1. Le lagi e, ua‘i mai ia ou taliga, ‘ona ‘ou tautala atu ai lea;le lalolagi e, fa‘alogologo mai ia i ‘upu a lo‘u gutu.
2. O la‘u matā‘upu e sisina ifo ia e pei o le timu,o la‘u tautalaga e totō ifo lea e pei o le sau;e pei o timuga i le vao mu‘a,e pei o uaga fo‘i i le vao iti.
3. Auā ‘ou te vala‘au atu i le suafa o le ALI‘I;‘ia ‘outou vivi‘i atu i le silisili ‘ese o lo tatou Atua.
4. O le Papa, e sa‘o lava lana galuega;auā e tonu ona ala uma lava;o le Atua fa‘amaoni, e lē o ‘iā te ia se amioletonu,o le amiotonu ma le amio sa‘o lava ia.
5. ‘Ua leaga i latou, e lē o lana fānau a o lo latou ila;o le tupulaga fa‘api‘opi‘o ma le fa‘a‘ole‘ole.
6. Tou te fa‘apea ‘ea ‘ona taui atu i le ALI‘I,le nu‘u valea e ma le lē poto?e lē o lou Tamā ‘ea o ia sa fa‘atauina mai ai oe?Pe lē o ia ‘ea na faia oe, ma na fa‘atumauina oe?
7. ‘Ia e manatua aso o le vavau;mafaufau ia i tausaga o lea tupulaga ma lea tupulaga,fesili atu i lou tamā, na te ta‘u mai ai ‘iā te oe; o ‘outou toeaina fo‘i, latou te fai mai ai ‘iā te oe.
8. O ona po na tofitofia ai e le Silisili‘ese o nu‘u,ma na fa‘ata‘ape‘apeina e ia le fānau a Atamu,na ia faia tuā‘oi o le nu‘u, e tusa ma le faitau o le fānauga a Isaraelu.
9. Auā o le tofi o le ALI‘I o lona nu‘u lea; o Iakopo o lona tofi lea ‘ua fuafuaina.
10. Na ia maua o ia i le vao,o le mea e lē ‘aina, e uiō ai manu fe‘ai, ma ‘ua gaogao;na ia si‘osi‘o ‘iā te ia, ma a‘oa‘o atu ‘iā te ia,na ia leoleo ‘iā te ia e pei o lona tamatama‘imata.
11. E pei o le aeto ‘ona fa‘aoso i ana tama, e fa‘apepepepe i luga o ana tama,e fola ona ‘apa‘au, e saposapo ‘iā te i latou,e ‘ave ‘iā te i latou i luga i ona ‘apa‘au.
12. Sa fa‘apea le ALI‘I e to‘atasi ‘ona ta‘ita‘i ‘iā te ia,sa leai fo‘i se atua ‘ese e to‘alua ma ia.
13. Na ia fa‘ati‘eti‘e ‘iā te ia i mea maualuluga o le lalolagi,‘ina ‘ia ‘ai fo‘i o ia i fua o le fanua;na ia fafaga fo‘i ‘iā te ia i le meli mai le papa,ma le suāu‘u mai le papa alā.
14. O suāsusu to‘a o povi, ma suāsusu o mamoe,o ē pepeti fo‘i o tama‘i mamoe, ma mamoe po‘a o Vasana,o ‘oti po‘a fo‘i, ma le saito e sili ‘ona lelei; na e inu fo‘i i le suāvine totototo e lē suia.
15. Na puta Iesuruna, ma ‘ua vaogatā,‘ua e puta, na e tino tele,‘ua e puta lava; ‘ona tu‘ulafoa‘iina lea e ia o le Atua,na ia faia o ia, ma ‘ua ‘ino‘ino o ia i le Papa o lona olataga.
16. Na latou fa‘atupuina lona fuā ‘ona o atua ‘ese;na latou fa‘a‘ono‘ono ‘iā te ia i mea ‘inosia.
17. Na latou fai taulaga i temoni, e lē o le Atua;o atua na lē iloa o i latou;o atua fou na se‘i tutupu na lē matata‘u i ai o ‘outou tamā.
18. ‘Ua lē manatua e oe le Papa na fānaua oe,ma ‘ua e fa‘agalogaloina le Atua na ia faia oe.
19. Na silasila le ALI‘I ‘ona ‘ino‘ino lea o ia ‘iā te i latou,‘ona o le fa‘a‘ono‘ono mai o ona atali‘i ma ona afafine.
20. ‘Ona fetalai mai lea o ia: ‘Ou te ‘alo o‘u mata ‘iā te i latou,‘ia ‘ou iloa pe se a lo latou i‘uga;auā o le tupulaga fa‘api‘opi‘o i latou, o le fānau ‘ua lē o i ai se fa‘amaoni.
21. ‘Ua fa‘atupuina e i latou lo‘u fuā i le mea ‘ua lē se atua;‘ua fa‘a‘ono‘ono i latou ‘iā te a‘u,‘iā latou mea fa‘atauva‘a.O a‘u fo‘i, ‘ou te fa‘atupuina lo latou fuā ‘iā te i latou e lē se nu‘u,‘ou te fa‘a‘ono‘ono ‘iā te i latou i le nu‘u valea.
22. Auā ‘ua si‘a le afi i lo‘u ita,e mū ifo fo‘i ia e o‘o lava i seoli e maulalo lava;e fa‘aumatia ai le lalolagi ma ona fua,e mū ai fo‘i fa‘avae o mauga.
23. ‘Ou te fa‘aputuina i luga ‘iā te i latou mea leaga;‘ou te fa‘auma atu a‘u ū fanafana ‘iā te i latou.
24. E tinovavale i latou i le oge, e fa‘aumatia fo‘i i le ma‘i vevela,ma le mala e fano ai.‘Ou te ‘auina fo‘i manu fe‘ai ‘iā te i latou,ma mea ‘o‘ona o gata o le ‘ele‘ele.
25. O le pelu i tua o le ‘a‘ai,ma le mata‘u i totonu.E fa‘aumatia ai taulele‘a ma taupou,o tama meamea ma tagata ulusinā.
26. Na ou fai ane, ‘ou te fa‘ata‘ape‘ape ‘iā te i latou,‘ou te fa‘ate‘a‘eseina lo latou fa‘amanatuga i tagata.
27. ‘Ana ‘ou lē fefe i le fa‘a‘ono‘ono o ē ita mai,ne‘i lē iloa e o latou fili, ne‘i latou fa‘apea ane,“O tatou lima malosi, ‘ae lē o le ALI‘I na faia o nei mea uma.”
28. Auā o le nu‘u i latou e lē o i ai ni pulega,‘ua leai fo‘i se fa‘autauta ‘iā te i latou.
29. E, ana latou popoto, ana latou iloa lenei mea,‘ina ‘ia latou mafaufau i o latou i‘uga.
30. Pe fa‘apefea ‘ona tulia e le to‘atasi le to‘aafe,ma tutuli e le to‘alua o afe o sefulu,‘ana le fa‘atauina atu i latou e lo latou Papa,ma tu‘uina atu i latou e le ALI‘I?
31. Auā e lē pei o lo tatou Papa lo latou papa,‘ua fai fo‘i o ē ita mai ‘iā te i tatou ma fa‘amasino i ai.
32. Auā o lo latou vine mai le vine o Sotoma lea mai fanua o Komoro fo‘i;o latou fua o vine o vine ‘o‘ona ia, e ‘o‘ona fo‘i o latou fuifuivine,
33. po le mea ‘ona o gata o latou uaina, ma le mea matuā ‘ona o asipi.
34. E le teua ‘ea lenei mea e a‘u,ma fa‘amauina fa‘atasi ma a‘u ‘oloa?
35. O ‘iā te a‘u le taui ma sui,‘atoa ma le taui atu i ona po e mapeva ai o latou vae;auā ‘ua lata mai le aso latou te malaia ai, o lo‘o fa‘ata‘alise mai fo‘i mea e o‘o ‘iā te i latou.
36. Auā e fa‘amasinoina e le ALI‘I lona nu‘u,e salamō fo‘i o ia ‘ona o ana ‘au‘auna,pe a silafia e ia ‘ua mavae lo latou malosi,ma ‘ua lē toe se pologa po o se sa‘oloto.
37. ‘Ona fetalai mai lea o ia,O fea o i ai o latou atua, o le papa na latou fa‘atuatua i ai.?
38. O ē na ‘a‘ai i ga‘o o a latou taulaga,o ē na inu le uaina o a latou taulaga i mea e inu?ia latou tutū mai, ma fesoasoani ‘iā te ‘outou,‘ia fai i latou ma lafitaga mo ‘outou.
39. O lenei, ‘ia ‘outou iloa o a‘u, o a‘u lava o ia,e leai fo‘i se atua e to‘alua ma a‘u.‘Ou te fasiotia, ma ‘ou fa‘aolaina; ‘ou te taia ma ‘ou fa‘amālōlōina;e leai fo‘i se na te lavea‘i mai ai lo‘u lima.
40. ‘Aua ‘ou te si‘i lo‘u lima i le lagi, ma ‘ou fa‘apea ane,‘ou te ola e fa‘avavau.
41. ‘Āfai ‘ou te fa‘ama‘ai la‘u pelu pupula,ma tago lo‘u lima i le fa‘amasinoga,‘ou te taui ma sui i ē o fai a‘u ma fili,ma ‘ou taui atu i ē o ‘ino‘ino mai ‘iā te a‘u.
42. ‘Ou te fa‘ainu ‘ia ‘onā a‘u ū fanafana i le toto,e ‘ai fo‘i la‘u pelu i tino o tagata.O le toto o ē ‘ua fasia ma ē ‘ua fa‘atagataotau‘a,o ali‘i sili o ē ita mai.
43. ‘Outou nu‘u ‘ese e, ‘inā ‘oli‘oli ia fa‘atasi ma lona nu‘u;auā na te taui ma sui le toto o ana ‘au‘auna,na te tu‘uina atu fo‘i le taui i ē o fai o ia ma fili;e togiolaina fo‘i e ia le lau‘ele‘ele o lona nu‘u.
44. ‘Ua alu atu Mose, ma fai atu i ‘upu uma o lenei pese a o fa‘alogologo mai le nu‘u, o i lā‘ua ma Iosua le atali‘i o Nuno.
45. ‘Ua uma fo‘i ‘ona fai atu e Mose nei ‘upu uma ‘iā Isaraelu uma lava;
46. ‘ona ia fai atu lea ‘iā te i latou: “‘Ia ‘outou mānatunatu i ‘upu uma ‘ou te ta‘u atu ‘iā te ‘outou i le aso nei; tou te poloa‘i atu ai ‘iā ‘outou fānau ‘ia ‘ana‘ana e faia ‘upu uma o lenei tulafono.
47. Auā e lē se ‘upu fa‘atauva‘a lea ‘iā te ‘outou auā o i ai lo ‘outou ola; o lenei mea fo‘i tou te fa‘afualoa ai a ‘outou aso i le lau‘ele‘ele, tou te sopo‘ia atu ai Ioritana e fai mo ‘outou.”
48. ‘Ua fetalai mai fo‘i le ALI‘I ‘iā Mose i lea lava aso, ‘ua fa‘apea mai:
49. “‘Inā alu a‘e ia oe i lenā Mauga o Aperima, o le mauga o Nepo, o i le nu‘u o Moapi, o lo‘o fesagai ma Ieriko; ma e va‘ai atu i le nu‘u o Kanana ‘ua ‘ou foa‘iina atu i le fānauga a Isaraelu e fai mo latou.
50. ‘E te oti fo‘i i le mauga ‘e te alu a‘e i ai, e fa‘atasiina atu fo‘i oe i lou nu‘u, e fa‘apei ‘ona oti o Arona lou uso i le mauga o Hero, ‘ua fa‘atasiina atu fo‘i i lona nu‘u;
51. auā na agasala mai ‘oulua ‘iā te a‘u i luma o le fānauga a Isaraelu i le vai o Meripa-katesa, i le vao o Tisina; auā na lē fa‘apa‘iaina o a‘u e ‘oulua i luma o le fānauga a Isaraelu.
52. E va‘ai atu oe i le nu‘u o i ou luma, a ‘e te lē o‘o i le nu‘u ‘ua ‘ou foa‘iina atu i le fānauga a Isaraelu.”#