1. A fai e tu mai ‘iā te oe se perofeta, po o se faimiti na te tu‘u atu fo‘i ‘iā te oe se fa‘ailoga po o se vāvega,
2. a taunu‘u fo‘i lea fa‘ailoga po o lea vāvega, na ia fai atu ai ‘iā te oe, o lo‘o fa‘apea, “‘Inā tatou mulimuli atu ia i atua ‘ese,” (o ē na ‘outou lē iloa,) “ma ‘ia tatou ‘au‘auna i ai;”
3. ‘aua ne‘i e fa‘alogo i ‘upu a lea perofeta, po o lenā faimiti; auā e tofotofoina ai ‘outou e le ALI‘I lo ‘outou Atua, ‘ina ‘ia silafia pe tou te alofa atu i le ALI‘I lo ‘outou Atua ma o ‘outou loto ‘atoa ma o ‘outou agaga ‘atoa.
4. Tou te mulimuli atu i le ALI‘I lo ‘outou Atua, ma ‘outou matata‘u ‘iā te ia, ma tausiusi i ana poloa‘iga, tou te fa‘alogo fo‘i i lona si‘ufofoga, ma ‘outou ‘au‘auna ‘iā te ia, ma pipi‘i atu ‘iā te ia.
5. A o lenā perofeta, po o lenā faimiti, e fasiotia o ia; auā ‘ua ia tautala ‘ia te‘a ‘ese ‘outou i le ALI‘I lo ‘outou Atua, o lē na ‘aumaia ‘outou ai le nu‘u o Aikupito, ma na lavea‘iina oe ai le mea sa nofo pologa ai, ‘ina ‘ia tuleia ai oe nai le ala na fetalai mai ai le ALI‘I lou Atua ‘ia e savali i ai. ‘Ona e tu‘u‘eseina ai lea o le leaga ‘iā te oe.
6. ‘Āfai e fa‘aoso lemū ‘iā te oe lou uso, le tama a lou tinā, po o lou atali‘i, po o lou afafine, po o lau avā pele, po o lau uō e pele ‘iā te oe, o lo‘o fa‘apea mai, “‘Inā tatou ō ia, ma ‘au‘auna i atua ‘ese,” na e lē iloa, o oe, ma ou tamā;
7. o atua o nu‘u e vagavagai ai ‘outou, po o ē felāta‘i ma oe po o ē vāvā mamao ma oe, e gata mai i le tasi itū lalolagi e o‘o atu i le tasi itū lalolagi;
8. ‘aua ‘e te gaua‘i ‘iā te ia, ‘aua fo‘i ‘e te fa‘alogo ‘iā te ia; ‘aua ne‘i e alofa ‘iā te ia, ‘aua ne‘i e fa‘asao ‘iā te ia, ‘aua fo‘i ne‘i e ufiufi ‘iā te ia;
9. a ‘ia e matuā fasioti ‘iā te ia ‘ia muamua ‘ona o‘o o lou lima ‘iā te ia o fasioti ‘iā te ia, ‘ae mulimuli ‘ona o‘o o lima o le nu‘u uma lava.
10. ‘Ia e fetogi ‘iā te ia i ma‘a se‘ia oti, auā na ia sā‘ili e fa‘ate‘aina oe mai le ALI‘I lou Atua, o lē na ‘aumaia oe a‘i le nu‘u o Aikupito, o le mea sa nofo pologa ai.
11. E fa‘alogologo ai fo‘i Isaraelu uma lava, ma matata‘u ai, ma latou le toe faia se mea leaga fa‘apenā i o ‘outou nu‘u.
12. ‘Āfai ‘e te fa‘alogo ane i se ‘upu i se tasi o au ‘a‘ai, e foa‘iina mai e le ALI‘I lou Atua ‘iā te oe o nofo ai, o lo‘o fa‘apea mai,
13. ‘Ua ō atu tagata, o tagata ulavavale, a‘i lo ‘outou nu‘u, ‘ua latou fa‘ate‘aina e ‘ua nonofo i lo latou ‘a‘ai, o lo‘o fa‘apea ane, “‘Inā tatou ō ia, ma tatou ‘au‘auna i atua ‘ese,” na ‘outou lē iloa;
14. ‘ona e sā‘ili‘ili lea, ma e su‘esu‘e, ma e matuā fesili atu; fa‘auta fo‘i, ‘āfai ‘ua moni le tala, ‘ua mautinoa le mea, ‘ua faia lava lenā mea ‘inosia ‘iā te ‘outou;
15. ‘ia e matuā fasia o ē ‘ua nonofo i lea ‘a‘ai i le pelu ‘ia e fa‘aumatia ai lava i le pelu o mea uma lava o i ai, ‘atoa ma manu o i ai.
16. O le ‘oloa uma fo‘i ‘ua i ai ‘ia e fa‘apotopotoina i totonu o lona malae; ‘e te susunu fo‘i i le afi o le ‘a‘ai, ‘atoa ma le ‘oloa uma ‘ua i ai, ‘ia uma lava i le ALI‘I lou Atua; e fai fo‘i ia ma faupu‘egama‘a e fa‘avavau lava; e lē toe faia lava.
17. ‘Aua ne‘i tago atu lou lima i se tasi o ia mea ‘ua fa‘atoina; ‘ina ‘ia liliu ‘ese le ALI‘I i le tele o lona to‘asā, ma alofa atu ‘iā te oe, ma fa‘apelepele ‘iā te oe, ma ia fa‘ato‘ateleina oe, e pei ‘ona ia tautō ai i ou tamā;
18. pe a e fa‘alogo i le si‘ufofoga o le ALI‘I lou Atua, ‘ia tausi i ana poloa‘iga uma, ‘ou te fai atu ai ‘iā te oe i le aso nei, ‘ina ‘ia e fai le mea tonu i luma o le ALI‘I lou Atua.#