1. O igoa nei o atali‘i o Isaraelu ē na ō atu i Aikupito fa‘atasi ma Iakopo, e ta‘itasi ma lona ‘āiga na ō atu ai;
2. o Reupena, o Simeona, o Levi, ma Iuta,
3. o Isakara, o Sepulona, ma Peniamina,
4. o Tanu, ma Nafatali, o Kato, ma Asera.
5. O tagata uma na fānaua e Iakopo e to‘afitugafulu i latou, a o Iosefa sa i ai o ia i Aikupito.
6. ‘Ua oti fo‘i Iosefa ma ona uso uma, ‘atoa ma lea lava tupulaga uma;
7. a ‘ua fanafānau le fānauga a Isaraelu, ‘ua matuā fa‘ato‘ateleina, ‘ua uluola, ma ‘ua fa‘asilisili ‘ona to‘atele, ‘ua tumu lava le nu‘u ‘iā te i latou.
8. ‘Ona nofo mai lea i le mālō o Aikupito o le tupu fou na te le‘i iloa Iosefa.
9. ‘Ua ia fai atu i lona nu‘u, “Fa‘auta, o le nu‘u o le fānauga a Isaraelu ‘ua sili ‘ona to‘atele ma le malosi ‘iā i tatou;
10. ‘inā ō mai ia, ‘inā tatou togafiti poto ‘iā i latou, ne‘i tupu tele, ‘ona i‘u ai lea, pe a o‘o se tau‘a, ‘ina ‘au fa‘atasi i latou ma ē ‘ino‘ino mai ‘iā i tatou, ma latou tau mai ‘iā i tatou, ma ō ‘ese i le nu‘u nei.”
11. ‘Ona latou tofia ai lea o ē pule i galuega ‘iā te i latou, ‘ina ‘ia latou fa‘atigā ‘iā te i latou ‘iā latou avega mamafa; ‘ua latou faia fo‘i mo Farao o ‘a‘ai e tu‘u ai ‘oloa, o Pitoma ma Ramese.
12. ‘Ua latou fa‘atigā ‘iā i latou, ‘ua atili ai ‘ona fa‘ato‘ateleina, ‘ua atili ai fo‘i ‘ona tutupu; ‘ua atuatuvale i latou i le fānauga a Isaraelu.
13. ‘Ua fa‘apologaina e Aikupito le fānauga a Isaraelu i le fa‘asauā.
14. ‘Ua latou fa‘afiufiu fo‘i ‘iā i latou i le galuega mamafa, i le ‘omea, ma ma‘a‘omea, ma galuega uma i fanua; o a latou galuega uma lava na latou fa‘apologaina ai i latou, ‘ua faia ma le fa‘asauā.
15. ‘Ua fai atu fo‘i le tupu o Aikupito i ē na fa‘atōsaga i fānauga o fafine Eperu, o le igoa o le tasi o Sepela, o le igoa fo‘i o le tasi o Pu‘a,
16. ‘ua fa‘apea atu, “Pe a ‘oulua fa‘atōsaga i fānauga o fafine Eperu, a o‘o ‘ina a fānau, ‘āfai o se tama ‘ia fasioti ‘iā te ia, ‘ae ‘āfai o se teine ‘ia ola ia.”
17. A ‘ua matata‘u i le Atua ē na fa‘atōsaga i fānauga, e le‘i faia fo‘i le mea na fai atu ai le tupu o Aikupito ‘iā te i lā‘ua, a ‘ua la fa‘aola lava i tama tane.
18. ‘Ona ‘a‘ami atu lea e le tupu o Aikupito ē na fa‘atōsaga i fānauga, ma fai atu ‘iā te i lā‘ua, “Se a ‘ea le mea ‘ua ‘oulua fai ai lenei mea ‘ina ‘ua lua fa‘aolaina o tama tane?”
19. ‘Ona fai mai lea o ē na fa‘atōsaga i fānauga ‘iā Farao, “Auā e lē pei o fafine o Aikupito o fafine Eperu; auā e malolosi lava i latou, ‘ua uma ‘ona latou fānau mai, a o le‘i o‘o atu ai lava lē fa‘atōsaga i fānauga.”
20. ‘Ua agalelei le Atua i ē na fa‘atōsaga i fānauga; ‘ua fa‘ato‘ateleina le nu‘u, ‘ua malolosi lava i latou.
21. ‘Ua matata‘u i le Atua ē na fa‘atōsaga i fānauga, o le mea lea na ia fai ai ‘āiga mo i lā‘ua.
22. ‘Ua fai atu fo‘i Farao i lona nu‘u uma lava, o lo‘o fa‘apea atu, “O tama uma lava e fānau mai ‘iā ‘outou lafo i le vaitafe, a o teine uma lava ‘ia ‘outou fa‘aolaina.”#