1. O lona fitu o tausaga, o lona lima fo‘i o masina o le aso e sefulu o le masina, na ō mai ai nisi toeaina o Isaraelu e fesili i le ALI‘I, ‘ua latou nonofo mai i o‘u luma.
2. ‘Ona o‘o mai ai lea o le afioga a le ALI‘I ‘iā te a‘u, ‘ua fa‘apea mai:
3. Le atali‘i e o le tagata, fai atu ia i toeaina o Isaraelu, ‘ia fa‘apea atu ‘iā te i latou: O lo‘o fa‘apea ‘ona fetalai mai o le Ali‘i le ATUA, ‘Ua ‘outou ō mai ‘ea e fesili mai ‘iā te a‘u? O lo‘o ola a‘u, ‘ou te lē mafai ‘ona ‘outou fesili mai ‘iā te a‘u, o lo‘o fetalai mai ai le Ali‘i le ATUA.
4. ‘E te lē fa‘amasino ‘ea ‘iā te i latou, le atali‘i e o le tagata, ‘e te lē fa‘amasino ‘ea? Fa‘ailoa atu ia ‘iā te i latou mea e ‘inosia na faia e o latou tamā;
5. ma ‘ia e fa‘apea atu ‘iā te i latou: O lo‘o fa‘apea ‘ona fetalai mai o le Ali‘i le ATUA: O le aso na ‘ou filifili ai ‘iā Isaraelu ma ‘ou si‘i ai lo‘u lima i le fānau a le ‘āiga o Iakopo ma ‘ou fa‘ailoaina atu o a‘u ‘iā te i latou i le nu‘u o Aikupito, ‘ina ‘ua ‘ou si‘i lo‘u lima ‘iā te i latou, ‘ua fa‘apea atu, O a‘u o le ALI‘I lo ‘outou Atua.
6. O lea lava aso na ‘ou si‘i ai lo‘u lima ‘iā te i latou e ‘aumaia i latou a‘i le nu‘u o Aikupito e ō atu i le nu‘u na ‘ou sā‘ilia mo i latou, e tafe ai le suāsusu ma le meli, ‘ua sili ‘ona matagofie o lea nu‘u i nu‘u uma.
7. Na a‘u fai atu fo‘i ‘iā te i latou, ‘Ia ta‘itasi le tagata ma lafoa‘i mea ‘inosia ‘ua i ona luma, ‘aua fo‘i le fa‘aleaga ‘outou ‘iā te ‘outou i tupua o Aikupito; o a‘u o le ALI‘I lo ‘outou Atua.
8. A ‘ua latou fouvale ‘iā te a‘u, ‘ua lē mafafai fo‘i ‘ona fa‘alogo mai ‘iā te a‘u; ‘ua lē ta‘itasi ma lafoa‘iina e i latou o mea ‘inosia sa i o latou luma, ‘ua lē tu‘ua fo‘i tupua o Aikupito. ‘Ona ‘ou fai atu ai lea, ‘Ou te sasa‘a atu lo‘u ita tele i luga ‘iā te i latou, e fa‘ataunu‘u atu ai lo‘u ita ‘iā te i latou i le nu‘u o Aikupito.
9. ‘Ae peita‘i na ‘ou faia ‘ona o lo‘u igoa, ‘ina ‘ia lē fa‘aleagaina ai i luma o nu‘u ‘ese sa latou i ai, na ‘ou fa‘ailoaina atu ai fo‘i a‘u ‘iā te i latou i o latou luma i lo‘u ‘aumaia o i latou ai le nu‘u o Aikupito.
10. Na ‘ou ‘aumaia i latou a‘i le nu‘u o Aikupito, ma ‘ou ta‘ita‘iina i latou i le vao.
11. Na ‘ou tu‘uina atu fo‘i ‘iā te i latou a‘u tulafono ma ‘ou fa‘ailoa atu ‘iā te i latou a‘u fa‘amasinoga, o mea ia a faia e le tagata, e ola ai lava ia.
12. Na ‘ou avatu fo‘i ‘iā te i latou o‘u sapati, e fai ma fa‘ailoga ‘iā te a‘u ma i latou, ‘ia latou iloa ai o a‘u o le ALI‘I lē fa‘apa‘iaina i latou.
13. A ‘ua fouvale le ‘āiga o Isaraelu ‘iā te a‘u i le vao, ‘ua lē sāvavali i latou i a‘u tulafono, a ‘ua latou ‘ino‘ino i a‘u fa‘amasinoga, o mea ia a faia e le tagata, e ola ai lava ia; ‘ua latou matuā solia fo‘i o‘u sapati. ‘Ona ‘ou fai atu ai lea, ‘Ou te sasa‘a atu lo‘u ita tele i luga ‘iā te i latou i le vao e fa‘aumatia ai i latou.
14. ‘Ae peita‘i na ‘ou faia ‘ona o lo‘u igoa, ‘ina ne‘i fa‘aleagaina ai i luma o nu‘u ‘ese, na ‘ou ‘aumaia i latou i o latou luma.
15. O a‘u fo‘i, na ‘ou si‘i lo‘u lima ‘iā te i latou i le vao, ‘ou te lē fa‘ao‘o ‘iā te i latou i le nu‘u na ‘ou foa‘iina atu ai ‘iā te i latou, e tafe ai le suāsusu ma le meli, ‘ua sili ona matagofie o lea nu‘u i nu‘u uma;
16. auā na latou ‘ino‘ino i a‘u fa‘amasinoga ma ‘ua lē sāvavali i a‘u tulafono; a ‘ua latou solia o‘u sapati, auā na mulimuli atu o latou loto ‘iā latou tupua.
17. ‘Ae ui lava i lea na ‘ou fa‘asaoina i latou ‘ia lē fano i latou ma ‘ou le fa‘aumatia i latou i le vao.
18. Na ‘ou fai atu fo‘i ‘iā latou fānau i le vao, ‘Aua tou te sāvavali i tu a o ‘outou tamā, ‘aua fo‘i le usiusita‘i ‘iā latou masani, ‘aua ne‘i fa‘aleagaina ‘outou ‘iā latou tupua.
19. O a‘u o le ALI‘I lo ‘outou Atua, ‘ia ‘outou sāvavali i a‘u tulafono ma tausi i a‘u fa‘amasinoga ma ‘outou faia.
20. ‘Ia ‘outou fa‘apa‘iaina fo‘i o‘u sapati; e fai fo‘i ia ma fa‘ailoga ‘iā te a‘u ma ‘outou, ‘ia iloa ai e ‘outou, o a‘u lava o le ALI‘I lo ‘outou Atua.
21. A ‘ua fouvale le fānau ‘iā te a‘u; ‘ua latou le sāvavali i a‘u tulafono ma ‘ua lē tausi i a‘u fa‘amasinoga ‘ia usiusita‘i i ai, o mea ia a faia e le tagata, e ola ai lava ia; na latou solia o‘u sapati. ‘Ona ‘ou fai atu ai lea, ‘Ou te sasa‘a atu lo‘u ita tele i luga ‘iā te i latou, e fa‘ai‘uina atu ai lo‘u ita ‘iā te i latou i le vao.
22. ‘Ae ui lava i lea na ‘ou fa‘afoisia lo‘u lima ma ‘ou faia ‘ona o lo‘u igoa, ‘ina ne‘i fa‘aleagaina ai i luma o nu‘u ‘ese na ‘ou ‘aveina atu ai i latou i o latou luma.
23. Na ‘ou si‘i fo‘i lo‘u lima ‘iā te i latou i le vao, ‘ou te fa‘ata‘ape‘apeaina i latou i nu‘u ‘ese ma ‘ou fa‘asalalauina i latou i nu‘u ‘ese‘ese;
24. auā na latou le faia a‘u fa‘amasinoga ma ‘ua latou ‘ino‘ino i a‘u tulafono ma latou solia o‘u sapati, na fa‘asaga fo‘i o latou mata i tupua a o latou tamā.
25. O le mea lea na ‘ou tu‘uina atu ai ‘iā te i latou o tulafono e lē lelei ma fa‘amasinoga latou te lē ola ai;
26. na ‘ou fa‘aleaga fo‘i ‘iā te i latou ‘iā latou lava taulaga i lo latou fa‘aui ane i ulumatua uma i le afi, ‘ina ‘ia ‘ou fa‘atafunaina i latou, ‘ina ‘ia latou iloa o a‘u lava o le ALI‘I.
27. O le mea lea, le atali‘i e o le tagata, ‘ia e fai atu ai i le ‘āiga o Isaraelu, ‘ia fa‘apea atu ‘iā te i latou, O lo‘o fa‘apea ‘ona fetalai mai o le Ali‘i le ATUA, Na fāifaia lava a‘u e o ‘outou tamā i lenei mea fo‘i, ‘ua latou matuā agasala lava ‘iā te a‘u.
28. Na ‘ou ‘aumaia i latou i le nu‘u na ‘ou si‘i ai lo‘u lima ‘ou te avatua mo i latou, ‘ona latou va‘ava‘ai atu lea i mauga maualuluga uma ma la‘au tauuluuluola uma, na latou osi ai a latou taulaga ma latou avatu ai a latou taulaga e fa‘a‘ono‘ono ai; na latou tu‘u atu ai fo‘i a latou mea manogi lelei ma latou liligi ai a latou taulaga i mea e inu.
29. ‘Ona a‘u fai atu ai lea ‘iā te i latou: Se a le mea maualuga tou te ō atu i ai? ‘Ua ta‘ua lona igoa o Le mea maualuga, ‘ua o‘o mai i le aso nei.
30. O le mea lea ‘ia e fai atu ai i le ‘āiga o Isaraelu, O lo‘o fa‘apea ‘ona fetalai mai o le Ali‘i le ATUA: ‘Ua leaga ‘ea ‘outou e pei o le tu a ‘outou tamā? ‘Ua mulilulua ‘ea fo‘i ‘outou o mulimuli atu ‘iā latou mea ‘inosia?
31. Auā o lo ‘outou avatua o a ‘outou taulaga ma lo ‘outou fa‘aui ane o a ‘outou fānau i le afi ‘ua ‘outou fa‘aleagaina ai ‘outou ‘iā ‘outou tupua uma, ‘ua o‘o mai i lenei aso; tou te fesili mai ‘ea ‘iā te a‘u nei, le ‘āiga o Isaraelu e? O lo‘o fetalai mai ai le Ali‘i le ATUA, O lo‘o ola a‘u, ‘ou te lē mafai lava ‘ona ‘outou fesili mai ‘iā te a‘u.
32. O le mea fo‘i e tupu i o ‘outou manatu, e lē o‘o lava, ‘ua ‘outou fa‘apea ane, “E ‘avea i matou e pei o nu‘u ‘ese, e pei o ‘āiga o nu‘u ‘ese‘ese e ‘au‘auna i la‘au ma ma‘a.”
33. O lo‘o fetalai mai le Ali‘i le ATUA, O lo‘o ola a‘u, ‘ou te pule lava ‘iā te ‘outou ma le lima malosi, ma le lima fa‘aloaloa ma le ita tele ‘ua sasa‘aina atu.
34. ‘Ou te ‘aumaia ‘outou a‘i nu‘u ‘ese ma ‘ou fa‘apotopotoina ‘outou ai nu‘u ‘ese‘ese ‘ua fa‘ata‘ape‘apeina ai ‘outou ma le lima malosi ma le lima fa‘aloaloa ma le ita tele ‘ua sasa‘aina atu.
35. ‘Ou te ‘aumaia fo‘i ‘outou i le vao o nu‘u ma ‘ou fa‘amasino ‘iā te ‘outou i lea mea, o tatou o fesagai ma a‘u.
36. E pei ‘ona ‘ou fa‘amasino i o ‘outou tamā i le vao o le nu‘u o Aikupito, e fa‘apea ‘ona ‘ou fa‘amasino ‘iā te ‘outou, o lo‘o fetalai mai ai le Ali‘i le ATUA.
37. ‘Ou te fa‘aui ane fo‘i ‘iā te ‘outou i lalo o le to‘oto‘o ma ‘ou fa‘ao‘oina ‘outou i le noataga o le feagaiga.
38. ‘Ou te fa‘ate‘a‘eseina fo‘i ‘iā te ‘outou o ē fouvale ma ē agasala ‘iā te a‘u; ‘ou te ‘aveina atu i latou a‘i le nu‘u o lo‘o latou āumau ai, ‘ae latou te lē ō mai i le lau‘ele‘ele o Isaraelu; tou te iloa ai o a‘u lava o le ALI‘I.
39. O lo‘o fa‘apea ‘ona fetalai mai o le Ali‘i le ATUA: O ‘outou le ‘āiga o Isaraelu; ō ia ‘outou, ‘inā ta‘itasi ma ‘au‘auna i ana tupua; a o mulimuli ane, ‘āfai tou te lē fa‘alogo mai ‘iā te a‘u, ‘aua tou te toe fa‘aleagaina lo‘u igoa pa‘ia ‘iā ‘outou taulaga ma a ‘outou tupua.
40. Auā o lo‘u mauga pa‘ia, o le mauga maualuga i Isaraelu, o lo‘o fetalai mai le Ali‘i le ATUA, e ‘au‘auna mai ai le ‘āiga uma o Isaraelu ‘iā te a‘u, o i latou uma fo‘i i le nu‘u; ‘ou te talia i latou i lea mea ma ‘ou fai atu e ‘aumai i lea mea a ‘outou taulaga ma mea fa‘apolopoloina ‘iā ‘outou taulaga, ‘atoa ma a ‘outou mea pa‘ia uma.
41. ‘Ou te talia ‘outou ‘ona o la ‘outou mea manogi lelei, pe a ‘ou ‘aumaia ‘outou ai nu‘u, ma fa‘apotopotoina ‘outou mai nu‘u ‘ese‘ese na fa‘ata‘ape‘apeina ai ‘outou; e fa‘apa‘iaina fo‘i a‘u e ‘outou i luma o nu‘u ‘ese.
42. Tou te iloa o a‘u lava o le ALI‘I, pe a ‘ou ‘aumaia ‘outou i le lau‘ele‘ele o Isaraelu, o le nu‘u na ‘ou si‘i ai lo‘u lima, ‘ou te avatua i o ‘outou tamā.
43. Tou te mānatunatu ai ‘iā ‘outou amio uma ma a ‘outou mea uma na fai, sa leaga ai ‘outou; ‘ona ‘ino‘ino ai lea o ‘outou ‘iā te ‘outou ‘ona o a ‘outou mea leaga uma ‘ua ‘outou faia.
44. E iloa fo‘i e ‘outou, o a‘u lava o le ALI‘I pe a ‘ou faia ‘iā te ‘outou ‘ona o lo‘u igoa, e lē tusa ma a ‘outou amio leaga ma a ‘outou mea leaga ‘ua fai, le ‘āiga o Isaraelu e, o lo‘o fetalai mai ai le Ali‘i le ATUA.
45. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
46. Le atali‘i e o le tagata, ‘ia e fa‘asaga atu ou mata i le itū i saute ma fa‘apa‘ū atu lau ‘upu i le itū i saute ma vavalo atu i le vao matua i le fanua i le itū i saute;
47. ma fai atu i le vao matua i le itū i saute, Fa‘alogo mai ia i le afioga a le ALI‘I: O lo‘o fa‘apea ‘ona fetalai mai o le Ali‘i le ATUA, Fa‘auta ‘ou te tutu le afi ‘iā te oe, e susunuina ai la‘au mata uma ‘ua ‘iā te oe, ‘atoa ma la‘au mamago uma; e lē tineia le afi e mū saesae, e mū ai mata uma i le itū i saute, e o‘o i le itū i matū.
48. E iloa fo‘i e tagata uma o a‘u o le ALI‘I, ‘ua ‘ou tutuina; e lē tineia lava.
49. ‘Ona ‘ou fai atu ai lea, “Auē, le Ali‘i le ATUA e! ‘ua latou fai mai ‘iā te a‘u, ‘E lē tautala mai ‘ea o ia i fa‘ata‘oto?’”#