Teuteronome 10 O LE TUSI PA'IA - Ekalesia Katoliko Roma (RSCB)

O le toe faia o Papama‘a e lua na Tusia ai le Tulafono

1. O ona po ia na fetalai mai ai le ALI‘I ‘iā te a‘u, “‘Ia e ta mai ni papama‘a se lua pei o papa muamua, ma ‘ia e alu a‘e ‘iā te a‘u i le mauga; ‘ia e faia fo‘i se ‘atola‘au.

2. ‘Ou te tusi fo‘i i ia papa o ‘upu sa i papa muamua na e nutimomoia, ‘e te tu‘u ai fo‘i i le ‘atola‘au.”

3. ‘Ona ‘ou faia lea o le ‘atola‘au i le la‘au o le setima, na ‘ou ta fo‘i o papama‘a e lua pei o papa muamua, ‘ona ‘ou alu a‘e ai lea i le mauga, na i ai fo‘i papa e lua i lo‘u lima.

4. ‘Ona tusi lea e ia i papa pei o ‘upu na mua‘i tusia, o ‘upu e sefulu na fetalai mai ai le ALI‘I ‘iā te ‘outou i le mauga, mai totonu o le afi, i le aso na fai ai le fa‘apotopotoga, ‘ona ‘aumai ai lea e le ALI‘I ‘iā te a‘u.

5. ‘Ona ‘ou liliu lea, ma ‘ou alu ifo nai le mauga, ‘ua ‘ou tu‘u fo‘i papa i le ‘atola‘au na ‘ou faia, o lo‘o i ai lava, fa‘apei ‘ona poloa‘i mai ai o le ALI‘I ‘iā te a‘u.

6. ‘Ona ō atu ai lea o le fānauga a Isaraelu nai Perota o i Peneakana i Mosera; ‘ua oti ai Arona, ‘ua tanumia ai fo‘i; ‘ona fai ai lea ma ositaulaga o Eleasaro lona atali‘i e sui a‘i o ia.

7. ‘Ua latou ō atu i lea mea i Kikata, na ō atu fo‘i nai Kikata i Iatepata, o le nu‘u lea o vaitafe.

8. O ona po ia na vavae‘eseina ai e le ALI‘I o le itū‘āiga o Levi, ‘ia latou tau‘ave le ‘atola‘au o le feagaiga a le ALI‘I, ‘ia latou tutū i luma o le ALI‘I ‘ia ‘au‘auna ‘iā te ia, ma ‘ia latou fa‘amanuia atu i tagata i lona suafa, ‘ua o‘o mai i le aso nei.

9. O le mea lea e lē maua ai e Levi se fanua po o se tofi fa‘atasi ma ona uso; o le ALI‘I o lona tofi ia, fa‘apei ‘ona fetalai mai ai o le ALI‘I lou Atua ‘iā te ia.

10. Na ‘ou i ai pea i le mauga i ao e fagafulu ma po e fagafulu, pei o ona aso muamua; na fa‘afofoga mai le ALI‘I ‘iā te a‘u i ona po ia fo‘i, i le ‘ua lē finagalo le ALI‘I e fa‘auma ‘iā te oe.

11. ‘Ona fetalai mai lea o le ALI‘I ‘iā te a‘u, “Tu ia i luga, ma e alu ia e muamua i le nu‘u, ‘ia latou o‘o atu, ma ia fai mo latou le nu‘u na ‘ou tautō ai i o latou tamā e foa‘i atu ‘iā te i latou.”

O Fa‘anaunauga a le Atua

12. O lenei, Isaraelu e, se a se mea e finagalo i ai le ALI‘I lou Atua ‘iā te oe, na ‘ona ‘ia e mata‘u i le ALI‘I lou Atua, ‘ina ‘ia e savali i ona ala uma lava, ma ‘ia e alofa atu ‘iā te ia, ma ‘ia e ‘au‘auna i le ALI‘I lou Atua ma lou loto ‘atoa ma lou agaga ‘atoa,

13. ‘ina ‘ia e tausiusi i poloa‘iga a le ALI‘I ma ana tulafono ‘ou te fai atu ai ‘iā te oe i le aso nei, ‘ina ‘ia manuia ai oe?

14. Fa‘auta, o i le ALI‘I lou Atua le lagi ma le lagi o lagi, o le lalolagi fo‘i, ma mea uma lava o i ai.

15. A ‘ua fiafia ALI‘I i ou tamā, ‘ua alofa ‘iā te i latou, ‘ua ia filifilia fo‘i a latou fānau ‘ina ‘ua mavae atu i latou, o ‘outou lava ia, ‘ae tu‘ua nu‘u uma, pei ‘ona fai i le aso nei.

16. O lenei, ‘ia ‘outou peritomeina le pa‘u o ‘outou loto, ‘aua ne‘i toe ma‘a‘a o ‘outou ua.

17. Auā o le ALI‘I lo ‘outou Atua o le Atua o atua ia, o le Ali‘i o ali‘i, o le Atua silisili, e mamana o ia ma le mata‘utia, o lē na te lē fa‘ailogaina tagata, e lē talia fo‘i e ia se taui;

18. o lē na te fa‘amasinoina mo le ‘ua mātuaoti ma le fafine ‘ua oti lana tane; o le alofa atu i le tagata ‘ese, ‘ua avatu ai ‘iā te ia le mea e ‘ai ‘atoa ma ‘ofu.

19. O lenei fo‘i, ‘ia ‘outou alolofa atu i le tagata ‘ese; auā fo‘i sa tagata ‘ese ‘outou i le nu‘u o Aikupito.

20. ‘Ia e mata‘u i le ALI‘I lou Atua ‘ia e ‘au‘auna ‘iā te ia, ‘ia e pipi‘i fo‘i ‘iā te ia, ma ‘ia e tautō i lona suafa.

21. O ia lava lē ‘e te vi‘ia, o ia fo‘i o lou Atua, o le na faia mo oe nā mea tetele ma le mata‘utia na va‘ai i ai ou mata.

22. Na ō ifo i Aikupito ou tamā na o le to‘afitugafulu i latou; a o nei ona po ‘ua fa‘ato‘ateleina oe e le ALI‘I lou Atua e pei o fetū o le lagi ‘ona tele.#