1. ‘E te faia le Malumalu i ‘ie puipui e sefulu, o le ‘ie vavae ‘ua milo ona manoa, e lanu uli, ma le pāuli, ma le mūmū, o kerupi, o le galuega a le tufuga poto, ‘e te fai ai ia mea.
2. O le umi e ta‘itasi o ‘ie puipui, e luafulu ma le valu ona kupita, o le lau e ta‘itasi o ‘ie puipui, e fa ona kupita; e tasi le fua o ‘ie puipui uma.
3. E fa‘aso‘oina ‘ie puipui e lima, ‘ia fa‘atasi; e fa‘aso‘oina fo‘i o ‘ie puipui e lima, ‘ia fa‘atasi.
4. ‘E te faia fo‘i o fa‘amaufa‘alave i le ‘ie uli i le tafatafa o le ‘ie puipui e tasi, i le tafatafa e so‘o ai; ‘e te fai fa‘apenā fo‘i i le tafatafa lava o le tasi ‘ie puipui i le mea e so‘o ai ma le tasi.
5. E limagafulu fa‘amaufa‘alave ‘e te faia i le tasi ‘ie puipui, e limagafulu fo‘i fa‘amaufa‘alave ‘e te faia i le tafatafa o le ‘ie puipui i le mea e so‘o ai ma le tasi, ‘ina ‘ia fa‘afeagai o fa‘amaufa‘alave le tasi i le tasi.
6. ‘E te faia fo‘i fa‘amau auro e limagafulu ma fefa‘aso‘oa‘i o ‘ie puipui i fa‘amau, e fai ma malumalu e tasi.
7. ‘E te faia fo‘i o ‘ie puipui i fulufulu ‘oti, e fai ma ufi i luga o le malumalu, e sefulu ma le tasi ‘ie puipui ‘e te faia,
8. e tolugafulu kupita le umi o le ‘ie puipui e tasi; e fa fo‘i kupita le lau o le ‘ie puipui e tasi, e tasi lava le fua o ‘ie puipui ‘ia e sefulu ma le tasi.
9. ‘E te fa‘aso‘o fo‘i o ‘ie puipui e lima, ‘ia fa‘atasi, ma ‘ie puipui e ono, ‘ia fa‘atasi; ‘e te gauluaina fo‘i lona ono o ‘ie puipui i luma o le fale fetāfa‘i.
10. ‘E te faia fo‘i fa‘amaufa‘alave e limagafulu i le tafatafa aupito i fafo o le tasi ‘ie puipui i le mea e fa‘aso‘oina ai; e limagafulu fo‘i fa‘amaufa‘alave i le tafatafa o le tasi ‘ie puipui i le mea e so‘o ai ma le tasi.
11. ‘E te faia fo‘i fa‘amau ‘apamemea e limagafulu, ma sulu ia fa‘amau i fa‘amaufa‘alave e fa‘aso‘o ai le fale fetāfa‘i, ‘ina ‘ia tasi.
12. O le toe pito ‘ie puipui o le fale fetāfa‘i, o le toe vaeluaga o le ‘ie puipui, ‘ia tautau lea i tua o le malumalu.
13. O toe mea i le umi o ‘ie puipui o le fale fetāfa‘i, o le kupita i le tasi itū, o le kupita fo‘i i le tasi itū e tautau lava ia i itū o le malumalu i lea itū ma lea itū e ufiufi ai.
14. ‘E te faia fo‘i le ufiufi mo le fale fetāfa‘i i pa‘u mamoe po‘a fa‘alanu ulaula, ma le ufiufi o pa‘u takesa e laualuga.
15. ‘E te faia fo‘i laupapa o le la‘au o le setima mo le malumalu, e fa‘atutū;
16. o le umi o laupapa ta‘itasi e sefulu ona kupita, o le lau o laupapa e tasi le kupita ma le vaeluagalemū o le kupita.
17. E lua fo‘i mea fa‘anifo i laupapa ta‘itasi, e fa‘afeagai le tasi i le tasi, e fa‘apea ‘ona e faia lava o laupapa uma lava o le malumalu.
18. ‘E te faia laupapa e luafulu mo le malumalu i le itū i saute; e feagai lea ma le itū i saute.
19. ‘E te faia fo‘i lago ario e fagafulu i lalo o ia laupapa e luafulu, e lua lago i lalo o le tasi laupapa e fa‘atatau i mea fa‘anifo e lua; e lua fo‘i lago i lalo o le tasi laupapa e fa‘atatau i mea fa‘anifo e lua.
20. O i le tasi fo‘i itū o le malumalu, o le itū i matū lea, e luafulu o laupapa.
21. E fagafulu fo‘i o latou lago ario; e lua lago i lalo o le tasi laupapa, e lua fo‘i lago i lalo o le tasi laupapa.
22. O itū i sisifo fo‘i o le malumalu ‘e te fai ai laupapa e ono.
23. E lua fo‘i laupapa ‘e te faia i tulimanu o le malumalu i ona itū e lua.
24. E fa‘aso‘oina fo‘i ia, ‘ia fa‘agatasi i lalo, e fa‘aso‘oina fo‘i i luga i le fa‘amaumama e tasi, e fa‘apea lava mo ia mea e lua i ona tulimanu e lua.
25. O laupapa ia e valu, ma o latou lago ario, o lago e sefulu ma le ono, e lua lago i lalo o le tasi laupapa, e lua fo‘i lago i lalo o le tasi laupapa.
26. ‘E te faia fo‘i fa‘alava i le la‘au o le setima, e lima mo laupapa i le fasi itū o le malumalu,
27. e lima fo‘i fa‘alava mo laupapa i le tasi itū o le malumalu, e lima fo‘i fa‘alava mo laupapa o le itū o le malumalu i ona itū e lua i sisifo.
28. O le fa‘alava, vaeloto i totonugalemū o laupapa, ‘ia gata mai i le tasi pito fale, e gata atu i le tasi pito fale.
29. ‘E te ufiufi fo‘i laupapa i le auro, e fai fo‘i o latou fa‘amaumama i le auro, e sulu ai fa‘alava; ‘e te ufiufi fo‘i o fa‘alava i le auro.
30. ‘Ia e fa‘atū fo‘i le malumalu e pei o le fa‘atusa na fa‘aali atu ai ‘iā te oe i le mauga.
31. ‘E te faia fo‘i le puipui ‘ie uli, ma le pāuli, ma le mūmū, o le ‘ie vavae ‘ua milo ona manoa; na te faia i ai kerupi i le galuega a le tufuga poto.
32. ‘E te tautauina ai i pou setima e fa e ufitia i le auro; e faia fo‘i o latou fa‘amau i le auro i luga o lago ario e fa.
33. ‘E te tautau fo‘i le ‘ie puipui i lalo o fa‘amau, ma ‘ia e avatu ai le ‘atola‘au o le tulafono i totonu i tala atu o le ‘ie puipui, e pupuni atu fo‘i le ‘ie puipui i le vā o le mea pa‘ia ma le mea e sili ‘ona pa‘ia.
34. ‘E te fa‘ae‘e fo‘i le nofoa o le alofa i luga o le ‘atola‘au o le tulafono i le mea e sili ‘ona pa‘ia.
35. ‘E te tu‘uina fo‘i le la‘o‘ai i le itū mai o le ‘ie puipui; o le tu‘ugālamepa fo‘i e feagai ma le la‘o‘ai i le itū i saute o le malumalu; o le la‘o‘ai fo‘i ‘e te tu‘uina i le itū i matū.
36. ‘E te faia fo‘i le puipui tautau mo le faitoto‘a o le fale fetāfa‘i i le ‘ie uli ma le pāuli, ma le mūmū, ma le ‘ie vavae ‘ua milo ona manoa, o le galuega a le tufuga fai ‘ie lanu ‘ese‘ese.
37. ‘E te faia fo‘i mo le puipui tautau o pou setima e lima, ma ufiufi ai i le auro, e fai fo‘i o latou fa‘amau i le auro; ‘ia e tunu le ‘apamemea e fai a‘i o latou lago e lima.