1. O fānau ‘outou a le ALI‘I lo ‘outou Atua; ‘aua tou te selei o ‘outou tino, ‘aua fo‘i tou te sele maina o ‘outou muaulu mo tagata oti.
2. Auā o le nu‘u pa‘ia lava oe mo le ALI‘I lou Atua, ‘ua filifilia fo‘i oe e le ALI‘I ‘ina ‘ia ‘avea oe mōna nu‘u, o le ‘oloa tāua e sili i nu‘u uma lava o i le fogā‘ele‘ele.
3. ‘Aua ‘e te ‘aina se mea ‘inosia e tasi.
4. O manu vaefā nei tou te ‘a‘ai ai; o le povi, ma le mamoe, ma le ‘oti,
5. o le ‘aila, ma le sevi, o le imura, ma le ako, ma le tisona, ma le teō, ma le somera;
6. o manu vaefā uma fo‘i e magalua le atigivae, ma tosiluaina atigivae i itū e lua, o lē e toe ‘ai i lana mama i manu vaefā, o mea ia tou te ‘a‘ai ai.
7. ‘Ae peita‘i o mea nei tou te lē ‘a‘ai ai i manu ‘ua toe ‘a‘ai ‘iā latou mama, ma manu e magalua atigivae ‘ua tosiluaina; o le kamela, ma le anapata, ma le sefanai; auā latou te toe ‘a‘ai a latou mama, ‘ae lē magalua o latou atigivae; e leaga ia ‘iā te ‘outou.
8. O le pua‘a fo‘i, auā e magalua ona atigivae, ‘ae lē toe ‘ai i lana mama, e leaga ia ‘iā te ‘outou; ‘aua tou te ‘a‘ai i o latou tino, ‘aua fo‘i tou te papa‘i atu i o latou tino ‘ua mate.
9. O mea nei tou te ‘a‘ai ai i mea uma o i le vai; o mea uma e fai ‘apa‘apa ma una tou te ‘a‘ai ai;
10. a o mea uma ‘ua lē fai ni ‘apa‘apa ma ni una, ‘aua tou te ‘a‘ai ai; e leaga ia ‘iā te ‘outou.
11. O manu felelei uma e mama tou te ‘a‘ai ai.
12. A o mea nei ‘aua tou te ‘a‘ai ai; o le aeto, ma le perese, ma le oseni,
13. o le rae, ma le aia, ma le taie, ma manu e uiga fa‘atasi i ai;
14. ma oreva uma, ma manu e uiga fa‘atasi i ai,
15. o le iaena, ma le teemesa, ma le saape, ma le nesa, ma manu e uiga fa‘atasi i ai;
16. o le kusa, ma le inesope, ma le tanisamiti,
17. o le kati, ma le raama, ma le saleka,
18. ma le kasita, ma le matu‘u, ma manu e uiga fa‘atasi i ai; ma le tukapiti, ma le pe‘a.
19. O mea uma fo‘i e fetolofi felelei e leaga ia ‘iā te ‘outou; e lē ‘aina i latou.
20. O manu felelei uma e mama tou te ‘a‘ai ai.
21. ‘Aua tou te ‘a‘ai i se mea ‘ua mate fua; a ‘ia e avatua i le tagata e āumau i au ‘a‘ai, na te ‘ai ai; pe fa‘atauina atu e oe i se tagata ‘ese; auā o le nu‘u pa‘ia lava oe mo le ALI‘I lou Atua.‘Aua ne‘i e tunu se tama‘i oti i le suāsusu a lona tinā.
22. ‘Ia e matuā avatua le mea e sefulua‘i i mea uma e maua i au fua, e tutupu i le fanua i lea tausaga ma lea tausaga.
23. O le mea fo‘i e filifilia e ia e tu‘u ai lona suafa ‘e te ‘ai ai i luma o le ALI‘I lou Atua le mea e sefulua‘i lau saito, ma lau uaina, ma lau suāu‘u, ma ulua‘i tama a au povi ma au mamoe; ‘ina ‘ia a‘oa‘oina ai oe ‘ia mata‘u i le ALI‘I lou Atua i aso uma lava.
24. ‘Ae ‘āfai e mamao lava le ala ‘iā te oe, ma e lē lavā fo‘i ‘ona ‘ave ai; ‘āfai fo‘i e vāvā mamao ma oe le mea e filifilia e le ALI‘I lou Atua e tu‘u ai lona suafa, pe a fa‘amanuia oe e le ALI‘I lou Atua;
25. ‘ona e fa‘atau mai ai lea o tupe, ma fusi tupe ma ‘ave i lou lima, ma e alu atu i le mea ‘ua filifilia e le ALI‘I lou Atua.
26. ‘E te fa‘atau mai fo‘i i ia tupe o mea uma lava e mana‘o ai lou loto, o se povi, po o se mamoe, po o se uaina, po o se ‘ava, ‘atoa ma mea uma lava e mana‘o i ai lou loto; ‘ona e ‘ai lea i lea mea i luma o le ALI‘I lou Atua, ‘e te ‘oli‘oli fo‘i, o oe, ‘atoa ma lou ‘āiga.
27. O le sa Levī fo‘i o i lau ‘a‘ai, ‘aua ‘e te tu‘ulafoa‘i ‘iā te ia; auā e leai sona fanua po o sona tofi fa‘atasi ma oe.
28. A mavae tausaga e tolu ‘e te ‘ave lona sefulu uma lava o au mea ‘ua maua mai i lea tausaga, ma e fa‘aputu ai i lau ‘a‘ai;
29. o le sa Levī, (auā e leai sona fanua po o sona tofi fa‘atasi ma oe,) o le tagata ‘ese fo‘i ma lē ‘ua aumatuā, ma le fafine ‘ua oti lana tane, o i lau ‘a‘ai, latou te ō ane, ma latou ‘a‘ai ai ia mā‘o‘ona; ‘ina ‘ia fa‘amanuia ai oe e le ALI‘I lou Atua i galuega uma lava a ou lima ‘e te faia.#