Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36

Feagaiga Tuai

Feagaiga Fou

Numera 36 O LE TUSI PA'IA - Ekalesia Katoliko Roma (RSCB)

O isi Tulafono e Fa‘atonu ai le Nofo Tane o Fafine o Isaraelu

1. O matai sili o le ‘āiga o le fānauga a Kiliata, le atali‘i o Makiro, le atali‘i ia o Manase, o ‘āiga o atali‘i o Iosefa, ‘ua latou ō mai, ma fai mai i luma o Mose, ma luma o ali‘i sili, o matai sili o le fānauga a Isaraelu,

2. ‘ua fa‘apea mai i latou, “Na poloa‘i mai le ALI‘I ‘iā te oe, lo matou ali‘i, ‘ia tu‘uina atu le nu‘u i le vili i le fānauga a Isaraelu ‘ia fai ma tofi; na poloa‘iina fo‘i oe, lo matou ali‘i, e le ALI‘I ‘ia tu‘uina atu le tofi o lo matou uso o Selofeata i ona afafine.

3. ‘Āfai e nofo tane i latou i tagata o isi itū‘āiga o le fānauga a Isaraelu, ‘ona vavae‘eseina ai lea o lo latou tofi i tofi o matou tamā, ma fa‘aopoopoina i le tofi o le itū‘āiga latou te i ai; o vavae‘eseina ia i le fanua o lo matou tofi.

4. A o‘o fo‘i i le iupelī o le fānauga a Isaraelu, ‘ona fa‘aopoopoina ai lea o lo latou tofi i le tofi o le itū‘āiga latou te i ai; ‘ona vavae‘eseina ai lea o lo latou tofi i le tofi o le itū‘āiga o matou tamā.”

5. ‘Ona fai atu ai lea o Mose i le fānauga a Isaraelu e tusa ma le afioga a le ALI‘I, ‘ua fa‘apea atu, “E tonu le ‘upu a le itū‘āiga o le fānauga a Iosefa.

6. O le mea lenei na poloa‘i mai ai le ALI‘I i afafine o Selofeata, o lo‘o fa‘apea mai, ‘‘Ia nofo tane i latou i ē latou te loto i ai, ‘ae tau lava o le ‘āiga o le itū‘āiga o lo latou tamā latou te nofo tane ai.

7. ‘Ona lē fe‘avea‘iina ai lea o tofi o le fānauga a Isaraelu i lea itū‘āiga ma lea itū‘āiga; auā o le fānauga a Isaraelu latou te ta‘itasi ma nofo mau i le tofi o le itū‘āiga o lona tamā.

8. ‘Ai se fafine fo‘i ‘ua i ai se tofi i itū‘āiga o le fānauga a Isaraelu, e nofo tane o ia i se tasi o se ‘āiga o le itū‘āiga o lona tamā, ‘ina ‘ia ta‘itasi le fānauga a Isaraelu ma fai mōna le tofi o lona tamā.

9. E lē fe‘avea‘iina fo‘i le tofi i lea itū‘āiga ma lea itū‘āiga; ‘ae ta‘itasi le tagata o itū‘āiga o le fānauga a Isaraelu ma nofo mau i lona lava tofi.’”

10. E pei ‘ona poloa‘i mai o le ALI‘I ‘iā Mose, sa fa‘apea lava ‘ona faia e afafine o Selofeata.

11. Auā o Maala, ma Tiresa, ma Hakelu, ma Meleka, ma Noa, o afafine o Selofeata, na latou nofo tane i atali‘i o uso o lo latou tamā.

12. ‘Ua latou nofo tane i ‘āiga o le fānauga a Manase, le atali‘i o Iosefa; ‘ona i ai pea lea o lo latou tofi i le itū‘āiga o le ‘āiga o lo latou tamā.

13. O poloa‘iga lava ia ma fa‘amasinoga na poloa‘i mai ai le ALI‘I ‘iā Mose i le fānauga a Isaraelu i le ‘ele‘ele laugatasi o Moapi, e latalata ane i Ioritana, e fesagai ma Ieriko.#