1. ‘Ua fai atu Mose ma toeaina o Isaraelu i le nu‘u, ‘ua fa‘apea atu: ‘Ia ‘outou tausi i poloa‘iga uma lava ‘ou te fai atu ai ‘iā te ‘outou i le aso nei.
2. O le aso fo‘i tou te sopo‘ia atu ai Ioritana, i le nu‘u ‘ua foa‘iina mai e le ALI‘I lou Atua ‘iā te oe, ‘ia e fa‘atūina ai mo oe ni ma‘a tetele, ma e valia i panisina;
3. ‘ia e tusia fo‘i i ai o ‘upu uma lava o lenei tulafono, pe a e sopo‘ia atu, ‘ina ‘ia e alu atu ai i le nu‘u ‘ua foa‘iina mai e le ALI‘I lou Atua ‘iā te oe, o le nu‘u e tafe ai le suāsusu ma le meli; e pei ‘ona fetalai mai ai le ALI‘I o le Atua o ou tamā ‘iā te oe.
4. Pe a ‘outou sopo‘ia atu Ioritana, ‘ona ‘outou fa‘atūina lea o na ma‘a, ‘ou te fai atu ai ‘iā te ‘outou i le aso nei, i le mauga o Evalu, ‘ia e valia fo‘i i panisina.
5. ‘Ia e ati a‘e fo‘i i lea mea le fatafaitaulaga mo le ALI‘I lou Atua, o le fata ma‘a; ‘aua ne‘i e talai ai i se u‘amea.
6. O ma‘a ‘ato‘atoa ‘e te ati a‘i le fatafaitaulaga o le ALI‘I lou Atua ma e fai ai taulaga mū i le ALI‘I lou Atua i ona luga;
7. ‘ia e fai ai fo‘i taulaga fa‘afetai, ma e ‘ai ai i lea mea, ma ‘oli‘oli i luma o le ALI‘I lou Atua.
8. ‘ia e tusi fo‘i i ma‘a o ‘upu uma lava o lenei tulafono, ‘ia togitogi lelei lava.
9. ‘Ona tautala atu lea o Mose ma le ‘au ositaulaga o sa Levī ‘iā Isaraelu uma lava, ‘ua fa‘apea atu: Isaraelu e, ‘ia e fa‘asaga mai ma e fa‘alogologo mai; o le aso nei ‘ua ‘avea ai oe ma nu‘u lilo o le ALI‘I lou Atua.
10. ‘Ia e fa‘alogo fo‘i i le si‘ufofoga o le ALI‘I lou Atua, ma ‘ia e faia ana poloa‘iga ma ana tulafono, ‘ou te fai atu ai ‘iā te oe i le aso nei.
11. ‘Ua fai atu fo‘i Mose i le nu‘u i lea lava aso, ‘ua fa‘apea atu:
12. E tutū i latou nei i le mauga o Keresema e fa‘amanuia atu i le nu‘u, pe a ‘outou sopo‘ia atu Ioritana; o Simeona, ma Levi, ma Iuta ma Isakara, ma Iosefa, ma Peniamina.
13. E tutū fo‘i i latou nei i le mauga o Evalu e fa‘afano; o Reupena, o Kato, ma Asera ma Sepulona, o Tanu, ma Nafatali.
14. E fai atu fo‘i sa Levī ma le leo tele, e fa‘apea atu i tagata uma lava o Isaraelu:
15. “‘Ia malaia lava le tagata na te faia se tupua ‘ua ta, po o se tupua u‘amea, o le mea e ‘inosia e le ALI‘I, ‘ua faia i lima o le tufuga, ma tu‘u ai i se mea lilo.”‘Ona tali mai ai lea o le nu‘u uma lava, e fa‘apea mai, “Amene.”
16. “‘Ia malaia lē na te fa‘alēaogāina lona tamā po o lona tinā.”‘Ona tali mai ai lea o le nu‘u uma lava, “Amene.”
17. “‘Ia malaia lē na te si‘i tuā‘oi o lē la te tuā‘oi.”‘Ona tali mai ai lea o le nu‘u uma lava, “Amene.”
18. “‘Ia malaia lē na te fa‘asesēina le tauaso i le ala.”‘Ona tali mai ai lea o le nu‘u uma, “Amene.”
19. “‘Ia malaia lē na te fa‘api‘opi‘oina le fa‘amasinoga i le tagata ‘ese, ma lē ‘ua aumatuā, ma le fafine ‘ua oti lana tane.” ‘Ona tali mai ai lea o le nu‘u uma, “Amene.”
20. “‘Ia malaia lē la te momoe ma le avā a lona tamā; auā e susu‘e e ia le ‘ie o lona tamā.”‘Ona tali mai ai lea o le nu‘u uma, “Amene.”
21. “‘Ia malaia lē la te momoe ma se manu.”‘Ona tali mai ai lea o le nu‘u uma lava, “Amene.”
22. “‘Ia malaia lē la te momoe ma lona tuafafine, o le afafine o lona tamā, po o le tama teine a lona tinā.”‘Ona tali mai ai lea o le nu‘u uma lava, “Amene.”
23. “‘Ia malaia lē la te momoe ma le tinā o lana avā.”‘Ona tali mai ai lea o le nu‘u uma, “Amene.”
24. “‘Ia malaia lē na te fasi fa‘alilolilo lē la te tuā‘oi.”‘Ona tali mai ai lea o le nu‘u uma, “Amene.”
25. “‘Ia malaia lē na te talia se taui e fasioti ai se tagata ‘ua lē sala.”‘Ona tali mai ai lea o le nu‘u uma, “Amene.”
26. “‘Ia malaia lē na te lē fa‘amauina ‘upu o lenei tulafono e faia.”‘Ona tali mai ai lea o le nu‘u uma, “Amene.”