1. Na i luga ‘iā te a‘u le ‘a‘ao o le ALI‘I; na ia ‘aveina atu a‘u i le Agaga o le ALI‘I ma na tu‘uina a‘u i le fanua laugatasi, ‘ua tumu i ivi.
2. ‘Ua ia ta‘ita‘iina ane ai a‘u ia fa‘ata‘amilomilo ai lava; fa‘auta fo‘i, ‘ua matuā tele lava i le fogā‘ele‘ele; fa‘auta fo‘i, ‘ua matuā mamago lava.
3. ‘Ona fai mai lea o ia ‘iā te a‘u, “Le atali‘i e o le tagata, e mafai ‘ea ‘ona toe ola o ia ivi?”‘Ona ‘ou tali atu ai lea, “Le Ali‘i le ATUA e, ‘ua e silafia lava oe.”
4. ‘Ona fetalai mai ai lea o ia ‘iā te a‘u, “‘Ia e vavalo atu i na ivi ma fai atu i ai: Ivi mamago e, fa‘alogologo mai ia i le afioga a le ALI‘I.
5. ‘Ua fa‘apea ‘ona fetalai mai o le Ali‘i le ATUA i na ivi; Fa‘auta, ‘ou te fa‘aulu ane le mānava i totonu ‘iā te ‘outou, ‘ona ‘outou ola ai lea;
6. ‘ou te avane fo‘i ‘uāuā ‘iā te ‘outou ma ‘ou fa‘atupuina a‘e ‘a‘ano ‘iā te ‘outou ma ufiufi ‘iā te ‘outou i pa‘u, ‘ou te tu‘uina atu fo‘i le mānava i totonu ‘iā te ‘outou, e ola fo‘i ‘outou; ‘ona ‘outou iloa ai lea o a‘u lava o le ALI‘I.”
7. ‘Ona ‘ou vavalo atu ai lea e pei ‘ona poloa‘iina o a‘u; ‘ua ‘ou vavalo atu, ‘ae gāsēsē; fa‘auta fo‘i, o le gāoioi, ‘ona feso‘ota‘i lea o ivi, o le ivi i lona ivi.
8. ‘Ua ‘ou va‘ai atu, fa‘auta, ‘ua tupu a‘e ‘uāuā ma ‘a‘ano ‘iā te i latou, ‘ua ufitia fo‘i i latou i pa‘u; a ‘ua leai se mānava i totonu ‘iā te i latou.
9. ‘Ona fetalai mai lea o ia ‘iā te a‘u, “Vavalo atu ia i le mānava le atali‘i e o le tagata, ‘inā vavalo atu ia ma e fa‘apea atu i le mānava, O lo‘o fa‘apea ‘ona fetalai mai o le Ali‘i le ATUA: Mānava e, ‘inā sau ia mai matāmatagi e fa ma ia mānava atu i ia tagata fasia, ‘ia latou ola ai.”
10. ‘Ona ‘ou vavalo atu lea e pei ‘ona poloa‘iina o a‘u, ‘ona ulu ane lea o le mānava i totonu ‘iā te i latou, ‘ona latou ola ai lea ma tutū i luga i o latou vae, o le itūtau‘a e matuā tele lava.
11. ‘Ona fetalai mai lea o ia ‘iā te a‘u, “Le atali‘i e o le tagata, o ia ivi o le ‘āiga uma ia o Isaraelu; fa‘auta, ‘ua latou fai mai, ‘‘Ua mamago o matou ivi, ‘ua fa‘aumatia lo matou fa‘amoemoe; ‘ua fano lava i matou.’
12. O le mea lea ‘ia e vavalo atu ai, ‘ia fa‘apea atu ‘iā te i latou, ‘Ua fa‘apea ‘ona fetalai mai o le Ali‘i le ATUA: Fa‘auta, lo‘u nu‘u e, ‘ou te lagaina o ‘outou tu‘ugamau, ‘ou te ‘ava‘e ‘outou a‘i o ‘outou tu‘ugamau, ma ‘aumaia ‘outou i le lau‘ele‘ele o Isaraelu.
13. Lo‘u nu‘u e, tou te iloa o a‘u lava o le ALI‘I, pe a ‘ou lagaina o ‘outou tu‘ugamau ma ‘ava‘e ‘outou a‘i o ‘outou tu‘ugamau.
14. ‘Ou te tu‘uina atu fo‘i lo‘u Agaga i totonu ‘iā te ‘outou, e ola ai fo‘i ‘outou, ‘ou te fa‘anofofilemūina fo‘i ‘outou i lo ‘outou lava lau‘ele‘ele; ‘ona ‘outou iloa ai lea o a‘u lava o le ALI‘I, ‘ua ‘ou fai atu ai, ‘ou te faia fo‘i, o lo‘o fetalai mai ai le ALI‘I.”
15. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
16. O oe na fo‘i, le atali‘i o le tagata, ‘ia e avane se la‘au e tasi ma tusi ai, “Mo Iuta ma le fānauga a Isaraelu o ē ‘au ‘iā te ia;” i le e avane fo‘i se tasi la‘au ma tusi ai, “Mo Iosefa, o le la‘au Efaraima, ‘atoa ma le ‘āiga uma Isaraelu o ē ‘au ‘iā te ia.”
17. ‘Ia e fa‘aopoopoina le tasi i le tasi ‘ia fai ma la‘au e tasi mo oe; ‘ona ‘avea lea o i lā‘ua ma la‘au e tasi i lou lima.
18. A fai mai fo‘i tagata o lou nu‘u ‘iā te oe, e fa‘apea mai, “‘E te lē fa‘aali mai ‘ea ‘iā te i matou le uiga o ia mea?”
19. ‘ia e fai atu ‘iā te i latou, O lo‘o fa‘apea ‘ona fetalai mai o le Ali‘i le ATUA: Fa‘auta, ‘ou te ‘ave le la‘au o Iosefa, o lē ‘ua i le lima o Efaraima ma itū‘āiga o Isaraelu o ē ‘au ‘iā te ia ma ‘ou tu‘uina i latou e fa‘atasi ma ia, e fa‘atasi lava ma le la‘au o Iuta, e ‘avea fo‘i i latou ma la‘au e tasi, e fai fo‘i ma la‘au e tasi i lo‘u lima.
20. O la‘au fo‘i ‘e te tusi ai, e i ai ia i lou lima i o latou luma.
21. ‘Ia e fai atu fo‘i ‘iā te i latou, O lo‘o fa‘apea ‘ona fetalai mai o le Ali‘i le ATUA: Fa‘auta, ‘ou te ‘aveina atu le fānauga a Isaraelu a‘i nu‘u ‘ese ‘ua latou ō i ai ma ‘ou fa‘apotopotoina mai i latou a‘i lea itū ma lea itū ma ‘ou ‘aumaia i latou i lo latou lava lau‘ele‘ele.
22. ‘Ou te faia fo‘i i latou ma nu‘u e tasi i le lau‘ele‘ele i mauga o Isaraelu; o le tupu fo‘i e tasi e fai ma tupu ‘iā te i latou uma; e lē toe ‘avea i latou ma nu‘u e lua, e lē toe vaeluaina lava i latou e fai ma mālō e lua.
23. E lē toe leaga lava i latou ‘iā te i latou ‘iā latou tupua, po o a latou mea ‘inosia, po o se tasi o latou solitulafono; ‘ae ‘ou te fa‘aolaina i latou a‘i mea uma latou te nonofo ai, ‘ua latou fai ai le agasala, ‘ou te fa‘amamāina fo‘i i latou; e fai i latou mo‘u nu‘u, e fai fo‘i a‘u mo latou Atua.
24. O la‘u ‘au‘auna fo‘i o Tavita e fai o ia ma tupu ‘iā te i latou; e tasi fo‘i le leoleo mamoe ‘iā te i latou uma; e sāvavali fo‘i i latou i a‘u fa‘amasinoga, ma tausi i a‘u tulafono ma latou faia.
25. Latou te nonofo fo‘i i le nu‘u na ‘ou foa‘iina ‘iā Iakopo la‘u ‘au‘auna, sa mau ai o ‘outou tamā; latou te mau ai, o i latou ma a latou fānau ma le fānau a latou fānau e o‘o i le fa‘avavau; e fai fo‘i la‘u ‘au‘auna o Tavita mo latou ali‘i sili e fa‘avavau.
26. ‘Ou te osia fo‘i ma i latou le feagaiga e manuia ai; e fai fo‘i ma feagaiga ‘iā te i latou e fa‘avavau; ‘ou te fa‘anofomauina i latou ma fa‘ato‘ateleina i latou, ‘ou te tu‘u fo‘i lo‘u malumalu ‘iā te i latou e fa‘avavau.
27. E i ai fo‘i lo‘u fale ‘iā te i latou; e fai fo‘i a‘u mo latou Atua, e fai fo‘i i latou mo‘u nu‘u.
28. E iloa ai fo‘i e nu‘u ‘ese o a‘u lava o le ALI‘I o lē fa‘apa‘iaina Isaraelu, pe a i ai lo‘u malumalu i totonu ‘iā te i latou e fa‘avavau.