1. O poloa‘iga uma lava ‘ou te fai atu ai ‘iā te oe i le aso nei ‘ia ‘outou tausi i ai ‘ia faia, ‘ina ‘ia ‘outou ola ai, ma ‘ia fa‘ato‘ateleina ai ‘outou, ma ‘ia ‘outou ō atu ma fai mo ‘outou le nu‘u na tautō ai le ALI‘I i o ‘outou tamā.
2. ‘Ia e manatua le ala uma lava na ta‘ita‘iina mai ai oe e le ALI‘I lou Atua i ia tausaga e fagafulu i le vao, ‘ina ‘ia na fa‘atigāina oe, ma tofotofo ai ‘iā te oe, e iloa ai mea o i lou loto, pe ‘e te tausiusi i ana poloa‘iga pe leai.
3. Na ia fa‘atigāina fo‘i oe, ma fa‘alāina oe, ‘ua na fafaga ‘iā te oe i le manai, o le mea na e lē iloa, na lē iloa fo‘i e ou tamā, ‘ina ‘ia na fa‘ailoa atu ‘iā te oe e lē na o mea e ‘ai e ola ai tagata, a o mea uma e tulei mai i le fofoga o le ALI‘I e ola ai tagata.
4. Na lē pala ou ‘ofu na e ‘ofu ai, o ou vae fo‘i na lē fulafula i ia tausaga e fagafulu.
5. ‘E te iloa fo‘i i lou loto e fa‘apei o se tagata ‘ona a‘oa‘i i lona atali‘i, e fa‘apea lava ‘ona a‘oa‘i e le ALI‘I lou Atua ‘iā te oe.
6. O lenei, ‘ia e tausiusi i poloa‘iga a le ALI‘I lou Atua, ‘ina ‘ia e savali i ona ala, ma ‘ia mata‘u ‘iā te ia.
7. Auā o le a fa‘ao‘oina oe e le ALI‘I lou Atua i le nu‘u lelei, o le nu‘u o vaitafe, o vaipuna, ‘atoa ma vai tetele e puna mai i vanu ma mauga;
8. o le nu‘u o saito, ma karite, ma vine, ma mati, ma rimoni; o le nu‘u o i ai le suāu‘u olive ma le meli.
9. O le nu‘u ‘e te ‘ai ai i mea e ‘ai ma le lē oge lava, ‘e te lē mativa ai i se mea e tasi; o le nu‘u o u‘amea ona ma‘a, o ona mauga fo‘i ‘e te ‘eli ai le ‘apamemea.
10. A ē ‘ai, ma mā‘ona ai, ‘ia e fa‘amanū atu ai i le ALI‘I lou Atua ‘ona o le nu‘u lelei ‘ua ia avatu ai ‘iā te oe.
11. ‘Ia oe, ne‘i galo ‘iā te oe le ALI‘I lou Atua, i lou lē tausi i ana poloa‘iga, ma ana fa‘amasinoga, ma ana tulafono, ‘ou te fai atu ai ‘iā te oe i le aso nei;
12. ne‘i e ‘ai, ma e mā‘ona ma e faia fale lelei ma nofo ai;
13. e tupu tele fo‘i lau lafu povi ma lau lafu mamoe, e fa‘ateleina fo‘i au ario ma au auro, e fa‘ateleina fo‘i au mea uma;
14. ‘ona fa‘amaualugaina ai lea o lou loto, ma e fa‘agalogalo i le ALI‘I lou Atua o lē na ‘aumaia oe nai le nu‘u o Aikupito, o le mea sa nofo pologa ai;
15. o lē na ta‘ita‘i ‘iā te oe i le vao e tele ma le mata‘utia, e i ai gata uogo ma akarava, o le nu‘u naumati fo‘i, e lē o i ai se vai, a ‘ua fa‘apunaina e ia le vai mo oe nai le papa alā;
16. na ia fafaga ‘iā te oe i le manai i le vao, o le mea na lē iloa e ou tamā, ‘ina ‘ia na fa‘atigāina oe, ‘ina ‘ia na tofotofo fo‘i ‘iā te oe, e fa‘amanuia ‘iā te oe i ou tausaga amulī;
17. ne‘i e fa‘apea ifo i lou loto, “O lo‘u malosi ma le malosi o lo‘u lima ‘ua ‘ou maua mai ai lenei ‘oloa.”
18. A ‘ia e manatu i le ALI‘I lou Atua, auā o ia na te avatua ‘iā te oe le malosi e maua mai ai ‘oloa, ‘ina ‘ia fa‘atumauina ai e ia lana feagaiga na ia tautō ai i ou tamā, pei ‘ona fai i le aso nei.
19. ‘Āfai fo‘i e galo ‘iā te oe le ALI‘I lou Atua, ma e mulimuli atu i atua ‘ese, ma e ‘au‘auna ‘iā i latou, ma e ifo ‘iā te i latou, ‘ou te matuā fai atu ‘iā te ‘outou i le aso nei, e fa‘aumatia lava ‘outou.
20. Fa‘apei o nu‘u e fa‘aumatia e le ALI‘I a‘i o ‘outou luma, e fa‘apea lava ‘outou ‘ona fa‘aumatia; auā ‘ua ‘outou lē mafafai ‘ona fa‘alogo i le si‘ufofoga o le ALI‘I lo ‘outou Atua.#