1. O ‘upu nei na fai atu ai Mose ‘iā Isaraelu uma lava i le itū mai o Ioritana, i le vao i le ‘ele‘ele laugatasi e feagai ma Sufe, i le vā o Parana, ma Topelu, ma Lapana, ma Haserota, ma Tisaapa.
2. O le sāvaliga mai Horepa i le ala e ui i le mauga o Seira e o‘o atu i Katesapanea, e sefulu ma le tasi ona aso.
3. ‘Ua o‘o i le tausaga e fagafulu, o le masina e tasi le sefulu ma le tasi, o le aso muamua o lea masina, ‘ona fai atu ai lea o Mose i le fānauga a Isaraelu o mea uma lava na poloa‘i atu ai le ALI‘I ‘iā te ia e fai atu ‘iā i latou.
4. ‘Ina ‘ua uma ‘ona fasia e ia o Sekono le tupu o sa Amorī sa nofo i Hesepona, ma Oko le tupu o Vasana sa nofo i Aserota i Eterei,
5. i le itū mai o Ioritana i le nu‘u o Moapi na amata ai ‘ona folafolaina e Mose o lenei tulafono, ‘ua fa‘apea atu:
6. “Na fetalai mai le ALI‘I lo tatou Atua ‘iā te i tatou i Horepa, ‘ua fa‘apea mai, ‘Ua leva lo ‘outou nonofo i lenei mauga.
7. ‘Ia liliu ane ‘outou, ma sāvavali, ma ō atu ‘outou i le mauga o sa Amorī, ma mea uma lava e latalata ane i ai, i le ‘ele‘ele laugatasi, ma le mauga, ma le nu‘u maulalo, ma le itū i saute, ma le matāfaga, e o‘o i le nu‘u o sa Kananā, ma Lepanona e o‘o lava i le vaitafe tele, o le vaitafe o Eufirate.
8. Fa‘auta, ‘ua ‘ou tu‘uina atu le nu‘u o ‘outou luma, ō atu ia ‘outou inā fai mo ‘outou le nu‘u na tautō ai le ALI‘I i o ‘outou tamā o Aperaamo, ma Isaako, ma Iakopo na te foa‘iina atu ‘iā te i latou, ma a latou fānau pe a mavae atu i latou.”
9. Na ‘ou fai atu fo‘i ‘iā te ‘outou i ia ona po, ‘ua fa‘apea atu, “‘Ou te lē lavātia lava ‘outou e a‘u e to‘atasi;
10. ‘ua fa‘ato‘ateleina ‘outou e le ALI‘I lo ‘outou Atua, fa‘auta fo‘i, o le aso nei e pei o fetū o le lagi ‘ona to‘atele o ‘outou.
11. ‘Ia atili fa‘ato‘ateleina ‘outou e le ALI‘I le Atua o ‘outou tamā, ‘ia fa‘ato‘aafeina lo ‘outou faitau, ma ‘ia manuia ‘outou ‘iā te ia, e pei ‘ona fetalai mai o ia ‘iā te ‘outou.
12. ‘Ou te lavātia fa‘apefea e a‘u e to‘atasi o a ‘outou mea mamafa, ma a ‘outou avega, ma a ‘outou fefinaua‘iga?
13. ‘Ia ‘outou filifilia mo ‘outou o tagata popoto o ē ‘ua mafaufau ma ē ‘ua iloa, i o ‘outou itū‘āiga, ‘ina ‘ia ‘ou tofia i latou e fai ma ali‘i ‘iā te ‘outou.”
14. Na ‘outou tali mai ‘iā te a‘u, ‘ua fa‘apea mai, “O le mea lelei lea ‘ua e fai mai ai matou te faia.”
15. ‘Ona ‘ou ‘ave ai lea o ali‘i sili o ‘outou itū‘āiga, o tagata popoto i latou, ma ē ‘ua iloa, ma ‘ou tofia i latou e fai ma ali‘i ‘iā te ‘outou, o ali‘i o ta‘ito‘aafe, ma ali‘i o ta‘ito‘aselau, ma ali‘i o ta‘ito‘alimagafulu, ma ali‘i o ta‘ito‘asefulu, ma faipule i o ‘outou itū‘āiga.
16. “O ona po lava ia na ‘ou poloa‘i atu ai i o ‘outou fa‘amasino, ‘ua fa‘apea atu, ‘Ia ‘outou fa‘alogologo i ‘upu a ‘outou uso, ma ‘ia ‘outou fa‘amasino tonu i le tagata ma lona uso, ma le tagata ‘ese o lo‘o ‘iā te ia.
17. ‘Aua tou te fa‘ailogaina se tasi i le fa‘amasinoga: e pei ‘ona ‘outou fa‘alogologo i le tagata nu‘u ia fa‘apea fo‘i i le ali‘i; ‘aua lava tou te fefefe i tagata, auā o le fa‘amasinoga o i lo ‘outou Atua lea; a o le mea e faigatā ‘iā te ‘outou, ‘ia ‘aumai lea ‘iā te a‘u, ‘ou te fa‘alogologo i ai.”
18. O ona po lava ia na ‘ou poloa‘i atu ai ‘iā te ‘outou o mea uma lava tou te faia.
19. Na tatou ō mai mai Horepa, na tatou sāvavali fo‘i i lea vao uma e lautele ma le mata‘utia, na ‘outou iloa ai i le ala i le mauga o sa Amorī, e pei ‘ona poloa‘i mai ai le ALI‘I lo tatou Atua ‘iā i tatou; ‘ona tatou ō atu lea i Katesapanea.
20. ‘Ona ‘ou fai atu lea ‘iā te ‘outou, “‘Ua ‘outou o‘o mai lava i le mauga o sa Amorī, na foa‘iina mai ‘iā i tatou e le ALI‘I lo tatou Atua.
21. Fa‘auta, ‘ua tu‘uina atu e le ALI‘I lou Atua le nu‘u i ou luma, ‘inā e alu a‘e ia, ‘ia fai mou, e pei ‘ona fetalai mai ‘iā te oe o le ALI‘I le Atua o ou tamā; ‘aua le fefe, ‘aua le atuatuvale.”
22. ‘Ona ‘outou fa‘alatalata mai lea ‘iā te a‘u o ‘outou uma lava, ‘ua ‘outou fai mai fo‘i, “‘Ia tatou ‘a‘auina atu tagata e muamua ‘iā i tatou, ‘ina ‘ia latou asiasi le nu‘u mo i tatou, ma latou ‘aumai ai se tala ‘iā i tatou i se ala tatou te ō a‘e ai, o ‘a‘ai fo‘i tatou te o i ai.”
23. Sa lelei lea ‘upu ‘iā te a‘u, ‘ona ‘ou ‘a‘auina atu ai lea ni o ‘outou, o tagata e to‘asefulu ma le to‘alua, o le itū‘āiga ma le tagata.
24. ‘Ona latou fa‘asaga a‘e lea, ma ō a‘e i le mauga, ‘ua latou o‘o atu i le alia o Esekolo, ‘ua latou asiasi ai.
25. Na tago fo‘i o latou lima i fua o le fanua, ‘ona ‘aumai ai lea ‘iā te i tatou, ma latou fo‘i mai ai ma se tala ‘iā te i tatou, ‘ua latou fa‘apea mai, “‘Ua lelei le nu‘u ‘ua foa‘iina mai e le ALI‘I lo tatou Atua ‘iā i tatou.”
26. Na ‘outou lē mafafai ‘ona ō a‘e a ‘ua ‘outou fouvale i le afioga a le ALI‘I lo ‘outou Atua.
27. Na ‘outou muimui fo‘i i o ‘outou fale ‘ie, ‘ua ‘outou fa‘apea ane, “O le ‘ino‘ino mai o le ALI‘I ‘iā i tatou ‘ua na ‘aumai ai i tatou a‘i le nu‘u o Aikupito ‘ina ‘ia tu‘uina atu i tatou i lima o sa Amorī, ‘ia fa‘aumatia ai i tatou.
28. Pe tatou te ō a‘e ifea ‘ua fa‘avaivai mai e o tatou uso o tatou loto, ‘ua fa‘apea mai, ‘O le nu‘u e sili ‘ona to‘atele, ma le maualuluga ‘iā te i tatou; o ‘a‘ai fo‘i ‘ua tetele, ma ‘ua puipui i pā e o‘o i le lagi, i le ma lea fo‘i, na matou iloa ai atali‘i o Anaki.’”
29. “‘Ona ‘ou fai atu lea ‘iā te ‘outou, ‘Aua tou te fefefe, ‘aua fo‘i tou te matata‘u ‘iā te i latou.
30. O le ALI‘I lo ‘outou Atua o lē na te muamua ‘iā te ‘outou, e tau o ia mo ‘outou, e tusa ma mea uma na na faia mo ‘outou i Aikupito i o ‘outou luma;
31. ma le vao fo‘i, na e iloa ai ‘ona tausia oe e le ALI‘I lou Atua, e pei o le tagata ‘ona tausia o lona atali‘i, i le ala uma na ‘outou sāvavali ai, ‘ua o‘o ‘ina ‘outou o‘o mai lava i lenei mea.
32. A ‘ua ‘outou lē fa‘atuatua i le ALI‘I lo ‘outou Atua i lenei lava mea,
33. o lē na muamua ‘iā te ‘outou i le ala, e sā‘ili se mea tou te tolauapi ai, o i le afi i le po, e fa‘aali atu ai ‘iā te ‘outou le ala tou te sāvavali ai, o i le ao fo‘i ‘ina o ao.”
34. ‘Ua fa‘afofogaina mai e le ALI‘I o a ‘outou ‘upu, ‘ona to‘asā lea o ia, ‘ua tautō fo‘i ia, ‘ua fa‘apea:
35. “E lē iloa lava e se to‘atasi o nei tagata o lenei tupulaga leaga le nu‘u lelei na ‘ou tautō ai e avatu mo ‘outou tamā,
36. na o Kalepo le atali‘i o Iefune, e iloa ai e ia; ‘ou te avatu fo‘i ‘iā te ia ma ana fānau le nu‘u na ia alu atu i ai; auā ‘ua matuā mulimuli atu o ia i le ALI‘I.”
37. ‘Ua to‘asā mai fo‘i le ALI‘I ‘iā te a‘u talu o ‘outou, ‘ua fa‘apea mai, “O oe fo‘i, ‘e te lē alu i ai.
38. O Iosua le atali‘i o Nuno, o lē tu i ou luma e alu lava o ia i ai; ‘ia e fa‘amalosi ‘iā te ia, auā o ia na te tofia le nu‘u mo Isaraelu.
39. O a ‘outou tamaiti fo‘i na ‘outou fai mai ai, e ‘avea i latou ma tagata o tau‘a, ma a ‘outou fānau na lē iloa i lea aso se mea lelei po o se mea leaga, latou te o‘o lava i ai, ‘ou te avatu ai ‘iā te i latou, e fai ai fo‘i mo latou tofi.
40. A o ‘outou, ‘inā liliu ane ia ‘outou, ma ō atu i le vao, i le ala i le sami Ulaula.”
41. ‘Ona ‘outou tali mai lea, na ‘outou fa‘apea mai ‘iā te a‘u, “‘Ua matou agasala atu i le ALI‘I; matou te ō a‘e, matou te si‘i atu le tau‘a, e pei o mea uma lava na poloa‘i mai ai le ALI‘I lo tatou Atua.” ‘Ona la‘ei ai lea o ‘outou ‘ua ta‘itasi ai ma ana mea tau, ‘ua oso vale fo‘i, ‘outou e ō a‘e i le mauga.
42. ‘Ona fetalai mai ai lea o le ALI‘I ‘iā te a‘u, “‘Ia e fai atu ‘iā te i latou, ‘‘Aua tou te ō a‘e, ‘aua tou te si‘i atu le tau‘a, auā o a‘u, ‘ou te lē i ai ‘iā te ‘outou; ne‘i fasia ‘outou i luma o ē ‘ua ita mai ‘iā te ‘outou.’”
43. ‘Ona ‘ou fai atu ai lea ‘iā te ‘outou, a ‘ua ‘outou lē fa‘alogo mai lava, a ‘ua ‘outou fouvale i le afioga a le ALI‘I, na ‘outou fa‘amaualuga, ma ‘outou ō a‘e i le mauga.
44. ‘Ona ō mai ai lea o sa Amorī, sa nonofo i lea mauga, e fa‘afetaia‘i ‘iā te ‘outou, na latou tuliloa fo‘i ‘iā te ‘outou, e pei ‘ona faia e lagomeli, ‘ua latou fafasi ‘iā te ‘outou i Seira e o‘o atu i Horema.
45. ‘Ona ‘outou toe fo‘i mai lea, ma ‘outou fētāgisi i luma o le ALI‘I, a ‘ua lē fa‘afofogaina mai e le ALI‘I o a ‘outou ‘upu, ‘ua lē liliu mai fo‘i ona fofoga ‘iā te ‘outou.
46. ‘Ona ‘outou nonofo ai lea i Katesa i aso e tele, o ona aso lava na ‘outou nonofo ai.