1. ‘Aua ‘e te fai taulaga i le ALI‘I lou Atua i se povi po o se mamoe ‘ua i ai se mea e ponā, po o se tasi mea leaga; auā o le mea lea e ‘inosia e le ALI‘I lou Atua.
2. ‘Āfai ‘ua iloa o ‘iā te oe, i se tasi o au ‘a‘ai ‘ua foa‘iina mai e le ALI‘I lou Atua ‘iā te oe, o se tane po o se fafine, ‘ua na faia se mea leaga i luma o le ALI‘I lou Atua, e soli ai lana feagaiga;
3. po ‘ua alu o ia ma ‘au‘auna i atua ‘ese, ma ifo i ai, o le lā, po o le masina, po o se tasi i ‘au o le lagi, ‘ua ‘ou le poloa‘i atu ai;
4. ‘ona ta‘u mai ai lea ‘iā te oe, ma e fa‘alogo ai, ma e matuā su‘e atu ai; fa‘auta fo‘i, ‘ua moni ‘ua mautinoa le mea, ‘ua faia lava lenā mea ‘inosia i Isaraelu;
5. ‘ona e ‘aveina atu lea i ou faitoto‘a o lea tane po o lea fafine ‘ua na faia lenā mea leaga, ma ‘ia e fetogi i ma‘a o lea tane po o lea fafine, ia oti.
6. O mau a ē molimau e to‘alua, po o molimau e to‘atolu, o lē ‘ua tatau i ai le oti ‘ia fasiotia ai o ia; o le mau a le molimau e to‘atasi ‘aua le fasiotia ai o ia.
7. ‘Ia muamua ‘ona o‘o o lima o ē molimau ‘iā te ia e fasioti ai; ‘ae mulimuli ane o lima o le nu‘u uma lava. ‘Ona e tu‘u‘eseina ai lea o le leaga ‘iā te oe.
8. ‘Āfai fo‘i e faigatā ‘iā te oe se mea e fa‘amasino ai i le toto ma le toto, o le mea e fa‘amasinoina ma le mea e fa‘amasinoina, o le ta ma le ta, o mea e fefinaua‘i ai i au ‘a‘ai; ‘ona e tula‘i lea, ma e alu a‘e i le mea e filifilia e le ALI‘I lou Atua mōna;
9. ‘e te alu fo‘i i ositaulaga, o sa Levī, ma le fa‘amasino e i ai i ia ona po, ‘e te fesili fo‘i i ai; ‘ona latou fa‘ailoa mai lea ‘iā te oe le tonu o le mea e fa‘amasinoina;
10. ‘ona e faia lea o le mea e pei ‘ona latou fa‘ailoa mai ‘iā te oe i lea mea e filifilia e le ALI‘I; ‘ia e ‘ana‘ana fo‘i e fai e tusa ma mea uma lava latou te a‘oa‘o mai ai ‘iā te oe;
11. e tusa ma le tulafono latou te a‘oa‘o mai ai ‘iā te oe, e tusa fo‘i ma le fa‘amasinoga latou te fai mai ai ‘iā te oe, ‘ia e faia lava; ‘aua ne‘i e alu ‘ese i le ‘upu latou te fa‘ailoa mai ai ‘iā te oe, i le itū taumatau, po o le itū tauagavale.
12. O le tagata fo‘i na te faia se mea ma le fa‘amaualuga, ma le lē fia fa‘alogo i le ositaulaga e tu i lea mea e ‘au‘auna i le ALI‘I lou Atua, po o le fa‘amasino, ‘ia oti lava lea tagata; ‘ona e tu‘u‘eseina ai lea o le leaga ‘iā Isaraelu.
13. ‘Ona fa‘alogo ai lea o le nu‘u uma lava, ma matata‘u ai, ma latou le toe fa‘amaualuga.
14. Pe a e o‘o atu fo‘i i le nu‘u e foa‘iina mai e le ALI‘I lou Atua ‘iā te oe, ma e fai mou, ma e mau ai, ma e fa‘apea ane, “‘Ou te faia se tupu mo‘u, e pei o nu‘u uma lava e vagavagai mai ‘iā te a‘u;”
15. ‘ia e matuā tofia mo oe se tupu e filifilia e le ALI‘I lou Atua; o sou uso ‘e te tofia e fai ma tupu ‘iā te oe; e lē mafai ‘ona e tofia mo oe se tagata ‘ese, e lē o sou uso ia.
16. ‘Ae ‘aua lava ne‘i fa‘ateleina e ia solofanua mōna, pe toe fa‘afo‘i atu le nu‘u i Aikupito, ‘ina ‘ia fa‘ateleina ai e ia o solofanua; auā ‘ua fetalai mai ai le ALI‘I ‘iā te ‘outou, “‘Aua tou te toe fo‘i atu i lea lava ala.”
17. ‘Aua fo‘i ne‘i fa‘ato‘ateleina e ia o avā māna, ne‘i liliu‘eseina ai lona loto; ‘aua fo‘i ne‘i fa‘ateleina na‘uā e ia o ario ma auro mo ia.
18. A o‘o fo‘i ‘ina nofo o ia i le nofoāli‘i o lona mālō, na te tusia māna se tusi o lenei tulafono i se tusi a‘i lenā tusi o i luma o le ‘au ositaulaga o sa Levī,
19. ‘ia i ai fo‘i lea ‘iā te ia, na te faitau i ai fo‘i i aso uma lava o lona olaga; ‘ina ‘ia a‘oa‘oina ai o ia ‘ia mata‘u i le ALI‘I lona Atua, ma ‘ia tausi i ‘upu uma lava a lenei tulafono ma nei sauniga, na te faia;
20. ‘ina ne‘i fa‘amaualugaina lona loto i ona uso, ‘ina ne‘i te‘a ‘ese fo‘i i le poloa‘iga, i le itū taumatau po o le itū tauagavale; ‘ina ‘ia tulu‘i ai ona aso i lona mālō, o ia, ma ona atali‘i, ‘iā Isaraelu.#