa‘apaologa, sa tutusa ma ia fua; o fa‘amalama fo‘i sa i ai ‘atoa ma ona fa‘apaologa e so‘o ai; e lima sefulu o kupita, o lona umi lea, e lua sefulu ma le lima o kupita o lona lautele lea.

30. O fa‘apaologa fo‘i e so‘o ai e lua sefulu ma le lima o kupita o lona umi lea, e lima kupita fo‘i o lona lautele lea.

31. O ona fa‘apaologa na fa‘asaga i le lotoā aupito i tua; na i ai fo‘i pama i ona pou; e valu fo‘i tulaga fa‘a‘apefa‘i e ui a‘e ai.

O Totonu o le Lotoā i le Itū i Sasa‘e

32. ‘Ua ia ‘aumaia fo‘i a‘u i le lotoā tuloto o fa‘asaga i sasa‘e; ‘ona fuatia lea e ia o le puipui e tusa ma ia fua.

33. O ona potu fo‘i ma ona pou ma ona fa‘apaologa, sa tutusa ma ia fua; o fa‘amalama fo‘i sa i ai ma ona fa‘apaologa e so‘o ai, e lima sefulu o kupita, o lona umi lea, e lua sefulu ma le lima o kupita o lona lautele lea.

34. Na fa‘asaga ona fa‘apaologa i le lotoā aupito i tua; na i ai fo‘i pama i ona pou i lea itū ma lea itū e valu fo‘i tulaga fa‘a‘apefa‘i e ui a‘e ai.

O Totonu o le Lotoā i le Itū i Matū

35. ‘Ua ia ‘aumai fo‘i ‘iā te a‘u i le puipui i le itū i matū ma na fuatia ai e tusa ma ia fua.

36. O ona potu ma ona pou ma ona fa‘apaologa, ma ona fa‘amalama e so‘o ai, e limagafulu o kupita o lona umi lea, o lona lautele e lua sefulu ma le lima o kupita.

37. O ona pou fo‘i na fa‘asaga ia i le lotoā aupito i tua; na i ai pama i ona pou i lea itū ma lea itū; e valu tulaga fa‘a‘apefa‘i na ui a‘e ai.

O Potu e tu lata i le Faitoto‘a i le Itū i Matū

38. O potu ma o latou ala, sa i tafatafa o pou ia o faitoto‘a, na latou mulumulu ai le taulaga mū.

39. Na i ai fo‘i i le fa‘apaologa o le puipui o laulau e lua i le tasi itū, ma laulau e lua i le isi itū e fasi ai le taulaga mū ma le taulaga mo le agasala ma le taulaga mo le sesē.

40. O i le itū fo‘i i tua e ui a‘e ai le ala o le faitoto‘a i le itū i matū na i ai laulau e lua; o i le tasi itū fo‘i i le fa‘apaologa o le puipui na i ai laulau e lua.

41. E fa laulau na i le tasi itū, e fa fo‘i laulau i le isi itū i tafatafa o le puipui; e valu ia laulau na latou fasi ai taulaga i o latou luga.

42. O laulau ia e fa mo le taulaga mū, o ma‘a talai na fai a‘i, e tasi le kupita ma le vaeluagalemū o le kupita, o le umi lea, e tasi fo‘i le kupita ma le vaeluagalemū o le kupita o le lautele lea, o le kupita e tasi o le maualuga lea; na latou fa‘ae‘e ai fo‘i mea ‘ua latou fasi ai taulaga mū ma isi taulaga.

43. Na i ai fo‘i tafatafa e fa‘amauina ai ‘ua fa‘asaga i totonu, ‘ua so‘o ai, e tasi le alofilima o latou lautele; sa i luga fo‘i o laulau tufa‘aga o le taulaga.

44. O potu o le ‘au pepese sa i ai ia i tua o le puipui tuloto i le lotoā tuloto, i tafatafa o le puipui i le itū i matū, na fa‘asaga fo‘i ia i le itū i saute; o le tasi i tafatafa o le puipui i sasa‘e, ‘ua fa‘asaga i le itū i matū.

45. ‘Ona fa‘apea mai lea o ia ‘iā te a‘u, “O lenei potu o lē fa‘asaga i le itū i saute mo le ‘au ositaulaga lea o ē ‘ana‘ana i le tausiga o le fale.

46. A o le potu o lē fa‘asaga i le itū i matū mo le ‘au ositaulaga lea o ē ‘ana‘ana i tausiga o le fatafaitaulaga, o le fānauga ia a Satoka e o le fānauga a Levi, o ē fa‘alatalata i le ALI‘I e ‘au‘auna ‘iā te ia.”

O Totonu o le Lotoā ma le Malumalu

47. Na ia fuatia le lotoā, o lona umi e selau kupita, e selau kupita fo‘i o lona lautele lea, na gatasitasi ona itū e fa; o le fatafaitaulaga fo‘i na i lumāfale.

48. ‘Ua ia ‘aumai fo‘i ‘iā te a‘u i le fa‘apaologa o le fale, ‘ua ia fuatia pou o le fa‘apaologa, e lima kupita i le tasi itū, e lima fo‘i kupita i le isi itū; o le lautele fo‘i o le puipui e tolu kupita i le tasi itū, e tolu fo‘i kupita i le isi itū.

49. O le umi o le fa‘apaologa e lua sefulu kupita lea, o lona lautele fo‘i e sefulu ma le tasi kupita; ‘ua ia ‘aumai fo‘i ‘iā te a‘u i le tulaga o le ala fa‘a‘apefa‘i na latou ui a‘e ai; na i ai fo‘i pou i tafatafa o pou, o le tasi i le tasi itū, o le tasi fo‘i i le isi itū.#