Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36
  37. 37
  38. 38
  39. 39
  40. 40
  41. 41
  42. 42
  43. 43
  44. 44
  45. 45
  46. 46
  47. 47
  48. 48

Feagaiga Tuai

Feagaiga Fou

Esekielu 25 O LE TUSI PA'IA - Ekalesia Katoliko Roma (RSCB)

O le Fa‘atafunaga o Amoni ma Moapi ma Etoma ma Filisitia

1. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:

2. Le atali‘i e o le tagata, ‘ia fa‘asaga ou mata i le fānauga a Amoni ma vavalo atu ‘iā te i latou;

3. ma fai atu i le fānauga a Amoni, Fa‘alogo mai ia i le afioga a le Ali‘i le ATUA: O lo‘o fa‘apea ‘ona fetalai mai o le Ali‘i le ATUA, Sa e fai mai, “Ue!” i lo‘u malumalu ‘ina ‘ua fa‘aleagaina, ma le lau‘ele‘ele o Isaraelu ‘ina ‘ua fa‘atafunaina ma le ‘āiga o Iuta ‘ina ‘ua latou o i le tāfeaga;

4. o le mea lea, fa‘auta, ‘ou te tu‘uina atu ai oe i tagata mai sasa‘e e fai mo latou tofi, latou te fa‘atūina o latou ‘olo i lou nu‘u ma fai o latou fale i lou nu‘u; latou te ‘a‘ai fo‘i i au fua ma inu i lau suāsusu.

5. ‘Ou te tu‘uina fo‘i Rapa e fai ma lotoā a kamela, ma le lau‘ele‘ele o le fānauga a Amoni e fai ma mea e ta‘o‘oto ai lafu mamoe; tou te iloa ai o a‘u lava o le ALI‘I.

6. Auā ‘ua fa‘apea ‘ona fetalai mai o le Ali‘i le ATUA: Na e pati lima ma tatū lou vae ma ‘ua e ‘oli‘oli ma le matuā ‘ino‘ino lava o lou loto i le lau‘ele‘ele o Isaraelu;

7. o le mea lea, fa‘auta, ‘ou te fa‘aloaloa ai lo‘u lima i luga ‘iā te oe ma ‘ou tu‘uina atu oe e fai ma vete mo nu‘u ‘ese, ‘ou te vavae ‘ese ‘iā te oe i nu‘u, e fano fo‘i oe ‘iā te a‘u ai atunu‘u; ‘ou te fa‘aumatia oe; ‘ona e iloa ai lea o a‘u lava o le ALI‘I.

O le Valo‘aga e Fa‘asaga ‘iā Moapi

8. ‘Ua fa‘apea ‘ona fetalai mai o le Ali‘i le ATUA: ‘Ua fai mai Moapi ma Seira, Fa‘auta, e tusa le ‘āiga o Iuta ma nu‘u uma.

9. O le mea lea, fa‘auta, ‘ou te fa‘aavanoaina ai le itū o Moapi i ‘a‘ai, o ona ‘a‘ai fo‘i i ona tuā‘oi, o le matagofie fo‘i o le nu‘u, o Petesemota, o Paalameona, ma Kiriataima;

10. ‘ou te fa‘aavanoa ai i tagata mai sasa‘e ma ‘ou tu‘uina atu ai e fa‘atasi ma le fānauga a Amoni e fai mo latou tofi, ‘ina ‘ia lē toe manatua le fānauga a Amoni i nu‘u.

11. ‘Ou te fa‘asalaina fo‘i ‘iā Moapi; ‘ona latou iloa ai lea o a‘u lava o le ALI‘I.

O le Valo‘aga e Fa‘asaga ‘iā Etoma

12. ‘Ua fa‘apea ‘ona fetalai mai o le Ali‘i le ATUA: ‘Ua matuā taui ma sui e Etoma i le ‘āiga o Iuta, ma ‘ua matuā nofo sala lava, ‘ua latou taui atu lava ‘iā te i latou;

13. o le mea lea ‘ua fa‘apea ‘ona fetalai mai ai o le Ali‘i le ATUA, ‘Ou te fa‘aloaloa atu fo‘i lo‘u lima i luga o Etoma ma ‘ou fa‘aumatia tagata ‘atoa ma manu o i ai; ‘ou te fa‘atafunaina ai, e pau mai i Timanu, e pau atu i Titana, e oti i latou i le pelu.

14. ‘Ou te fa‘ao‘o fo‘i le taui ‘iā Etoma i le lima o lo‘u nu‘u o Isaraelu; latou te faia ‘iā Etoma e tusa ma lo‘u ita, e tusa fo‘i ma lo‘u ita tele, latou te iloa ai le taui mai ‘iā te a‘u, o lo‘o fetalai mai ai le Ali‘i le ATUA.

O le Valo‘aga e Fa‘asaga ‘iā Filisitia

15. ‘Ua fa‘apea ‘ona fetalai mai o le Ali‘i le ATUA: ‘Ua taui atu e Filisitia, ‘ua matuā taui ma sui ma le ‘ino‘ino o le loto e fa‘aumatia ai i le itatu‘u;

16. o le mea lea ‘ua fa‘apea ‘ona fetalai mai ai o le Ali‘i le ATUA, Fa‘auta, ‘ou te fa‘aloaloa alu lo‘u lima i luga o Filisitia ma ‘ou fa‘aumatia Kereti, e fano fo‘i ‘iā te a‘u e o totoe i nu‘u tū matāfaga.

17. ‘Ou te fa‘ao‘o atu ‘iā te i latou le taui tele ma a‘oa‘iga e ogo lava; latou te iloa ai o a‘u lava o le ALI‘I, pe a ‘ou fa‘ao‘o atu ‘iā te latou le taui mai ‘iā te a‘u.#