1. ‘Ona vala‘au atu lea o Mose ‘iā Isaraelu uma lava, ‘ua fa‘apea atu ‘iā te i latou: Isaraelu e, ‘ia e fa‘alogo mai i tulafono ma fa‘amasinoga ‘ou te fai atu ai ‘iā te ‘outou i le aso nei, ma ‘ia ‘outou a‘oa‘o ai, ma tausiusi i ai ‘ina ‘ia faia.
2. O le ALI‘I lo tatou Atua na ia osia le feagaiga ma i tatou i Horepa.
3. E lē o tatou tamā na osi ai e le ALI‘I lenei feagaiga ma i latou, a o i tatou lava, o i tatou ‘atoa uma e ola mai ‘i‘inei i le aso nei.
4. Na fetalai mai le ALI‘I ‘iā te ‘outou fa‘afeagai lava i le mauga ai totonu o le afi.
5. Na ‘ou tu i ia ona po i le vā o le ALI‘I ma ‘outou, o fa‘aali atu ‘iā te ‘outou le afioga a le ALI‘I; auā ‘ua ‘outou fefefe ‘ona o le afi, e le‘i ō a‘e fo‘i ‘outou i le mauga na ia fa‘apea mai:
6. O a‘u o le ALI‘I lou Atua, o lē na ‘aumaia oe nai le nu‘u o Aikupito, o le mea sa nofo pologa ai.
7. ‘Aua ne‘i e fai mo oe ni atua ‘ese i o‘u luma.
8. ‘Aua ‘e te fai mo oe se tupua ‘ua ta, o se fa‘atusa lava o se mea o i le lagi i lugā, po o i le fanua i lalo, po o i le sami o i lalo o le fanua.
9. ‘Aua ‘e te ifo i ai, ‘aua fo‘i ‘e te ‘au‘auna i ai; auā o a‘u o le ALI‘I lou Atua, o le Atua fuā, o lē taui atu i fānau o le amioletonu a o latou mātua, e o‘o i le tupulaga e tolu ma le fa o ē ‘ino‘ino mai ‘iā te a‘u;
10. a ‘ou te alofa i afe o tupulaga o ē alofa mai ‘iā te a‘u, ma tausi mai i a‘u poloa‘iga.
11. ‘Aua ‘e te ta‘u fua le suafa o le ALI‘I lou Atua; auā e lē fa‘asaoina e le ALI‘I o lē ta‘u fua i lona suafa.
12. ‘Ia e tausi le aso sapati ‘ina ‘ia fa‘apa‘iaina; fa‘apei ‘ona poloa‘i mai ai o le ALI‘I lou Atua ‘iā te oe.
13. O aso e ono ‘e te galue ai, ma fai ai au galuega uma lava;
14. a o le aso fitu o le sapati lea i le ALI‘I lou Atua; ‘aua ‘e te fai ai se galuega e tasi, o oe, ma lou atali‘i, ma lou afafine, o lau ‘au‘auna tane, ma lau ‘au‘auna fafine, ma lau povi, ma lau asini, po o se tasi o au manu, ma le tagata ‘ese o lo‘o mau ma oe, ‘ina ‘ia mālōlō o lau ‘au‘auna tane, ma lau ‘au‘auna fafine pei o oe lava.
15. ‘Ia e manatua fo‘i, na fai oe ma ‘au‘auna i le nu‘u o Aikupito, a ‘ua ‘aumaia oe e le ALI‘I lou Atua a‘i lea mea i le ‘a‘ao malosi ma le ‘a‘ao fa‘aloaloa; o le mea lea ‘ua poloa‘i mai ai le ALI‘I lou Atua ‘iā te oe ‘e te faia le aso sapati.
16. ‘Ia e āva i lou tamā ma lou tinā pei ‘ona poloa‘i mai ai o le ALI‘I lou Atua ‘iā te oe, ‘ina ‘ia fa‘alevaleva ai ou aso, ‘ina ‘ia manuia ai fo‘i oe i le nu‘u o le a foa‘iina mai e le ALI‘I lou Atua ‘iā te oe.
17. ‘Aua ‘e te fasioti tagata.
18. ‘Aua fo‘i ‘e te mulilua
19. ‘Aua fo‘i ‘e te gaoi.
20. ‘Aua fo‘i ‘e te molimau pepelo i se tasi.
21. ‘Aua fo‘i ‘e te mana‘o i le avā a lē lua te tuā‘oi, ‘aua fo‘i ‘e te mana‘o i le fale o lē lua te tuā‘oi, o lona fanua, po o lana ‘au‘auna tane, po o lana ‘au‘auna fafine, o lana povi, po o lana asini, po o se tasi mea a lē lua te tuā‘oi.
22. O ‘upu lava ia na fetalai mai ai le ALI‘I i lo ‘outou fa‘apotopotoga uma lava i le mauga, a‘i totonu o le afi, ma le ao ma le pogisā, ‘ua leo tele mai na ia le fa‘aopoopo i ai se ‘upu ‘ua na tusi mai ai fo‘i i papama‘a e lua, ‘ona ‘aumai ai lea ‘iā te a‘u.
23. Na ‘outou fa‘alogologo i le leo a‘i totonu o le pouliuli, ‘ua mū fo‘i le mauga i le afi, ‘ona fa‘alatalata mai ai lea ‘iā te a‘u o ‘outou, o matai uma o ‘outou itū‘āiga, ma o ‘outou toeaina;
24. ‘ua ‘outou fa‘apea mai, “Fa‘auta, ‘ua fa‘aalia mai ‘iā te i matou e le ALI‘I lo tatou Atua o lona pupula ma lona silisili ‘ese, o lona si‘ufofoga fo‘i ‘ua matou fa‘alogologo i ai a‘i totonu o le afi; o le aso nei ‘ua matou iloa ai ‘ua fetalai mai le Atua i tagata, ‘ae ola pea i latou.
25. O lenei, se a ‘ea le mea a matou oti ai? auā e fa‘aumatia i matou i lenā afi tele, ‘āfai matou te toe fa‘alogologo i le si‘ufofoga o le ALI‘I lo tatou Atua, ‘ona matou oti ai lea;
26. auā po o ai se tasi tagata na ia fa‘alogologo fa‘apei o i matou i le si‘ufofoga o le Atua soifua ‘ua fetalai mai a‘i totonu o le afi, ‘ae ola pea ia?
27. ‘Inā e fa‘alatalata atu ia, ma ‘ia e fa‘alogologo i mea uma e fetalai mai ai le ALI‘I lo tatou Atua, ma ‘ia e ta‘u mai ‘iā te i matou mea uma lava e fetalai mai ai le ALI‘I lo tatou Atua ‘iā te oe ‘ona matou fa‘alogologo atu lea i ai, ma matou faia.”
28. Na fa‘afofoga mai fo‘i le ALI‘I ‘iā ‘outou ‘upu sa ‘outou fai mai ai ‘iā te a‘u; ‘ona fetalai mai lea o le ALI‘I ‘iā te a‘u: “‘Ua ‘ou fa‘alogo i ‘upu a lenei nu‘u sa latou fai atu ai ‘iā te oe, ‘ua lelei ‘upu uma lava na latou fai atu ai.
29. E! ana ‘iā i latou lenā loto e matata‘u mai ai ‘iā te a‘u, ma tausiusi i a‘u poloa‘iga uma i aso uma lava, ‘ina ‘ia manuia ai i latou ‘atoa ma a latou fānau e fa‘avavau.
30. Alu ia, ‘inā fai atu ‘iā te i latou, ‘‘Ia ‘outou toe fo‘i atu i o ‘outou fale ‘ie.’
31. A o oe, ‘ia e tu mai ‘i‘inei ‘iā te a‘u, ‘ou te fai atu fo‘i ‘iā te oe i poloa‘iga uma, ma tulafono, ma fa‘amasinoga ‘e te a‘oa‘o atu ai ‘iā te i latou, ‘ia latou faia i le nu‘u ‘ou te avatu ‘iā te i latou e fai mo latou.”
32. Lenei la, ‘ia ‘outou ‘ana‘ana ‘ia faia, fa‘apei ‘ona poloa‘i mai ai le ALI‘I lo ‘outou Atua ‘iā te ‘outou, ‘aua tou te afe i le itū taumatau po o le itū tauagavale.
33. ‘Ia ‘outou sāvavali i le ala uma lava na poloa‘i mai ai le ALI‘I lo ‘outou Atua ‘iā te ‘outou, ‘ina ‘ia ‘outou ola ai, ma ia manuia ai ‘outou, ma ‘ia ‘outou nofo tulu‘i ai i le nu‘u o le a fai mo ‘outou.#