1. O poloa‘iga ia, o tulafono, ma fa‘amasinoga na fetalai mai ai le ALI‘I lo ‘outou Atua ‘ia a‘oa‘o atu ai ‘iā te ‘outou, ‘ina ‘ia ‘outou faia i le nu‘u tou te ō atu i ai e fai mo ‘outou;
2. ‘ina ‘ia e mata‘u i le ALI‘I lou Atua, ‘e te tausiusi ai i ana tulafono ma ana poloa‘iga uma ‘ou te fai atu ai ‘iā te oe, o oe, ma lou atali‘i, ma le atali‘i o lou atali‘i i aso uma o lou olaga, ‘ina ‘ia fa‘alevalevaina ai ou aso.
3. O lenei, Isaraelu e ‘ia e fa‘alogologo mai, ma ‘ia e tausi i ai ‘ia faia, ‘ina ‘ia manuia ai oe, ma ia matua fa‘ato‘ateleina ai ‘outou, fa‘apei ‘ona fetalai mai ai ‘iā te oe le ALI‘I le Atua o ou tamā, i le nu‘u o lo‘o tafe ai le suāsusu ma le meli.
4. Isaraelu e, fa‘alogologo mai ia: O le ALI‘I lo tatou Atua, o le ALI‘I e to‘atasi lava ia.
5. ‘ia e alofa atu i le ALI‘I lou Atua ma lou loto ‘atoa, ma lou agaga ‘atoa, ma lou malosi ‘atoa.
6. ‘Ia i ai fo‘i i lou loto o ‘upu nei ‘ou te fai atu ai ‘iā te oe i le aso nei.
7. ‘Ia e matuā a‘oa‘o so‘o ai i lau fānau, ma ‘ia e tautalatala a‘i, pe a e nofo i lou fale, pe a e savali fo‘i i le ala, pe a ta‘oto, pe a e tula‘i fo‘i.
8. ‘ia e fusi ai e fai ma fa‘ailoga i lou lima, e ‘avea fo‘i ma pale i le vā o ou mata.
9. ‘Ia e tusi ai fo‘i i pou o lou fale ‘atoa ma ou puipui.
10. A fa‘ao‘oina oe e le ALI‘I lou Atua i le nu‘u na ia tautō ai i ou tamā, o Aperaamo, o Isaako, ma Iakopo, e avatu ‘iā te oe, o ‘a‘ai tetele ma le lelei, ‘e te le‘i faia,
11. o fale fo‘i e tūtūmu i mea lelei uma na e le fa‘atūtūmuina; o vai‘eli fo‘i ‘e te le‘i ‘elia, o tōvine ma olive ‘e te le‘i totōina: a e ‘ai ai, ma e mā‘ona ai,
12. ‘ia oe, ne‘i galo ‘iā te oe o le ALI‘I na na ‘aumaia oe nai le nu‘u o Aikupito, o le mea sa nofo pologa ai.
13. ‘Ia e mata‘u i le ALI‘I lou Atua, ma ‘ia e ‘au‘auna ‘iā te ia; o lona suafa fo‘i ‘e te tautō i ai.
14. ‘Aua tou te mulimuli atu i atua ‘ese, o atua o nu‘u e vagavagaia ‘outou,
15. auā o le ALI‘I lou Atua o ‘iā te oe, o le Atua fua ia, ne‘i tupu le to‘asā o le ALI‘I lou Atua ‘iā te oe, ‘ona fa‘aumatia ai lea o oe a‘i le fogā‘ele‘ele.
16. ‘Aua tou te tofotofo i le ALI‘I lo ‘outou Atua, fa‘apei ‘ona ‘outou tofotofo ‘iā te ia i Mase.
17. ‘Ia ‘outou matuā tausiusi i poloa‘iga a le ALI‘I lo ‘outou Atua, ma ana mau, ma ana tulafono, na ia poloa‘i mai ai ‘iā te oe.
18. ‘Ia e fai fo‘i le amiotonu ma le lelei i luma o le ALI‘I, ‘ina ‘ia manuia ai oe, ma ‘ia e o‘o atu, ma ia fai mo oe le nu‘u lelei na tautō ai le ALI‘I i ou tamā,
19. na te tulia ou fili uma lava ai ou luma, fa‘apei ‘ona fetalai mai ai o le ALI‘I.
20. A fesili mai lou atali‘i ‘iā te oe i se aso, o lo‘o fa‘apea mai, “Pe ni a ‘ea mau, ma tulafono, ma fa‘amasinoga, na poloa‘i mai ai le ALI‘I lo tatou Atua ‘iā te ‘outou?”
21. ‘Ona e fai atu ai lea i lou atali‘i, “Sa matou nofo pologa ‘iā Farao i Aikupito, a ‘ua ‘aumaia i matou e le ALI‘I a‘i Aikupito i le ‘a‘ao malosi;
22. na tu‘uina atu fo‘i e le ALI‘I o fa‘ailoga ma vāvega tetele na leaga a‘i Aikupito, ma Farao, ‘atoa ma lona ‘āiga uma, i o matou luma;
23. na ia ‘aumai ai fo‘i i matou, ‘ina ‘ia fa‘ao‘oina mai i matou, ia foa‘iina mai ‘iā te i tatou le nu‘u na ia tautō ai i o tatou tamā.
24. Na poloa‘i mai fo‘i le ALI‘I ‘iā te i tatou ia faia nei tulafono uma lava, ‘ia matata‘u i le ALI‘I lo tatou Atua, ‘ina ‘ia manuia ai tatou i aso uma, ‘ina ‘ia na fa‘aolaina i tatou, pei ‘ona fai i le aso nei.
25. E ‘avea fo‘i ma amiotonu ‘iā te i tatou, pe ‘āfai tatou te ‘ana‘ana ia faia ia poloa‘iga uma i luma o le ALI‘I lo tatou Atua, fa‘apei ‘ona ia poloa‘i mai ai ‘iā i tatou.”#