1. O le manuia lenei, na fa‘amanuia atu ai le fānauga a Isaraelu e Mose, le tagata o le Atua, a o le‘i oti o ia.
2. ‘Ua ia fa‘apea atu:Na afio mai le ALI‘I mai Sinai,na afio a‘e fo‘i o ia i Seira ‘iā te i latou;na pupula mai o ia mai le mauga o Parana.Na ia afio mai fo‘i ma le ‘au pa‘ia e manomānō;mai lona ‘a‘ao taumatau le afi o le tulafono mo i latou.
3. E moni, ‘ua alofa o ia i le nu‘u;o i lou lima lona ‘au pa‘ia uma lava.‘Ua latou nonofo i ou vae,e talia e i latou au afioga.
4. Na tu‘uina mai e Mose le tulafono ‘iā te i tatou,o le tofi lea mo le fa‘apotopotoga o Iakopo.
5. Na fai fo‘i o ia ma tupu i Iesuruna,‘ina o fa‘apotopotoina o ali‘i sili o le nu‘u ‘atoa ma itū‘āiga o Isaraelu.
6. ‘Ia ola Reupena,‘aua le oti,‘aua fo‘i le to‘aitiiti ona tagata.
7. O le ‘upu lenei ‘iā Iuta na ia fa‘apea mai ai:Le ALI‘I e,fa‘afofoga mai ia i le leo o Iuta,ma e ‘aumaia o ia i lona nu‘u;‘ia lima malosi lava o ia;‘ia fai fo‘i oe ma fesoasoani ‘iā te ia i ē ita ‘iā te ia.
8. Na ia fa‘apea mai fo‘i ‘iā Levi:‘Ia i ai lou Tumema ma lou Urima,i ou tagata pa‘ia na e tofotofoina i Mase,na e finau ‘iā te ia i le vai o Meripa.
9. O lē na fai atu i lona tamā ma lona tinā,“‘Ua ‘ou lē iloa atu ‘iā te ia;”o lē na lē iloa fo‘i ona uso, ‘ua na lē iloa fo‘i ana fānau;auā ‘ua latou tausi i lau afioga, ‘ua latou tāofi fo‘i i lau feagaiga.
10. Latou te a‘oa‘o atu ‘iā Iakopo i au fa‘amasinoga,ma Isaraelu i lau tulafono;latou te tu‘uina atu i ou luma o mea manogi,ma le taulaga mū uma i lou fatafaitaulaga.
11. Le ALI‘I e, ‘ia e fa‘amanuia ana ‘oloa,ma ē fiafia i le galuega a ona lima;‘ia e ta i pāpātua o ē laga mai ‘iā te ia,ma i latou o ē ita mai ‘iā te ia, ne‘i latou toe laga mai.
12. Na ia fa‘apea mai ia Peniamina:O le pele i le ALI‘I e nofo o ia ma le filemū fa‘atasi ma ia;na te fa‘amamalu ‘iā te ia i le aso ‘atoa;e nofo fo‘i o ia i le vā o ona tau‘au.
13. Na ia fa‘apea mai fo‘i ‘iā Iosefa:‘Ia fa‘amanuia lona lau‘ele‘ele e le ALI‘I i mea e sili ‘ona lelei,mai le lagi, o le sau, mea lelei mai le mea loloto o lo‘o i lalo.
14. Ma mea e sili ‘ona lelei e tutupu i le lā,ma mea e sili ‘ona lelei e tutupu i masina.
15. Ma mea e sili ‘ona lelei i mauga o le vavau,ma mea e sili ‘ona lelei o mauga iti o le fa‘avavau.
16. Ma mea e sili ‘ona lelei o le lau‘ele‘ele ma mea uma ‘ua tumu ai,ma le finagalo alofa o lē na nofo i le la‘au talatala,‘ia o‘o lava lea i luga o le ulu o Iosefa;ma le tumua‘i o lē na sili i ona uso.
17. O lona matagofie o le ulua‘i tama a lana povi lea;o ona nifo o nifo o le rema ia;na te suatia ai nu‘u uma ‘ia o‘o i tulu‘iga o le lalolagi;o mano ia o Efaraima, o afe fo‘i ia o Manase.
18. Na ia fa‘apea mai fo‘i ia Sepulona:Sepulona e, ‘ia e ‘oli‘oli i lou alu atu,ma oe Isakara e, ‘ia e ‘oli‘oli i totonu o ou fale ‘ie.
19. E vala‘au i lā‘ua i nu‘u e ō mai i le mauga;latou te fai ai taulaga tatau;auā e maua mai e i lā‘ua le ‘oloa tele mai le sami,ma le ‘oloa ‘ua lilo i le oneone.
20. Na ia fa‘apea mai fo‘i ia Kato:‘Ia manuia lē na te fa‘alauteleina Kato.O lo‘o ta‘oto o ia e pei o se leona,‘ua saeia fo‘i e ia le lima ‘atoa ma le tumua‘i.
21. ‘Ua na va‘aia fo‘i le mea e sili mo ia,auā ‘ua fa‘amauina lea mea o le tofi e le faipule;na latou o, o ia ma ali‘i sili o le nu‘u;na ia faia mea tonu mai le ALI‘I,ma ona fa‘amasinoga fa‘atasi ma Isaraelu.
22. Na ia fa‘apea fo‘i ‘iā Tanu:O Tanu o le leona ta‘anoa ia,e oso mai o ia mai Vasana.
23. Na ia fa‘apea mai fo‘i ‘iā Nafatali:Nafatali e, ‘ua e malie i le alofa, ma ‘ua tumu i le manuia mai ia ALI‘I;‘ia e fai mou le vai ma le itū i saute.
24. Na ia fa‘apea mai fo‘i ‘iā Asera:O Asera, e manuia o ia i ana fānau;‘ia fiafia ona uso ‘iā te ia;‘ia fufui fo‘i e ia lona vae i le suāu‘u.
25. O ou fa‘amau o u‘amea ma ‘apamemea ia;e pei o ou aso fo‘i e fa‘apea lou malosi.
26. E leai lava se la te tutusa ma le Atua o Iesuruna,o lo‘o ti‘eti‘e i le lagi e fai ma ou fesoasoani,e ti‘eti‘e fo‘i i ao o le lagi i lona mamalu.
27. O i le mea ‘e te nofo ai o le Atua o le fa‘avavau lea;o i ou lalo fo‘i ‘a‘ao o le fa‘avavau;e tulia fo‘i e ia i ou luma le ‘ua ita mai;na te fetalai mai fo‘i, “‘Ia e fa‘aumatia i latou.”
28. E nofo Isaraelu e to‘atasi ma le filemū;o le vaipuna o Iakopo e i ai lea i le nu‘u o saito ma uaina;o lona lagi fo‘i e totō ifo ai le sau.
29. Isaraelu e, ‘amu‘ia oe,o ai sē nu‘u e tutusa ma oe?o le nu‘u ‘ua fa‘aolaina e le ALI‘I!O le talitā e fesoasoani ‘iā te oe.O ia fo‘i le pelu e mamalu ai oe!e fa‘atagā vivi‘i ‘iā te oe o ē ita ‘iā te oe,‘e te solia fo‘i a latou mea maualuluga.#