Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34

Feagaiga Tuai

Feagaiga Fou

Teuteronome 28 O LE TUSI PA'IA - Ekalesia Katoliko Roma (RSCB)

O le Manuia o ē ‘Ana‘ana

1. ‘Āfai fo‘i ‘e te matuā fa‘alogo i le si‘ufofoga o le ALI‘I lou Atua, e ‘ana‘ana e fai ana poloa‘iga uma lava ‘ou te fai atu ai ‘iā te oe i le aso nei, ‘ona fa‘asilisiliina lea o oe e le ALI‘I lou Atua i nu‘u uma lava o le lalolagi;

2. e maua fo‘i e oe o nei mea uma e manuia ai; e o‘o lava ia ‘iā te oe, pe ‘āfai ‘e te fa‘alogo i le si‘ufofoga o le ALI‘I lou Atua:

3. E manuia oe i le ‘a‘ai, e manuia oe i le fanua.

4. E manuia oe i lau fānau, ma le fua o lou lau‘ele‘ele, ma fānau a au manu vaefā, o tama a au povi, ma ou lafu mamoe.

5. E manuia lau ‘ato, ‘atoa ma lau mea e palu ai falaoa.

6. E manuia oe pe a e sau, e manuia fo‘i oe pe a e alu atu.

7. E tu‘uina mai e le ALI‘I o ē ita ‘iā te oe o ē laga mai ‘iā te oe ‘ia fasia i ou luma; o le ala e fasi e ō mai ai i latou ‘iā te oe, a o ala e fitu e sōsōla atu ai i latou i ou luma.

8. E pule le ALI‘I ia manuia oe i ou fale saito, ma mea uma lava e tago i ai ou lima; na te fa‘amanuia fo‘i ‘iā te oe i le nu‘u ‘ua foa‘iina mai e le ALI‘I lou Atua ‘iā te oe.

9. E fai fo‘i oe e le ALI‘I ma nu‘u pa‘ia mo ia, e pei ‘ona tautō mai o ia ‘iā te oe, pe ‘āfai ‘e te tausiusi i poloa‘iga a le ALI‘I lou Atua, ma e savali i ona ala.

10. ‘Ona iloa ai lea e nu‘u uma o le lalolagi ‘ua fa‘aigoaina oe i le suafa o le ALI‘I; ‘ona matata‘u ai lea o i latou ‘iā te oe.

11. E fa‘ateleina e le ALI‘I o mea lelei ‘iā te oe, o lau fānau, ma fānau a au manu vaefā, ma le fua o lou lau‘ele‘ele i le lau‘ele‘ele na tautō ai le ALI‘I i ou tamā na te foa‘iina mai ‘iā te oe.

12. E tatala mai e le ALI‘I lana tu‘ugā‘oloa lelei ma oe, o le lagi lea, e foa‘iina mai ai o le timu i lou nu‘u i ona po e tatau ai, a fa‘amanuia ai fo‘i mea uma ‘e te faia i ou lima; ‘e te avatu mea i nu‘u e tele, a ‘e te lē nonō atu.

13. E fai fo‘i oe e le ALI‘I ma ulu, ‘ae lē fai ma i‘u; ‘e te aupitoaluga lava, ‘ae te lē laulalo; pe ‘āfai ‘e te fa‘alogo i poloa‘iga a le ALI‘I lou Atua, ‘ou te fai atu ai ‘iā te oe i le aso nei, e tausi i ai, ma e faia;

14. ‘aua fo‘i ‘e te alu ‘ese i ‘upu uma ‘ou te fai atu ai ‘iā te ‘outou i le aso nei, i le itū taumatau, po o le itū tauagavale, e mulimuli atu ai i atua ‘ese, ma ‘au‘auna i ai.

O le I‘uga o le lē Usiusita‘i

15. ‘Ae ‘āfai ‘e te lē fa‘alogo i le si‘ufofoga o le ALI‘I lou Atua, e ‘ana‘ana e fai ana poloa‘iga uma ma ana tulafono ‘ou te fai atu ai ‘iā te oe i le aso nei; ‘ona maua mai ai lea e oe i nei malaia uma, e o‘o lava ia ‘iā te oe.

16. E malaia oe i le ‘a‘ai, e malaia fo‘i oe i le fanua.

17. E malaia lau ‘ato, ‘atoa ma lau mea e palu ai falaoa.

18. E malaia lau fānau, ma le fua o lou lau‘ele‘ele, o tama a au povi ma ou lafu mamoe.

19. E malaia oe pe a e sau, e malaia fo‘i oe pe a e alu atu.

20. E fa‘ao‘o e le ALI‘I ‘iā te oe le malaia, ma le atuatuvale, ma le a‘oa‘iga, i mea uma lava e tago i ai ou lima e faia, se‘ia fa‘aumatia oe, ma e vave fano lava; ‘ona o le leaga o lau amio na e lafoa‘i mai ai ‘iā te a‘u.

21. E fa‘apipi‘i atu e le ALI‘I i le fa‘ama‘i ‘iā te oe, se‘ia fa‘aumatia oe e ia a‘i le lau‘ele‘ele ‘e te alu i ai e fai mou.

22. E taia oe e le ALI‘I i le ma‘i fa‘aiiva ma le ma‘i vevela, ma le ma‘i fulafula, ma le vevela tele lava; ma le naumati, ma le mamae, ma le polopologā; e tuliloa ia mea ‘iā te oe se‘ia fa‘aumatia ai oe.

23. E ‘avea fo‘i lou lagi o i ou luga ma ‘apamemea, ma le lalolagi o i ou lalo e fai lea ma u‘amea.

24. E faia e le ALI‘I le timu i lou nu‘u ma efuefu nini‘i ma efuefu; e totō ifo ia mai le lagi i ou luga, se‘ia fa‘aumatia ai oe.

25. E tu‘uina atu oe e le ALI‘I ‘ia fasia i luma o ē ita ‘iā te oe; ‘e te alu atu ‘iā te i latou i le ala e tasi, a ‘e te sola i ala e fitu i o latou luma; e tu‘uina atu fo‘i oe ‘ia fa‘asaunoa i ai mālō uma o le lalolagi.

26. E fai fo‘i lou tino oti ma mea e ‘ai ma manu felelei uma, ma manu vaefā e tata‘a, e leai sē na te tulia.

27. E taia oe o le ALI‘I i le ma‘i fulafula o Aikupito, ma le silailalo, ma le ma‘i pa‘upa‘ua, ma le ma‘i mageso, e lē mafai ‘ona fa‘amālōlōina ai oe.

28. E taia oe e le ALI‘I i le fa‘avalemalosi, ma le tauaso, ma le loto atuatuvale;

29. ‘e te tautago i le tutonu o le la, e pei ‘ona tautago o le tauaso i le pouliuli; ‘e te lē manuia fo‘i i ou ala, na ‘ona fa‘asauāina oe, ma faoa au mea i aso uma lava, ‘ae leai sē lavea‘i ‘iā te oe.

30. Lua te fai le feagaiga ma le fafine e fai mau avā, ‘ae toso o ia e le tasi tane, ‘e te faia se fale, ‘ae te lē mau ai; ‘e te faia se tōvine, ‘ae te lē fa‘atatagaina.

31. E fasia lau povi i ou luma, ‘ae te lē ‘ai ai; e faoa lau asini i ou luma, ‘ae lē toe fo‘i mai ‘iā te oe; e avatu au mamoe i ē ita mai ‘iā te oe, ‘ae lē ‘iā te oe sē na te lavea‘iina.

32. E foa‘iina atu ou atali‘i ma ou afafine i le nu‘u ‘ese, e va‘ava‘ai fo‘i ou mata, ma fole ai, ‘ona o i latou i le aso ‘atoa; e leai fo‘i se malosi ‘iā te oe e lavea‘i.

33. E ‘aina le fua o lou lau‘ele‘ele, ma au galuega uma lava, e le nu‘u ‘e te lē iloa; na ‘ona fa‘asauāina lava oe, ma fa‘ataugāina i aso uma lava;

34. ‘e te fa‘avalemalosi fo‘i ‘ona o mea e va‘ai i ai ou mata.

35. E taia oe e le ALI‘I i le papala leaga, i ou tulivae ma ou vae, e lē mafai ‘ona fa‘amamafuina; e fua mai i ou alofivae e o‘o lava i lou tumua‘i.

36. E ta‘ita‘iina e le ALI‘I o oe, ma lou tupu ‘ua e tofia mo oe, i le nu‘u ‘ua lē iloa e oe po o ou tamā; ‘e te ‘au‘auna fo‘i i lea mea i atua ‘ese, o la‘au ma ma‘a.

37. E ‘avea fo‘i oe ma mea e ofo ai, ma ‘upu fa‘atusa, ma tauemuga, i nu‘u uma lava e ta‘ita‘iina i ai oe e le ALI‘I.

38. ‘E te ‘ave ni fua e tele e totō i le fanua, ‘ae itiiti ni mea ‘e te fa‘apotopoto mai ai; auā e ‘aina e le sē akerise.

39. ‘E te faia ni tōvine, ma e galue i ai, ‘ae te lē inu i le uaina, pe tau mai ni fua auā e ‘aina e anufe.

40. E ‘iā te oe olive i ou fanua uma, ‘ae lē u‘u oe i le u‘u; auā e malili fua o lou olive.

41. E fānau ‘iā te oe atali‘i ma afafine, ‘ae lē fai i latou mau; auā e ‘avea i latou fa‘atagataotau‘a.

42. o au la‘au uma ma fua o lou lau‘ele‘ele e fa‘aumatia ia e le sē selasala.

43. O le tagata ‘ese o ‘iā te oe e matuā fa‘asilisili lava o ia ‘iā te oe; a o oe, ‘e te matuā maulalo lava ‘iā te ia.

44. ‘E te nō mea ‘iā te ia, ‘ae lē nō mea o ia ‘iā te oe; e ‘avea o ia ma ulu, ‘ae ‘avea oe ma i‘u.

45. E maua mai oe i nei malaia uma, e tuliloa ia ‘iā te oe, ma o‘o lava ‘iā te oe, se‘ia fa‘aumatia oe; auā ‘ua e lē fa‘alogo i le si‘ufofoga o le ALI‘I lou Atua, e tausi i ana poloa‘iga ma ana tulafono na ia poloa‘i mai ai, ‘iā te oe;

46. E ‘iā te oe ma au fānau ia mea, e fai ma fa‘ailoga ma vāvega e fa‘avavau.

47. Auā ‘ua e lē ‘au‘auna i le ALI‘I lou Atua ma le ‘oli‘oli, ma le fiafia o le loto, ‘ona o le tele o mea uma;

48. o le mea lea ‘e te ‘au‘auna ai ma le fia ‘ai, ma le fia inu, ma le lē lavalavā, ma le mativa, i mea uma lava, i ē ita ‘iā te oe e ‘a‘auina mai e le ALI‘I ‘iā te oe; na te fa‘ae‘e fo‘i le amo u‘amea i lou ua, se‘ia fa‘aumatia oe e ia.

49. E ‘auina mai e le ALI‘I ‘iā te oe le nu‘u mai le mea mamao, mai le tulu‘iga o le lalolagi, e pei ‘ona lele mai o le aeto; o le nu‘u ‘e te lē lagona la latou gagana;

50. o le nu‘u mata sauā, o ē le fa‘ailogaina e i latou o toeaina, e lē alofa fo‘i i tama;

51. e ‘aina fo‘i e i latou o fānau a au manu vaefā, ma fua o lou lau‘ele‘ele, se‘ia fa‘aumatia oe; latou te lē fa‘atoeina ma oe ni saito, po o uaina, po o suāu‘u, o se tama a au povi, po o ou lafu mamoe, se‘ia fa‘aumatia oe e ia.

52. Latou te si‘osi‘o ‘iā te oe i le tau‘a i au ‘a‘ai uma, se‘ia sōloia ou pā maualuluga ma le faigatā, sa e fa‘atuatua i ai, i lou nu‘u uma; latou te si‘osi‘o ‘iā te oe i au ‘a‘ai uma i lou nu‘u uma ‘ua foa‘iina mai e le ALI‘I lou Atua ‘iā te oe.

53. E ‘aina fo‘i e oe au fānau ‘ua foa‘iina mai e le ALI‘I lou Atua ‘iā te oe, o tino o ou atali‘i ma ou afafine, ‘ina ‘ua si‘osi‘oina oe, ma tigāina, e fa‘atigāteleina ai oe e i latou ‘ua ita ‘iā te oe.

54. o le tagata o ‘iā te oe e tino vaivai, ma ‘ua matuā fa‘apelepeleina, e lē alofa o ia i lona uso, ma lana avā pele, ma ana fānau ‘ua totoe e ‘ua fa‘atotoeina;

55. e lē avatua lava e ia i so latou sina fasi tino o ona atali‘i na te ‘aina; auā ‘ua leai lava sina mea ‘ua toe ‘iā te ia ‘ina ‘ua si‘osi‘oina, ma tigāina, e fa‘atigāteleina ai oe e i latou ‘ua ita ‘iā te oe i au ‘a‘ai uma.

56. O le fafine tino vaivai o ‘iā te oe, ma lē ‘ua fa‘apelepeleina, na te lē fa‘ata‘ita‘i ‘ona tu‘u ifo o lona alofivae e tu i le lau‘ele‘ele ‘ona o lona fa‘apelepeleina ma lona tino vaivai, e lē alofa o ia i lana tane pele, ma lana tama tane, ma lana tama teine,

57. ma lona fanua e pa‘ū i ona vae, ma ana fānau e fānau mai ai e ia; auā e ‘aina e ia fa‘alilolilo ‘ona o le oge o mea uma lava ‘ina ‘ua si‘osi‘oina, ma tigāina, e fa‘atigāina ai oe e i latou o ē ita ‘iā te oe i au ‘a‘ai.

58. Pe ‘āfai ‘e te lē ‘ana‘ana e fai i ‘upu uma lava o lenei tulafono ‘ua tusia i lenei tusi, ‘ina ‘ia e mata‘u i lenei suafa mamalu ma le mata‘utia, O LE ALI‘I LOU ATUA;

59. ‘ona fa‘ao‘o lea e le ALI‘I o mala ‘iā te oe, ma mala i au fānau, e ofo ai, o mala tetele lava, ma le tumau, ma ma‘i leaga, ma le tumau.

60. Na te fa‘ao‘o fo‘i ‘iā te oe o ma‘i uma o Aikupito, sa e fefe ai; e pipi‘i lava ia ‘iā te oe.

61. o ma‘i fo‘i uma lava, ma mala uma lava, e le‘i tusia i le lautusi o lenei tulafono, e fa‘ao‘o ia e le ALI‘I ‘iā te oe, se‘ia fa‘aumatia oe.

62. E to‘aitiiti fo‘i ni o ‘outou e totoe, o ‘outou sa to‘atele e pei o fetū o le lagi; auā ‘ua e lē fa‘alogo i le si‘ufofoga o le ALI‘I lou Atua.

63. E pei ‘ona fiafia fo‘i le ALI‘I ‘iā te ‘outou e agalelei ‘iā te ‘outou, ma fa‘ato‘atele ‘iā te ‘outou; e fa‘apea fo‘i ‘ona fiafia ai o le ALI‘I ‘ia fanoia ‘outou ‘iā te ia, ma ‘ia fa‘aumatia ‘outou; e tafia fo‘i ‘outou a‘i le lau‘ele‘ele ‘e te alu i ai e fai mou.

64. E fa‘ata‘ape‘ape fo‘i e le ALI‘I ‘iā te oe i nu‘u uma, e āfua mai i le tasi tulu‘iga o le lalolagi e o‘o atu i le tasi tulu‘iga o le lalolagi; ‘e te ‘au‘auna fo‘i i ai i atua ‘ese, o la‘au ma ma‘a, ‘ua lē iloa e oe po o ou tamā.

65. O le a e lē iloa sina mapu i ia nu‘u, e leai fo‘i se mea e tumau ai ou alofivae; e fa‘ao‘o fo‘i e le ALI‘I ‘iā te oe i ia nu‘u o le loto gatete, ma mata ‘ua fole, ma le loto vaivai;

66. e fa‘alētonu fo‘i lou ola; ‘e te fefe fo‘i i le po ‘atoa ma le ao, ‘e te lē sanoola i lou ola.

67. ‘E te fa‘apea ane i le taeao, “E, fia o‘o i le afiafi!” ‘e te fa‘apea ane fo‘i i le afiafi, “E, fia o‘o i le taeao!” auā o le fefe o lou loto ‘e te fefe ai, auā fo‘i o mea e va‘ai i ai ou mata.

68. E fa‘afo‘i atu fo‘i e le ALI‘I ‘iā te ‘outou i Aikupito i va‘a, (o le ala na ou fai atu ai ‘iā te oe, ‘E te lē toe va‘ai lava i ai,) e fa‘atauina atu ai fo‘i ‘outou i ē ‘ua ita ‘iā te ‘outou e fai ma ‘au‘auna tane ma ‘au‘auna fafine, se‘ia leai sē na te fa‘atauina ‘outou.#