1. ‘Ona ia ‘aumaia lea o a‘u i le lotoā aupito i tua, i le ala e fa‘asaga i le itū matū; na ia ‘aumai fo‘i ‘iā te a‘u i le potu i luma o le mea vavaeina, na i luma o le fale i le itū i matū.
2. O lona umi o le mea e o‘o atu i le faitoto‘a i le itū i matū e selau ona kupita, o le lautele fo‘i e limagafulu ona kupita.
3. E feagai ma kupita e lua sefulu sa i ai i le lotoā tuloto, e feagai fo‘i ma le paepae sa i le lotoā aupito i tua, sa i ai fogāfale o feagai ma fogāfale e ta‘itolu o pae fale.
4. Na i ai i luma o potu le mea e fealua‘i ai e sefulu ona kupita lona lautele e fa‘asaga i totonu, o le ala e tasi le kupita; o latou faitoto‘a fo‘i ‘ua fa‘asaga i le itū i matū.
5. A ‘ua maulalo potu aupitoaluga; auā o fogāfale ‘ua fa‘aitiitiina ai i latou o ē na aupitoalalo ma ē na i le ‘ogāloto o le fale.
6. Auā e tolu pae fale i latou, ‘ae leai ni o latou pou e pei o pou o lotoā; o le mea lea na sili ai ‘ona fa‘avāiti i latou i ē aupitoalalo ma ē na i le ‘ogāloto e fua mai i lalo.
7. O le pā fo‘i na i tua e lata ane i potu, ‘ua fa‘asaga i le lotoā aupito i tua i luma o potu, e limagafulu o kupita, o lona umi lea.
8. Auā o le umi o potu na i le lotoā aupito i tua e limagafulu ona kupita ia; fa‘auta fo‘i, e selau kupita i luma o le malumalu.
9. Na i ai fo‘i le ala i le itū i sasa‘e i lalo o ia potu, i le mea e ui atu i ai pe a sau mai le lotoā aupito i tua.
10. Na i ai potu i le mafiafia o le pā o le lotoā i le itū i sasa‘e, i luma o le mea vavae‘eseina, i luma fo‘i o le fale.
11. O le ala fo‘i i o latou luma e pei ‘ona tino mai o potu sa fa‘asaga i le itū i matū, e tusa ma ia lona umi, e tusa ma ia fo‘i lona lautele; o latou ala uma e ui atu ai e tusa ma o latou uiga, e tusa fo‘i ma o latou faitoto‘a.
12. E tusa fo‘i ma faitoto‘a o potu sa fa‘asaga i le itū i saute; na i ai le faitoto‘a i le mea e amata mai ai le ala, o le ala i luma tonu o le pā e fa‘asaga i sasa‘e, pe a ulu atu ai i latou.
13. ‘Ona fai mai lea o ia ‘iā te a‘u, “O potu o i le itū i matū ma potu i le itū i saute ‘ua i luma o le mea ‘ua vavae‘eseina, o potu pa‘ia ia e ‘a‘ai ai i mea e sili ‘ona pa‘ia e le ‘au ositaulaga o ē fa‘alatalata i le ALI‘I; e tu‘u ai fo‘i e i latou mea e sili ‘ona pa‘ia ma le taulaga i mea e ‘ai ma le taulaga mo le agasala ma le taulaga mo le sesē; auā e pa‘ia lea mea.
14. A ulufale atu ai ositaulaga, ‘ona latou le ō ‘ese lea i le mea pa‘ia e ō atu ai i le lotoā aupito i tua, ‘ae latou te tu‘uina ai o latou ‘ofu latou te ‘au‘auna a‘i; auā ‘ua pa‘ia ia; latou te ‘o‘ofu fo‘i i nisi ‘ofu ma latou fa‘alatalata i mea e fai ma le nu‘u.”
15. ‘Ua uma ‘ona fuatia e ia o le fale tuloto, ‘ona ia ‘aumaia lea o a‘u i le ala i le puipui e fa‘asaga i sasa‘e; ‘ua ia fuatia fo‘i ona itū uma.
16. ‘Ua ia fuatia le itū i sasa‘e i le u e fua a‘i, e lima selau o u i le u e fua a‘i, ‘ua so‘o ai.
17. ‘Ua ia fuatia le itū i matū, e lima selau o u i le u e fua a‘i; ‘ua so‘o ai.
18. ‘Ua ia fuatia le itū i saute, e lima selau o u i le u e fua a‘i.
19. ‘Ua ia liliu ane i le itū i sisifo, ‘ua ia fuatia ai o u e lima selau i le u e fua a‘i.
20. ‘Ua ia fuatia ona itū e fa; na i ai le pā e so‘o ai e lima selau lona umi, e lima selau fo‘i lona lautele, e vā a‘i le mea e pa‘ia ma le mea e le pa‘ia.#