1. O ‘upu nei o le feagaiga sa fetalai mai ai le ALI‘I ‘iā Mose ‘ia faia ma le fānauga a Isaraelu i le nu‘u o Moapi, ‘ae ‘ese le feagaiga sa osia o ia ma i latou i Horepa.
2. ‘Ua vala‘au atu fo‘i Mose ‘iā Isaraelu uma, ‘ua fa‘apea atu ‘iā te i latou: ‘Ua ‘outou va‘aia mea uma lava na faia e le ALI‘I i o ‘outou luma i le nu‘u o Aikupito ‘iā Farao, ma ana ‘au‘auna uma, ‘atoa ma lona nu‘u uma;
3. o tofotofoga tetele na va‘ai i ai ou mata; o ia fa‘ailoga ma vāvega tetele;
4. a ‘ua lē foa‘iina mai e le ALI‘I ‘iā te ‘outou le loto e lagona ma mata e va‘ai, ma taliga e fa‘alogo, ‘ua o‘o mai i le aso nei.
5. Na ‘ou ta‘ita‘iina fo‘i ‘outou i le vao tausaga e fagafulu; ‘ua lē pala o ‘outou ‘ofu na ‘outou ‘ofu ai ‘ua lē pala fo‘i o ‘outou se‘evae i o ‘outou vae.
6. E le‘i ‘a‘ai ‘outou i le areto, e le‘i inu fo‘i ‘outou i le uaina po o le ‘ava; ‘ina ‘ia ‘outou iloa, o a‘u o le ALI‘I lo ‘outou Atua.
7. Na ‘outou ō mai fo‘i i lenei mea, ‘ona ō mai lea o Sekono le tupu o Hesepona, ma Oko le tupu o Vasana, e fa‘afetaia‘i ‘iā te i tatou e tau ai le tau‘a, ‘ona tatou fafasi lea ‘iā te i lā‘ua;
8. na tatou faoa fo‘i o lā‘ua lau‘ele‘ele ma foa‘i atu ai o fai ma tofi o sa Reupenā, ma sa Katō, ma le tasi vaega o le itū‘āiga o sa Manasē.
9. O lenei, ‘ia ‘outou tausi i ‘upu o lenei feagaiga ma ‘ia ‘outou faia, ‘ina ‘ia manuia ai ‘outou i mea uma lava tou te faia.
10. ‘Ua ‘outou tutū uma lava i le aso nei i luma o le ALI‘I lo ‘outou Atua; o ali‘i sili o ‘outou, o ‘outou itū‘āiga, o ‘outou toeaina fo‘i, ma o ‘outou faipule, o tagata uma o Isaraelu;
11. o ‘outou tamaiti, ma a ‘outou avā, ma le tagata ‘ese o ‘iā te oe i lau toagalauapi, o lē na te fai au fafie ‘atoa ma lē na te utufia mai ou vai;
12. ‘ina ‘ia e faia le feagaiga ma le ALI‘I lou Atua, ma lana tautoga, o lo‘o faia e le ALI‘I lou Atua ma oe i le aso nei;
13. ‘ina ‘ia fa‘atumauina oe e ia i le aso nei e fai ma nu‘u mōna, ‘ia fai fo‘i o ia mou Atua; e pei ‘ona fetalai mai ai o ia ‘iā te oe, e pei ‘ona tautō ai fo‘i o ia i ou tamā, o Aperaamo, ma Isaako, ma Iakopo.
14. E lē gata fo‘i ‘iā te ‘outou lenei feagaiga ma lenei tautoga ‘ou te faia;
15. ‘ae ‘atoa ma ē o tutū ‘i‘inei fa‘atasi ma i tatou i le aso nei i luma o le ALI‘I lo tatou Atua, ‘atoa ma i latou e lē o fa‘atasi ‘i‘inei ma i tatou i le aso nei.
16. Auā ‘ua ‘outou iloa lo tatou nonofo i le nu‘u o Aikupito, ma lo tatou ui mai i nu‘u na ‘outou ui mai ai;
17. na ‘outou iloa fo‘i a latou mea e ‘inosia, ma a latou tupua, o la‘au ma ma‘a, o ario ma auro, sa ‘iā te i latou;
18. ne‘i i ai ‘iā te ‘outou se tane, po o se fafine, po o se ‘āiga, po o se itū‘āiga, te liliu ‘ese lona loto i le aso nei, i le ALI‘I lo tatou Atua, ma alu ai e ‘au‘auna i atua ‘ese o na nu‘u; ne‘i i ai ‘iā te ‘outou se a‘a e tupu mai ai mea ‘o‘ona ma laena;
19. a o‘o fo‘i ‘ina fa‘alogo o ia i ‘upu o lenei fa‘afanoga, ‘ona fa‘a‘amu‘ia lea o ia e ia i lona loto, e fa‘apea ifo, “E ui lava ‘ina ‘ou savali i le vaogatā o lo‘u loto, ma ‘ou fa‘aopoopo i le fia inu, o le inu ia ‘onā, ‘ae filemū lava a‘u.”
20. E lē finagalo le ALI‘I e fa‘amāgalo ‘iā te ia, ‘ae pusa mai le to‘asā o le ALI‘I ma lona fua i lea tagata; e fa‘ae‘e fo‘i ‘iā te ia o mala uma lava ‘ua tusia i lenei tusi; e sōloia fo‘i e le ALI‘I lona igoa a‘i le lalolagi.
21. E vavae ‘ese fo‘i le ALI‘I ‘iā te ia i itū‘āiga uma lava o Isaraelu ‘ia leaga, e tusa ma mala uma o le feagaiga ‘ua tusia i le tusi o lenei tulafono.
22. O le tupulaga fo‘i amulī o a ‘outou fānau o ē tutupu pe a mavae atu ‘outou, ma le tagata ‘ese e sau mai le nu‘u mamao, e fai mai i latou, pe a va‘ai i latou i mala o lenā nu‘u, ma ma‘i fo‘i e mama‘i ai tagata i le ALI‘I;
23. o le teiō ma le masima, e mū ai le lau‘ele‘ele uma e lē ma totōina, e lē fua mai, e lē tutupu ai ni vao iti, e pei o le fa‘aumatia o Sotoma ma Komoro, o Atama ma Sepoima, sa fa‘aumatia e le ALI‘I i lona to‘atama‘i ma lona to‘asā;
24. e fa‘apea ane lava o nu‘u uma, “Se a le mea ‘ua fa‘apea ai ‘ona fai e le ALI‘I lenā nu‘u? se a le mea ‘ua ‘a‘asa tele ai lenei to‘asā?”
25. ‘Ona latou tali mai ai lea, “Auā ‘ua lafoa‘iina e i latou le feagaiga ma le ALI‘I o le Atua o latou tamā, sa osia e ia ma i latou ‘ina o ‘aumaia i latou e ia mai le nu‘u o Aikupito;
26. auā na latou ō ma ‘au‘auna i atua ‘ese, ma latou ifo i ai; o atua na lē iloa e i latou, e le‘i avatu fo‘i se mea ma latou;
27. na tupu fo‘i le to‘asā o le ALI‘I i lenā nu‘u, ‘ina ‘ia fa‘ao‘o i ai o mala uma ‘ua tusia i lenei tusi.
28. Na lia‘iina fo‘i i latou e le ALI‘I nai lo latou lau‘ele‘ele i lona to‘atama‘i, ma lona ma‘ema‘eā, ma lona to‘asā e matuā tele, na ia tia‘i fo‘i ‘iā te i latou i le tasi nu‘u, e pei ‘ona fai i le aso nei.”
29. O i le ALI‘I lo tatou Atua mea lilo; a o mea ‘ua fa‘ailoa mai o ‘iā te i tatou ia ma a tatou fānau e fa‘avavau, ‘ina ‘ia faia e i tatou o ‘upu uma o lenei tulafono.#