1. A fa‘ao‘oina oe e le ALI‘I lou Atua i le nu‘u o le a e alu i ai e fai mo oe, a tulia fo‘i e ia o nu‘u e tele i ou luma, o sa Hetī, ma sa Kirekasē, ma sa Amorī, ma sa Kananā, ma sa Perisē, ma sa Hivī, ‘atoa ma sa Iepusē, o nu‘u e fitu e sili ‘ona to‘atele ma le malolosi ‘iā te oe;
2. a tu‘uina mai i latou ‘iā te oe e le ALI‘I lou Atua ‘e te fasia i latou, ia e matuā fa‘aumatia lava i latou, ‘aua ‘e te osi se feagaiga ma i latou, ‘aua fo‘i ‘e te alofa ‘iā te i latou.
3. ‘Aua le fetaia‘i gafa ma i latou, ‘aua le avatu lou afafine ma lona atali‘i, ‘aua fo‘i ne‘i e ‘aumai lona afafine ma lou atali‘i;
4. auā e fa‘aliliu‘eseina e ia lou atali‘i, ‘ia lē mulimuli mai ‘iā te a‘u, ‘ae ‘au‘auna i atua ‘ese; ‘ona tupu ai lea o le to‘asā o le ALI‘I ‘iā te ‘outou, ma vave fa‘aumatia ai oe.
5. A ‘ia fa‘apea ‘ona fai e ‘outou ‘iā te i latou, ‘ia ‘outou sofaia o latou fatafaitaulaga, ia ‘outou tu‘ipalaina o latou tupua, ma vavae i lalo o latou tupua o Asaira, o latou tupua fo‘i ‘ua ta ‘ia ‘outou susunu i le afi;
6. auā o oe o le nu‘u pa‘ia mo le ALI‘I lou Atua, na filifilia oe e le ALI‘I lou Atua ‘ina ‘ia ‘avea ma nu‘u mōna, o le ‘oloa tāua e sili i nu‘u uma lava o i le fogā‘ele‘ele.
7. E lē ‘ona ‘ua sili ‘ona to‘atele ‘outou i nu‘u uma na mana‘o ai le ALI‘I ‘iā te ‘outou, ma na filifilia ‘outou, auā na sili ‘ona to‘aitiiti ‘outou i nu‘u uma lava.
8. ‘ae peita‘i ‘ona ‘ua alofa lava le ALI‘I ‘iā te ‘outou, ‘ona o lona tausi fo‘i o le tautoga na ia tautō ai i o ‘outou tamā, ‘ua ‘aumai ai ‘outou e le ALI‘I i le ‘a‘ao malosi, na ia fa‘aolaina fo‘i oe a‘i le mea sa nofo pologa ai, a‘i le lima o Farao le tupu o Aikupito.
9. ‘Ia e iloa fo‘i o le ALI‘I lou Atua o le Atua lava ia, o le Atua fa‘amaoni, o lē na te tausi i le feagaiga ‘atoa ma le alofa i ē alolofa atu ‘iā te ia ma tausiusi i ana poloa‘iga, e o‘o lava i le afe, o tupulaga;
10. ‘ae tauia e ia o ē ‘ino‘ino ‘iā te ia i o latou lava luma, ia fa‘aumatia i latou; e lē fa‘atuai o ia i lē ‘ino‘ino ‘iā te ia, ‘ae taui atu ‘iā te ia i ona lava luma.
11. O lenei, ‘ia e tausi i poloa‘iga, ma tulafono, ma fa‘amasinoga ‘ou te fai atu ai ‘iā te oe i le aso nei ia faia.
12. ‘Āfai fo‘i tou te fa‘alogo i ia fa‘amasinoga ma tausi i ai ia faia, ‘ona tausi lea e le ALI‘I lou Atua o le feagaiga ma le alofa ‘iā te oe na ia tautō ai i ou tamā;
13. e alofa mai fo‘i o ia ‘iā te oe, ma fa‘amanuia ‘iā te oe, ma fa‘ato‘ateleina oe; e fa‘amanuia fo‘i e ia i lau fānau, ma le fua o lou lau‘ele‘ele, o lau saito, ma lau uaina, ma lau suāu‘u, o tama a au povi, ma au lafu mamoe i le lau‘ele‘ele na na tautō ai i ou tamā e foa‘i atu ‘iā te oe.
14. E sili lou manuia i nu‘u uma lava; e leai se tane e pā po o se fafine pā ‘iā te oe ‘atoa ma au manu.
15. E ‘ave ‘ese e le ALI‘I o ma‘i uma lava ‘iā te oe, na te lē tu‘uina mai ‘iā te oe se tasi ma‘i o ma‘i leaga o Aikupito na e iloa, ‘ae tu‘uina atu ‘iā te i latou uma o ē ‘ino‘ino ‘iā te oe.
16. ‘Ia e fa‘aumatia nu‘u uma lava ‘ua tu‘uina mai e le ALI‘I lou Atua ‘iā te oe; ‘aua ne‘i e alofa ‘iā te i latou, ‘aua ne‘i e ‘au‘auna fo‘i i o latou atua; auā e ‘avea lea mea ma mailei ‘iā te oe.
17. ‘Āfai ‘e te fa‘apea ifo i lou loto, “O nu‘u ia e sili ‘ona to‘atele ‘iā te a‘u, ‘ou te mafaia fa‘apefea ‘ona tulia o i latou?”
18. ‘Aua lava ‘e te mata‘u ‘iā te i latou; ia e matuā manatua mea na faia e le ALI‘I lou Atua ‘iā Farao ma Aikupito uma lava;
19. o tofotofoga tetele sa va‘ai atu i ai ou mata, ma fa‘ailoga, ma vāvega, ma le ‘a‘ao malosi, ma le ‘a‘ao fa‘aloaloaina, na ‘aumai ai oe e le ALI‘I lou Atua; e fa‘apea lava ‘ona faia e le ALI‘I lou Atua i nu‘u uma lava ‘e te mata‘u ai.
20. E ‘auina atu fo‘i le lagomumu ‘iā te i latou e le ALI‘I lou Atua, se‘ia fa‘aumatia ai ē o totoe, ma ‘ua lalafi nai ou luma.
21. ‘Aua lava ‘e te atuatuvale ‘ona o i latou auā o le ALI‘I lou Atua o ‘iā te oe, o le Atua silisili ia ma le mata‘utia.
22. E tulia auaua‘i e le ALI‘I lou Atua ia nu‘u ai ou luma, ‘e te lē vave fa‘aumatia i latou, ne‘i tupu tele ai manu fe‘ai e tigāina ai oe.
23. ‘Ae tu‘uina mai i latou e le ALI‘I lou Atua i ou luma, ma fa‘aumatia i latou i le malaia tele, se‘ia matuā fa‘aumatia i latou.
24. Na te tu‘uina mai fo‘i o latou tupu i lou lima, ‘e te tineia fo‘i o latou igoa a‘i le lalolagi; e leai lava se tagata e tu mai e tete‘e ‘iā te oe se‘ia o‘o ‘ina fa‘aumatia i latou e oe.
25. O tupua ‘ua ta o latou atua ‘ia e susunu i le afi ‘aua ‘e te mana‘o i le ario ma lē auro o i ai, ‘aua fo‘i ‘e te ‘ave ma oe, ne‘i maileia ai oe; auā o le mea e ‘inosia lea e le ALI‘I lou Atua.
26. ‘Aua ‘e te avatu i lou fale se mea e ‘inosia, ne‘i fetu‘uina oe pei o lea mea; ‘ia e matuā ‘ino‘ino i ai, ma ia matuā ‘inosia e oe auā o le mea fetu‘uina lava lea.#