1. Mulimuli ane i le ō atu ai Mose ma Arona, ‘ua la fai atu ‘iā Farao, “O lo‘o fa‘apea ‘ona fetalai mai o le ALI‘I le Atua o Isaraelu, ‘‘Ia e tu‘uina mai lo‘u nu‘u ‘ia latou fai se tausamiga ‘iā te a‘u i le vao.’”
2. ‘Ua tali mai Farao, “O ai ‘ea le ALI‘I ‘ou te fa‘alogo ai i lana ‘upu, ma ‘ou tu‘uina atu ai o Isaraelu e ō? ‘Ou te le‘i iloa le ALI‘I, ‘ou te lē tu‘uina atu fo‘i Isaraelu e ō.”
3. ‘Ona la fai atu lea, “Na fetaia‘i ma i mā‘ua le Atua o sa Eperū; se‘i ē tu‘u mai matou te ō malaga i ni aso e tolu i le vao, matou te fai ai taulaga i le ALI‘I lo matou Atua, ne‘i taia mai i matou e ia i le fa‘ama‘i po o le pelu.”
4. ‘Ua fai mai le tupu o Aikupito ‘iā te i lā‘ua, “‘Oulua na, o Mose ma Arona, se a ‘ea le mea lua te fa‘amānava ai le nu‘u ‘iā latou galuega? ‘Inā ō ia ‘iā ‘outou avega.”
5. ‘Ua fai mai fo‘i Farao, “Fa‘auta, o lenei, e to‘atele lava le nu‘u; a ‘ua ‘oulua fa‘amānava ‘iā te i latou ‘iā latou avega.”
6. ‘Ua fai atu fo‘i Farao i lea lava aso i lē na pule i galuega a le nu‘u ma o latou matai, ‘ua ia fa‘apea atu,
7. “‘Aua ne‘i ‘outou toe avatu ‘au o saito i le nu‘u e fai a‘i ma‘a‘omea fa‘apei o anamua; a ‘ia latou ō ma fa‘aputu ‘au o saito mo i latou;
8. a o lē ‘atoa o ma‘a‘omea na latou faia anamua, ‘ia totogi atu pea ‘iā te i latou, ‘aua lava le fa‘aitiitia; auā ‘ua paiē i latou, o le mea lea e tagi mai ai i latou, ‘ua fa‘apea mai, ‘Se‘i matou ō matou te fai taulaga i lo matou Atua.’
9. ‘Ia mamafa le galuega i tagata na, ma ‘ia latou faia lava; ‘aua fo‘i ne‘i latou fa‘alogo i ‘upu pepelo.”
10. ‘Ona ō ane lea o ē na pule i galuega a le nu‘u ma o latou matai, ‘ua latou fai atu i le nu‘u, ‘ua fa‘apea, “O lo‘o fa‘apea ‘ona fetalai mai o Farao, ‘‘Ou te lē avatu ‘iā te ‘outou ni ‘au o saito.
11. ‘Inā ō ia ‘outou, ma sā‘ili ‘au o saito i se mea tou te maua mai ai, auā e lē fa‘aitiitia lava la ‘outou galuega.’”
12. ‘Ona ta‘ape‘ape lea o le nu‘u i le lau‘ele‘ele uma o Aikupito e fa‘aputu ai tagutugutu o saito e fai ma ‘au o saito.
13. ‘Ua nanati atu fo‘i ē na pule i le galuega, ‘ua fa‘apea atu, “‘Inā fa‘a‘atoa ia a ‘outou galuega, o le aso ma lana galuega, fa‘apei ‘ona ‘outou faia a o i ai ‘au o saito.”
14. ‘Ona sasaina lea o matai o le fānauga a Isaraelu, sa tofia e pule ‘iā i latou e i latou ē na pule mai ‘iā Farao, o lo‘o fa‘apea ane, “Se a ‘ea le mea ‘ua ‘outou lē fa‘a‘atoa ai i le asō ma ananafi le galuega i ma‘a‘omea na tofia ‘iā te ‘outou, pei o aso anamua?”
15. ‘Ona ō atu lea o matai o le fānauga a Isaraelu, ‘ua tagi atu ‘iā Farao, o lo‘o fa‘apea, “Se a le mea ‘e te fa‘apea ai ‘ona fai i au ‘au‘auna?
16. E le‘i ‘aumai ni ‘au o saito i au ‘au‘auna, ‘ae fai mai i latou ‘iā te i matou, ‘‘Inā faia o ma‘a‘omea.’ Fa‘auta fo‘i, ‘ua sasaina au ‘au‘auna, a o i lou lava nu‘u le sesē.”
17. A ‘ua fai mai o ia, “‘Ua paiē, ‘ua paiē lava ‘outou, o le mea lea tou te fai mai ai, ‘Se‘i matou ō, matou te fai taulaga i le ALI‘I.’
18. O lenei, ō ia ‘outou, ‘inā galulue, e lē avatu ni ‘au o saito ‘iā te ‘outou, ‘ae tou te ‘aumai pea le ‘atoa o ma‘a‘omea.”
19. ‘Ona iloa lea e matai o le fānauga a Isaraelu ‘ua pagātia i latou, ‘ina ‘ua fai mai, “‘Aua tou te fa‘aitiitia lava ma‘a‘omea i lea aso ma lea aso.”
20. ‘Ua latou fetaia‘i ma Mose ma Arona, o tutū mai i lā‘ua i le ala, ‘ina ‘ua latou ō i fafo na ‘iā Farao.
21. ‘Ona latou fai atu lea ‘ia te i lā‘ua, “‘Ia sisila mai le ALI‘I ‘iā te ‘oulua, ma fa‘amasino mai, auā o ‘oulua ‘ua ‘inosia ai i matou i luma o Farao ma ana ‘au‘auna, e tu‘u ai le pelu i o latou lima e fafasi ai i matou.”
22. ‘Ona fo‘i atu lea o Mose i le ALI‘I, ma fai atu, “Le Ali‘i se a le mea ‘ua e agaleaga ai i lenei nu‘u? Se a fo‘i le mea na e ‘auina atu ai a‘u?
23. Auā talu ‘ina ‘ou alu atu ‘iā Farao e tautala atu ai i lou suafa, ‘ua agaleaga mai lava o ia i lenei nu‘u; ‘e te le‘i lavea‘i lava i lou nu‘u.”