1. ‘Ua fetalai mai le ALI‘I ‘iā Mose, “‘Inā ulufale atu ia oe ‘iā Farao, ma fai atu ‘iā te ia, ‘O lo‘o fa‘apea ‘ona fetalai mai o le ALI‘I le Atua o sa Eperū, ‘ia e tu‘u mai lo‘u nu‘u e ō, latou te ‘au‘auna mai ‘iā te a‘u.
2. Auā ‘āfai ‘e te lē mafai ‘ona tu‘u mai i latou e ō, ‘ae tāofi pea i latou,
3. fa‘auta, o le ‘a‘ao o le ALI‘I e o‘o i au manu i le fanua, o solofanua, ma asini, ma kamela, ma povi, ma mamoe, o le fa‘ama‘i matuā mamafa lava.
4. ‘Ae vavae‘eseina e le ALI‘I o manu a Isaraelu ma manu a Aikupito; e lē mate lava se mea e tasi i mea uma a le fānauga a Isaraelu.’”
5. ‘Ona tu‘upo ai lea e le ALI‘I, ‘ua fetalai mai, “A taeao e faia e le ALI‘I lenei mea i le nu‘u.”
6. ‘Ona faia lea e le ALI‘I o lea mea i le aso taeao, ‘ua mamate ai o manu uma lava a Aikupito, ‘ae le‘i mate lava se manu e tasi a le fānauga a Isaraelu.
7. ‘Ona ‘auina atu lea e Farao, fa‘auta, e le‘i mate se manu a Isaraelu, ‘ua leai lava se tasi; a ‘ua ma‘a‘a pea lava le loto o Farao, e le‘i tu‘uina mai e ia o le nu‘u e ō.
8. ‘Ona fetalai mai lea o le ALI‘I ‘iā Mose ma Arona, “‘Ia fa‘atūtūmu ‘oulua lima uma i lefulefu mai le umu, ma ‘ia sa‘alu‘u solo ai i luga e Mose i luma o Farao.
9. ‘Ona liu efuefu nini‘i ai lea i le nu‘u uma lava o Aikupito, e ‘avea fo‘i i luga o tagata ‘atoa ma manu ma ma‘i fulafula e tupu ai le manunu i le nu‘u uma lava o Aikupito.”
10. ‘Ona la ‘ave lea o lefulefu nai le umu, ‘ua la tutū atu i luma o Farao, ‘ona sa‘alu‘u solo ai lea i luga e Mose, ‘ona ‘avea lea ma ma‘i fulafula o tupu ai le manunu i tagata ‘atoa ma manu.
11. ‘Ua lē lavā taulāitu ‘ona tutū i luma o Mose, ‘ona o le ma‘i fulafula; auā sa i ai le ma‘i fulafula i taulāitu ‘atoa ma Aikupito uma lava.
12. A ‘ua fa‘ama‘a‘a e le ALI‘I le loto o Farao, e le‘i fa‘alogo fo‘i o ia ‘iā te i lā‘ua, e pei o le afioga a le ALI‘I ‘iā Mose.
13. ‘Ona fetalai mai lea o le ALI‘I ‘iā Mose, “‘Ia e ala usu i le taeao lava, ma ‘ia e tu i luma o Farao, ma fai atu ‘iā te ia, o lo‘o fa‘apea ‘ona fetalai mai o le ALI‘I le Atua o sa Eperū, ‘‘Ia e tu‘u mai lo‘u nu‘u e ō, ‘ina ‘ia latou ‘au‘auna mai ‘iā te a‘u;
14. auā o ona po nei lava ‘ou te tu‘uina atu ai a‘u mala uma lava i luga ‘iā te oe, ma au ‘au‘auna, ma lou nu‘u, ‘ina ‘ia e iloa ai e leai lava se tasi e tusa ma a‘u i le lalolagi uma lava.
15. Auā o le a a‘u fa‘aloaloa nei lo‘u lima, ‘ou te taia oe ma lou nu‘u i le fa‘ama‘i, ‘ina ‘ia fano ai oe i le nu‘u.
16. E moni lava, o le mea lava lea ‘ua ‘ou fa‘atūina ai oe, ‘ina ‘ia ‘ou fa‘aali ai lo‘u mana ‘iā te oe, ma ‘ia ta‘ua lo‘u igoa i le lalolagi uma lava.
17. ‘E te fa‘amaualuga pea ‘ea oe i lo‘u nu‘u, ‘ina ‘ua e lē tu‘uina mai i latou e ō?
18. Fa‘auta, o le aso taeao, e fa‘apenei le itūlā, ‘ou te fa‘atotō ifo ai le uato‘a tetele lava, e leai sona tusa i Aikupito talu ‘ona fa‘ato‘ā ‘ainā, ‘ua o‘o mai lava i nei ona po.
19. O lenei, ‘ia e ‘a‘ami atu ‘ia tu‘u i se mea e malu ai au manu, ma au mea uma lava o lo‘o i le vao; o tagata uma lava ‘atoa ma manu e maua i le vao e lē fa‘apotopotoina i fale, e alu ifo i luga ‘iā i latou le uato‘a latou te fano ai.’”
20. O sē na fefe i le afioga a le ALI‘I i ‘au‘auna a Farao, ‘ua ia fai atu ‘ia sōsōla ana ‘au‘auna ma ana manu i fale;
21. a o lē na lē manatu i le afioga a le ALI‘I, ‘ua ia tu‘u pea ana ‘au‘auna ma ana manu i le vao.
22. ‘Ona fetalai mai lea o le ALI‘I ‘iā Mose, “‘Inā fa‘aloaloa ia o lou lima i luga, ‘ona tō ifo ai lea o le uato‘a i le nu‘u uma lava o Aikupito, i luga o tagata, ma manu, ma la‘au afu uma lava o le fanua i le nu‘u o Aikupito.”
23. ‘Ona fa‘aloaloa a‘e lea e Mose o lona to‘oto‘o i luga, ‘ona tu‘uina mai lea e le ALI‘I o faititili ma le uato‘a, ‘ua sosolo fo‘i le afi i le ‘ele‘ele, ‘ua fa‘atotō ifo fo‘i e le ALI‘I le uato‘a i le nu‘u o Aikupito.
24. Sa i ai le uato‘a ma le afi e fefiloi ma le uato‘a, ‘ua mamafa tele lava, e leai lava sona tusa i le nu‘u uma lava o Aikupito talu ‘ina ‘ainā.
25. ‘Ua to‘ia le lau‘ele‘ele uma lava o Aikupito i le uato‘a, o mea uma lava sa i le vao, o tagata ‘atoa ma manu, ma la‘au afu uma lava o le fanua ‘ua uma ona to‘ia i le uato‘a; ‘ua gaugau ai fo‘i o la‘au uma lava o le vao.
26. Na o le nu‘u o Kosena sa i ai le fānauga a Isaraelu, ‘ua lē i ai lava se uato‘a.
27. ‘Ona fe‘auina lea e Farao ‘ua ‘a‘ami ‘iā Mose ma Arona, ‘ua fai mai ‘iā te i lā‘ua, “‘Ua ‘ou agasala i lenei mea; o lo‘o amiotonu le ALI‘I, ‘ae peita‘i a‘u nei ma lo‘u nu‘u, ‘ua amio leaga i matou;
28. ‘inā fa‘atoga atu ia ‘oulua i le ALI‘I, ‘ia sōia le toe faititili tetele mai ma le uato‘a, ‘ona ‘ou tu‘uina atu ai lea o ‘outou e ō, tou te lē toe nonofo lava.”
29. ‘Ua fai atu Mose ‘iā te ia, “A a‘u alu i tuā pā o le ‘a‘ai, ‘ona ‘ou fa‘aloaloa atu lea o o‘u lima i le ALI‘I, ‘ona mavae ai lea o le faititili, e leai fo‘i se toe uato‘a; ‘ina ‘ia e silafia ai, o lo‘o i le ALI‘I lava le lalolagi.
30. A o oe ma au ‘au‘auna ‘ua ‘ou iloa lava, tou te lē matata‘u ai nei lava i le ALI‘I le Atua.”
31. Sa toia le lino ‘atoa ma le karite; auā sa fua le karite, ma ‘ua fuga le lino;
32. a o le saito ‘atoa ma le kaseme, e le‘i toia ia, auā ‘ua lē tutupu a‘e.
33. ‘Ona alu lea o Mose nai ‘iā Farao i tua pā o le ‘a‘ai, ‘ua fa‘aloaloa atu ona lima i luma o le ALI‘I, ‘ona mavae ai lea o le faititili ma le uato‘a; ‘ua lē toe tō mai fo‘i le timu i luga o le lau‘ele‘ele.
34. ‘Ua iloa e Farao, ‘ua mavae le timu, ma le uato‘a, ma le faititili, ‘ona atili ai lea ‘ona agasala o ia, ‘ua fa‘ama‘a‘a lona loto, o ia ‘atoa ma ana ‘au‘auna.
35. ‘Ona fa‘ama‘a‘aina ai lea o le loto o Farao, e le‘i tu‘uina atu lava le fānauga a Isaraelu e ō, fa‘apei ‘ona fetalai mai ai o le ALI‘I ‘iā Mose.