1. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2. Le atali‘i e o le tagata, o lo‘o e nofo i le ‘āiga fouvale ‘ua ‘iā te i latou mata e va‘ai, a ‘ua latou le va‘ai ai; ‘ua ‘iā te i latou taliga e fa‘alogo, a ‘ua latou lē fa‘alogo, ai; auā o le ‘āiga fouvale lava i latou.
3. O le mea lea, le atali‘i e o le tagata, ‘ia e sauni ai mo oe o mea e alu ma oe i le tāfeaga ma ‘ia e alu atu i le ao i o latou luma, ‘e te alu ‘ese i le mea ‘ua e mau ai i se tasi mea i o latou luma; e ui lava o le ‘āiga fouvale i latou, atonu latou te mafaufau ai.
4. ‘E te tautu‘u atu fo‘i au mea i le ao i o latou luma, e pei o mea e ‘ave i le tāfeaga. ‘E te alu atu fo‘i i le pouliuli i o latou luma, e pei o ē ō atu i le tāfeaga.
5. ‘E te ‘eli le pā i o latou luma ma tautu‘u atu ai.
6. ‘E te fa‘afuataina ia mea i lou ua i o latou luma, ma e avatu ai i le afiafi; ‘e te ufiufi ou mata ia e lē iloa ai le ‘ele‘ele; auā ‘ua ‘ou fai oe ma fa‘ailoga i le ‘āiga o Isaraelu.
7. ‘Ona ‘ou faia lea e pei ‘ona poloa‘iina mai o a‘u; na ‘ou tautu‘u atu a‘u mea i le ao pei o mea e ‘ave i le tāfeaga; na ‘ou ‘eli le pā i le afiafi i lo‘u lima; na ‘ou tautu‘u atu ai i le pouliuli ma ‘ou fa‘afuata i lo‘u ‘ua i o latou luma.
8. ‘Ua o‘o mai ai le afioga a le ALI‘I ‘iā te a‘u i le taeao, ‘ua fa‘apea mai:
9. Le atali‘i e o le tagata, e le‘i fa‘apea mai ‘ea ‘iā te oe le ‘āiga Isaraelu, le ‘āiga fouvale, “Se a ‘ea le mea ‘ua e faia?”
10. ‘Ia e fai atu ‘iā te i latou, “O lo‘o fa‘apea mai le Ali‘i le ATUA: O le avega lenei i le ali‘i sili o Ierusalema ma le ‘āiga uma o Isaraelu, o ē ‘ua ‘iā te i latou.”
11. Fai atu ia, “O a‘u nei o le fa‘ailoga ‘iā te ‘outou; e pei ‘ona ‘ou faia, e fa‘apea ‘ona faia ‘iā te i latou; e o fa‘atagataotau‘a i latou i le tāfeaga.”
12. O le ali‘i sili fo‘i o lo‘o ‘iā te i latou, na te fa‘afuataina mea i lona ‘ua i le pouliuli ma alu atu, latou te ‘elia le pā e tautu‘u atu ai; na te ufitia ona mata, ia na lē iloa le ‘ele‘ele i ona mata.
13. ‘Ou te folasia la‘u ‘upega ‘iā te ia, e lavea fo‘i o ia i la‘u mailei; ‘ou te ‘aumaia fo‘i o ia i Papelonia o le nu‘u o Kaletaia; e oti ai o ia, ‘ae na te lē va‘ai i ai.
14. ‘Ou te fa‘ata‘ape‘apeina i matāmatagi uma i latou uma o ē ‘ua ‘iā te ia e fesoasoani ‘iā te ia, ‘atoa ma ana ‘au uma; ‘ou te tō a‘e fo‘i le pelu e mulimuli atu ‘iā te i latou.
15. ‘Ona latou iloa ai lea o a‘u lava o le ALI‘I, pe a ‘ou fa‘ata‘ape‘apeina i latou i nu‘u ‘ese ma fa‘asalalauina i latou i nu‘u ‘ese‘ese.
16. ‘Ae ‘ou te fa‘atotoeina ni o latou tagata e to‘aitiiti ai le pelu ma le oge ma le fa‘ama‘i; ‘ina ‘ia latou talatala atu ‘iā latou mea ‘inosia uma i nu‘u latou te o i ai; latou te iloa fo‘i o a‘u lava o le ALI‘I.
17. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
18. Le atali‘i e o le tagata, ia e ‘ai au mea e ‘ai ma le gatete ma e inu i lou vai ma le tetemū ma le atuatuvale.
19. ‘ia e fai atu fo‘i i tagata o le nu‘u, O lo‘o fa‘apea ‘ona fetalai mai o le Ali‘i le ATUA i ē o nonofo i Ierusalema ma le lau‘ele‘ele o Isaraelu; latou te ‘a‘ai a latou mea e ‘ai ma le atuatuvale ma feinu i o latou vai ma le femēmēa‘i, ‘ina ‘ia fa‘atafunaina lo latou nu‘u ‘ia te‘a mea ‘ua tumu ai, ‘ona o le sauā o i latou uma o ē nonofo ai.
20. O ‘a‘ai ‘ua ‘ainā e fa‘agaogaoina ia, e fa‘atafunaina fo‘i le nu‘u; ‘ona ‘outou iloa ai lea o a‘u lava o le ALI‘I.
21. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
22. Le atali‘i e o le tagata, se a ‘ea lenā fa‘atusa ‘ua ‘iā te ‘outou i le nu‘u o Isaraelu, ‘ua fa‘apea mai, “‘Ua fa‘alevaleva aso, ‘ua i‘uvale fa‘aaliga uma?”
23. O le mea lea ‘ia e fai atu ai ‘iā te i latou, “‘Ua fa‘apea ‘ona fetalai mai o le Ali‘i le ATUA: ‘Ou te fa‘ate‘aina lenā fa‘atusa, latou te lē toe faia lea fa‘atusa i Isaraelu.” A ‘ia e fai atu ‘iā te i latou, ‘Ua latalata ona aso ma le taunu‘uga o fa‘aaliga uma.
24. Auā e lē toe i ai lava se fa‘aaliga fa‘atauva‘a ma se togafiti fa‘ataulāitu fa‘a‘ole‘ole i le ‘āiga o Isaraelu.
25. Auā o a‘u o le ALI‘I ‘ou te tautala atu, o le ‘upu fo‘i ‘ou te tautala atu ai e taunu‘u lea, e lē toe fa‘atuai; auā o ‘outou lava aso, le ‘āiga fouvale e, ‘ou te tautala atu ai le ‘upu ma ‘ou fa‘ataunu‘uina lava, o lo‘o fetalai mai ai le Ali‘i le ATUA.
26. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
27. Le atali‘i e o le tagata, fa‘auta, o lo‘o fai mai le ‘āiga o Isaraelu, “O le fa‘aaliga o lo‘o iloa e ia mo aso amulī lava ia, ‘ua ia vavalo fo‘i i ona po e mamao atu.”
28. O le mea lea ‘ia e fai atu ai ‘iā te i latou, O lo‘o fa‘apea ‘ona fetalai mai o le Ali‘i le ATUA: E lē toe fa‘atuai lava se tasi o a‘u ‘upu; a o le ‘upu ‘ua ‘ou fai atu ai e faia lava, o lo‘o fetalai mai ai le Ali‘i le ATUA.