1. Isaraelu e, fa‘alogologo mai ia, o le a e sopo‘ia atu Ioritana i ona po nei, ‘ina ‘ia e o‘o atu e fai mo oe o nu‘u e sili ‘ona to‘atele ma le malolosi ‘iā te oe, o ‘a‘ai tetele ‘ua puipuia i pā e o‘o i le lagi.
2. O le nu‘u malolosi ma le maualuluga, o atali‘i o Anaki ‘ua e iloa, ma ‘ua e fa‘alogo ai, ‘ua fa‘apea, “Po o ai sē na te tu atu i luma o atali‘i o Anaki?”
3. ‘Ia e iloa fo‘i i le aso nei, o le ALI‘I lou Atua, o ia na te sopomua atu ‘iā te oe, o le afi ma‘ama‘ai o ia, na te fa‘aumatia i latou, na te fa‘ato‘ilaloina fo‘i i latou i ou luma; ‘e te tulia fo‘i i latou, ma vave fa‘aumatia i latou, fa‘apei ‘ona fetalai mai o le ALI‘I ‘iā te oe.
4. A tulia i latou e le ALI‘I lou Atua a‘i ou luma, ‘aua ‘e te fai ifo i lou loto, “E fa‘apea, o la‘u amiotonu ‘ua fa‘ao‘oina mai ai a‘u e le ALI‘I e fai mo‘u lenei nu‘u;” a o le amio leaga a ia nu‘u e tulia ai i latou e le ALI‘I a‘i ou luma.
5. E lē ‘ona o lau amiotonu ma le tonu o lou loto ‘e te alu atu ai e fai mo oe lo latou nu‘u; a o le amio leaga a ia nu‘u e tulia ai i latou e le ALI‘I lou Atua a‘i ou luma, ma ‘ia na fa‘ataunu‘u ai le fetalaiga na tautō ai le ALI‘I i ou tamā, o Aperaamo, o Isaako, ma Iakopo.
6. ‘Ia e iloa fo‘i e lē o lau amiotonu e foa‘iina atu ai e le ALI‘I lou Atua ‘iā te oe lenā nu‘u lelei e fai mo oe; auā o oe o le nu‘u e ma‘a‘a lava ua.
7. ‘Ia e manatua, ‘aua ne‘i galo ‘iā te oe o mea na e fa‘atupuina ai le to‘asā o le ALI‘I lou Atua i le vao; e āfua mai i le aso na e tu‘ua ai le nu‘u o Aikupito, e o‘o lava i lo ‘outou ō mai i le mea nei, ‘ua ‘outou fou vale lava i le ALI‘I.
8. O i Horepa fo‘i na ‘outou fa‘atupuina le to‘asā o le ALI‘I, ‘ona to‘asā ai lea o le ALI‘I ‘iā te ‘outou, ma fai a fa‘aumatia ‘outou e ia.
9. Na ‘ou alu a‘e i le mauga e talia papama‘a, o papa o i ai le feagaiga na osia e le ALI‘I ma ‘outou; ‘ona ‘ou nofo lea i le mauga e fagafulu o ao ma le fagafulu o po, ‘ou te le‘i ‘ai ai sina mea e ‘ai, ‘ou te le‘i inu fo‘i sina vai.
10. ‘Ona tu‘u mai lea e le ALI‘I ‘iā te a‘u o papama‘a e lua sa tusia e le ‘a‘ao o le Atua, na i ai ‘upu uma lava sa fetalai mai ai le ALI‘I ‘iā te ‘outou i le mauga mai totonu o le afi i le aso na fai ai le fa‘apotopotoga.
11. ‘Ua o‘o i le fagafulu o ao ma le fagafulu o po, ‘ona tu‘u mai ai lea e le ALI‘I ‘iā te a‘u o papama‘a, e lua, o papa o i ai le feagaiga.
12. ‘Ona fetalai mai lea o le ALI‘I ‘iā te a‘u, “Tu ia i luga, ‘ia vave ‘ona e alu i lalō a‘i le mea nei, auā o lou nu‘u na e ‘aumaia nai Aikupito ‘ua leaga lava i latou; ‘ua vave ‘ona latou ō ‘ese nai le ala na ‘ou poloa‘i atu ai ‘iā te i latou; ‘ua latou faia mo i latou le tupua u‘amea.”
13. ‘Ua fetalai mai fo‘i le ALI‘I ‘iā te a‘u, ‘ua fa‘apea mai, “‘Ua ‘ou iloa lenei nu‘u, fa‘auta fo‘i, o le nu‘u e ma‘a‘a ua.
14. Tu‘u mai ia o a‘u, se‘ia ‘ou fa‘aumatia i latou, ma sōloi‘esea lo latou igoa a‘i le lalolagi, ‘ou te faia fo‘i oe ma tupuga o le nu‘u e malosi ma le to‘atele e sili ‘iā te i latou.”
15. ‘Ona ‘ou liliu lea, ma ‘ou alu ifo nai le mauga, ‘ua mū fo‘i le mauga i le afi; sa i o‘u lima e lua o papama‘a e lua o le feagaiga.
16. Na ‘ou va‘ai atu, fa‘auta fo‘i, ‘ua ‘outou agasala i le ALI‘I lo ‘outou Atua, ‘ua ‘outou faia mo ‘outou le tama‘i povi u‘amea; ‘ua ‘outou vave ō ‘ese i le ala na poloa‘i ai le ALI‘I ‘iā te ‘outou.
17. ‘Ona ‘ou umia lea o papama‘a, e lua, ma ‘ou lafotūina ai e o‘u lima e lua, ma ‘ou nutimomoia ai i o ‘outou luma.
18. ‘Ona ‘ou fa‘apa‘ū lea i luma o le ALI‘I, fa‘apei ‘ona mua‘i faia, e fagafulu o ao ma le fagafulu o po, ‘ou te le‘i ‘ai ai sina mea e ‘ai, ‘ou te le‘i inu fo‘i sina vai, ‘ona o a ‘outou agasala uma lava na ‘outou agasala ai, ma ‘ua faia mea leaga i luma o le ALI‘I e fa‘a‘ono‘ono ‘iā te ia.
19. Auā na ‘ou fefe i le to‘atama‘i ma le to‘asā tele sa to‘asā ai le ALI‘I ‘iā te ‘outou ‘ia fa‘aumatia ai ‘outou; a ‘ua fa‘afofoga mai le ALI‘I ‘iā te a‘u i lea fo‘i aso.
20. Na to‘asā tele fo‘i le ALI‘I ‘iā Arona, na fai a fano ai o ia, ‘ona ‘ou fa‘atoga atu fo‘i lea i lea aso mo Arona.
21. ‘Ona ‘ou tago lea i le mea sa ‘outou agasala ai, o le tama‘i povi na ‘outou faia, na ‘ou susunuina i le afi, ma a‘u tu‘inini‘ia, ma a‘u matuā oloina ‘ua nini‘i e pei o le efuefu, na ‘ou sasa‘a fo‘i ona efuefu i le vaitafe e tafe ifo i le mauga.
22. Na ‘outou fa‘atupuina fo‘i le to‘asā o le ALI‘I i Tapara, ma Mase, ‘atoa ma Kiperota-atava.
23. Na ‘a‘auina atu fo‘i ‘outou e le ALI‘I nai Katesapanea, ‘ua fa‘apea mai, “‘Ia ‘outou ō a‘e e fai mo ‘outou le nu‘u ‘ua ‘ou avatu ai ‘iā te ‘outou.” ‘Ona ‘outou fouvale ai lea i le afioga a le ALI‘I lo ‘outou Atua, ‘ua ‘outou lē fa‘atuatua ‘iā te ia, ma ‘outou lē fa‘alogo i lona si‘ufofoga.
24. ‘Ua ‘outou fouvale i le ALI‘I talu le aso na ‘ou fa‘ato‘ā iloa ai ‘outou.
25. Na ‘ou fa‘apa‘ū i luma o le ALI‘I i ao e fagafulu ma le fagafulu o po fa‘apei ‘ona ‘ou mua‘i fa‘apa‘ū ai; Auā na fetalai mai le ALI‘I o le a na fa‘aumatia ‘outou.
26. Na ‘ou ‘ai‘oi atu ai i le ALI‘I, ‘ua fa‘apea atu, “Le Ali‘i e, le ATUA, ‘aua ‘e te fa‘aumatia lou nu‘u ma lou tofi na e lavea‘iina i lou mana, ‘ua e ‘aumaia fo‘i nai Aikupito i le ‘a‘ao malosi.
27. ‘Ia e manatua au ‘au‘auna o Aperaamo, o Isaako, ma Iakopo; ‘aua ‘e te silasila i le fa‘alogogatā o lenei nu‘u, ma a latou amio leaga, ma a latou agasala;
28. ne‘i fa‘apea mai le nu‘u na e ‘aumai ai i matou, ‘Auā ‘ua lē mafaia e le ALI‘I ‘ona fa‘ao‘oina i latou i le nu‘u na ia folafolaina ai ‘iā te i latou, auā fo‘i ‘ua ‘ino‘ino o ia ‘iā te i latou, o le mea lea ‘ua ia avatu ai i latou i le vao e fasioti ai ‘iā te i latou.’
29. A o lou nu‘u lava i latou ma lou tofi, o ē na e ‘aumaia i lou mana tele ma lou ‘a‘ao fa‘aloaloa.”